მოძღვარი გვირჩევს
ავტორი: „თბილისელები“ 22:00 23.11
კითხვა: ნიშნავს თუ არა ქრისტიანული მშვიდობისმოყვარეობა მოყვასის ბოროტებაზე თვალის დახუჭვას?
პასუხი: ახლობლებთან მშვიდობის დამყარების ვალდებულება არ ნიშნავს იმას, რომ ჩვენ დავეთანხმოთ მათ ავ ზრახვებს, აზრებსა და ქმედებებს. ასეთი თანხმობა დიდი ცოდვა იქნებოდა. პირიქით, შევეწინააღმდეგოთ ამას, ეს არის ქრისტიანის ვალი.
კითხვა: როდის არ შეისმენს უფალი ჩვენს ლოცვას?
პასუხი: ლოცვას არ აქვს ფასი, როდესაც ის გულწრფელად არ არის წარმოთქმული და არ მიემართება უფლისკენ. თავად მაცხოვარი ბრძანებს ასეთ მლოცველთა შესახებ: „ეს ხალხი მე პატივს მცემს ბაგეებით, მათი გული კი შორს არის ჩემგან“ (მათე, 15.8).
კითხვა: გვტოვებს თუ არა ჩვენი მფარველი ანგელოზი, როდესაც ცოდვას ჩავდივართ?
პასუხი: ამ კითხვაზე ათონელი ღირსი მამა პაისი ასე პასუხობდა: „ანგელოზი რომ ასე იოლად გვტოვებდეს, სამყარო, ალბათ, დიდი ხნის წინ დაიღუპებოდა. ის არ გვტოვებს, რჩება ჩვენთან, ოღონდ იტანჯება და ღმერთთან ცარიელი ხელებით ბრუნდება“.
კითხვა: ვინ იცის, უნებურად ან თუნდაც ნებსით, რამდენი ადამიანისთვის გვიწყენინებია. როგორ მოვინანიოთ ეს ცოდვა?
პასუხი: ამ კითხვაზეც ბერი პაისი გვპასუხობს: „ცხოვრებაში, თუნდაც, ერთხელ უნდა დავუნთოთ სანთელი მათ, ვისთვისაც გვიწყენინებია, ანგარიშში მოგვიტყუებია, მოგვიპარავს, ვალი არ დაგვიბრუნებია და მოვინანიოთ აღსარებაში“.
კითხვა: როდესაც ვბრაზდები, თავშეუკავებლობას ვიჩენ, შემდეგ რომ ვაანალიზებ, არ მომწონს ჩემი საქციელი, მაგრამ თავს ვერ ვერევი. მირჩიეთ, როგორ შევინარჩუნო სიმშვიდე?
პასუხი: ასეთ დროს, სანამ რაიმეს იტყვით ან მოიმოქმედებთ, ცოტა ხნით შეჩერდით და გულში იესოს ლოცვა თქვით.
სიახლეები ამავე კატეგორიიდან
