კრიმინალური ისტორიები

რა დანაშაულებრივი სქემა შექმნა ბოროტმოქმედმა ქალმა

№21

ავტორი: ნიკა ლაშაური 18:00 30.05

როგორ გაშიფრეს მკვლელი -
tbiliselebi.ge
დაკოპირებულია

ზოგიერთი მთავარი გმირის ვინაობა შეცვლილია და მათი ვინმესთან მსგავსება შემთხვევითია, რისთვისაც ბოდიშს გიხდით.

გამქრალი ფული

1971 წლის 4 აპრილს მოსკოვის ¹2 შემნახველი სალაროს მოლარე ოლგა პეტროვა რომ სამსახურში მივიდა, უზარმაზარი ორსაკეტიანი, ცეცხლგამძლე სეიფის კარი ღია დახვდა. თაროები კი – დაცარიელებული. პეტროვამ მაშინვე მილიციაში დარეკა. ოპერატიული ჯგუფი ადგილზე მალევე გამოცხადდა. მილიციას, რომ იტყვიან, „კუდში“ მოჰყვა სალაროს მმართველი, 29 წლის კლავდია გრიაზნოვა. დილის 10 საათისთვის სალაროს მთელი პერსონალი შეიკრიბა, მოლარე ალა პოტაპოვას გარდა, რომელიც არც სახლში აღმოჩნდა. „მურის“ ოპერჯგუფს კოკა რუსაძე ხელმძღვანელობდა და მან სალაროს თანამშრომელთა დაკითხვები დაიწყო. გაირკვა, რომ სეიფიდან 510 ათასი მანეთი იყო გამქრალი. კლარა გრიაზნოვამ ქართველ გამომძიებელს უთხრა, რომ სეიფის ორი გასაღები მხოლოდ მას ჰქონდა, რომ გასაღებების დუბლიკატები არ არსებობდა და რომ სეიფის გაღების უფლება მხოლოდ მას ჰქონდა. რუსაძე წამით ჩაფიქრდა და გრიაზნოვას უთხრა:

– თუ ასეა, ლოგიკურად იმ დასკვნამდე მივდივართ, რომ სეიფი თქვენ გააღეთ და ფულიც თქვენ წაიღეთ.

– ლოგიკურად ასეა, – მხრები აიჩეჩა ქალმა და დაამატა, – თუმცა, გარწმუნებთ, რომ ეს მე არ ჩამიდენია.

– სხვა გზა არაა. დროებით უნდა დაგაკავოთ და „მურში“ წაგიყვანოთ, – უთხრა ქართველმა გამომძიებელმა გრიაზნოვას.

სალაროს მმართველმა რუსაძეს სეიფის გასაღებები გადასცა და გრიაზნოვა დაკითხვაზე „მურში“ გადაიყვანეს, შემდეგ კი საკანში გაამწესეს.

მოლარე პოტაპოვა

„მურში“ გრიაზნოვამ პირველი ჩვენება გაიმეორა და ორსაათიანი დაკითხვის შემდეგ საკანში გადაყვანა მოითხოვა. „მურის“ ოპერები კი ალა პოტაპოვას ძებნას შეუდგნენ, რომელიც უკვალოდ იყო გამქრალი. თუმცა, სამი დღის შემდეგ ნიჩბოსანმა სპორტსმენებმა მისი ცხედარი კრილატსკოეს საწყალოსნო არხში აღმოაჩინეს და მილიცია გამოიძახეს. მოლარე ქალი ტყვიის ერთი გასროლით იყო მოკლული, მას ტყვია კეფაში ჰქონდა მოხვედრილი. ბალისტიკურმა ექსპერტიზამ დაადგინა, რომ ტყვია პავლე სოზონოვის ტაბელური იარაღიდან იყო გასროლილი. ქალის ჯიბეში შემნახველი სალაროს სეიფის გასაღებების დუბლიკატები აღმოჩნდა. გაირკვა, რომ სოზონოვი მოსკოვის ლენინის რაიონის ოპერრწმუნებული და მოკლული მოლარის საყვარელი იყო. დაიხატა დანაშაულის სურათი – მოლარე პოტაპოვამ სეიფის გასაღებების დუბლიკატების დამზადება მოახერხა და თავისი საყვარლის თანამონაწილეობით სეიფიდან ფული გაიტაცა. შემდგომ კი პოლიციელმა სოზონოვმა თავისი საყვარელი, ალა პოტაპოვა მოკლა, მოპარული თანხა გაიტაცა და მიიმალა. მილიციელი არსად ჩანდა და როგორც „მურელებმა“ დაადგინეს, ის სამი დღის გაუჩინარებული იყო. მიუხედავად იმისა, რომ კოკა რუსაძეს ეჭვი ეპარებოდა დანაშაულის ამგვარ ვერსიაში, ქართველი გამომძიებელი იძულებული იყო, რომ სალაროს მმართველი კლავდია გრიაზნოვა წინასწარი პატიმრობიდან გაეთავისუფლებინა. რუსაძეს მიაჩნდა, რომ მილიციელი თავისი ტაბელური იარაღით არ ჩაიდენდა მკვლელობას და რომ არ გაშიფრულიყო, აუცილებლად სხვა ხერხს მიმართავდა.

ნამდვილი დამნაშავე

მილიციის ლეიტენანტ პავლე სოზონოვზე საკავშირო ძებნა გამოცხადდა. გამოძიება კი ჩიხში იყო შესული. რუსაძეს ოფიციალურად ეჭვმიტანილი არ ჰყავდა. თუმცა საკუთარი მოსაზრები ჰქონდა, რომელსაც არავის უმხელდა. ამასობაში 6 თვე გავიდა და ამ საქმეში კი წინსვლა არ იყო. თუმცა, კოკა რუსაძე თავის ვერსიას არაოფიციალურად მიჰყვებოდა და დეტალებს სხვების დახმარების გარეშე ადგენდა. ოქტომბრის ერთ საღამოს კოკა რუსაძეს ბალისტიკური ექსპერტიზის უფროსმა დაურეკა და უთხრა:

– შენთვის სიახლე მაქვს: იარაღი, რომლითაც მოლარე მოკლეს, ცენტრალური კანალიზაციის კოლექტორში მუშებმა მისი გაწმენდის დროს აღმოაჩინეს.

– როგორც ეტყობა, ის იქ ჩააგდეს, – თქვა რუსაძემ.

– არა მგონია. იქვე მამაკაცის ნახევრად გახრწნილი ცხედარი აღმოჩნდა, სავარაუდოდ, მილიციელ სოზონოვის.

გახრწნილი გვამი მართლა მილიციელის იყო. რუსაძემ კი დაადგინა, რომ მოლარე პოტაპოვას საყვარელი, მილიციელი სოზონოვი სალაროს მმართველის, კლავდია გრიაზნოვას საყვარელიც იყო. რუსაძემ სალაროს მმართველის დაკავების ბრძანება გასცა. „მურში“ დაკითხვაზე კი ქალმა აღიარა, რომ სეიფის გასაღებების დუბლიკატები მან გააკეთებინა, თავისი მოლარე სოზონოვის იარაღით მოკლა და გასაღებები შეგნებულად ჩაუდო ჯიბეში, რომ ქურდობა გარდაცვლილს დაჰბრალებოდა. შემდგომ კი თავად მილიციელიც მოკლა და რა თქმა უნდა, ფულიც მან მოიპარა. ქალს თანხა აგარაკზე ჰქონდა გადამალული.

გრიაზნოვა გაასამართლეს და 19 წლით ჩასვეს ციხეში.

სიახლეები ამავე კატეგორიიდან

ახალი ნომერი - №29

15-21 ივლისი

კვირის ყველაზე კითხვადი

მირზა რეზა

თბილისელი კონსული