ექიმის რჩევები
ავტორი: „თბილისელები“ 16:00
კითხვა: მაინტერესებს, რამდენად შესაძლებელია ჩვენნაირ პატარა ქვეყანაში დონორის მასალით დაორსულებისას მომავალში ინცესტის შემთხვევების სიხშირე იმ შემთხვევაში, თუ იგივე პიროვნების მასალით გაჩენილი შვილები ერთმანეთს შეხვდებიან?
პასუხი: ასეთი შემთხვევის რისკი ძალიან დაბალია, განსაკუთრებით მაშინ, თუ დონორის მასალა ლიცენზირებული კლინიკის მეშვეობით გამოიყენება და დონორზე დაწესებული შეზღუდვები დაცულია. დონორის პროგრამებში ჩვეულებრივ არსებობს ერთი დონორის გამოყენების რაოდენობის შეზღუდვები და შესაბამისი აღრიცხვა.
კითხვა: რამდენად ეფექტირია და უვნებელი გასახდომი პაჩები, რომელიც აქტიურად რეკლამდება. მართლა თუ იწვევს წონის კლებას და როგორ შეიძლება მისი გამოყენება?
პასუხი: მათი ეფექტურობისა და უსაფრთხოების შესახებ სანდო მტკიცებულება ამ ეტაპზე არ არსებობს. ასეთი პაჩები არ მიიჩნევა წონის კლების მეცნიერულად დამტკიცებულ მეთოდად და რეკლამირებული „ცხიმის დაწვა“ ან მადის დათრგუნვა ხშირად გადაჭარბებულია. ზოგიერთ გასახდომ პროდუქტში დაუდეკლარირებელი, საშიში ნივთიერებებიც აღმოჩენილა.
კითხვა: 22-დან 24 რიცხვამდე ველოდები ციკლს, მივდივარ საზღვარგარეთ და მიწევს დიდხნიანი მგზავრობა. რა შეიძლება დავლიო, ადრე რომ მომივიდეს?
პასუხი: მენსტრუალური ციკლის ხელოვნურად გამოწვევა ექიმის დანიშნულების გარეშე დაუშვებელი და სარისკოა. მსგავსი ჰორმონალური ჩარევა შესაძლოა, ჯანმრთელობის სერიოზული გართულებების მიზეზი გახდეს, ამიტომ აუცილებლად მიმართეთ გინეკოლოგს, რომელიც ინდივიდუალური საჭიროებების გათვალისწინებით შეგირჩევთ უსაფრთხო გზებს.
სიახლეები ამავე კატეგორიიდან
