რომელი ციფრული კოდია ყველაზე მგრძნობიარე და გულმოწყალე მაგიურ ჩამონათვალში

- რიცხვებს მჭიდრო კავშირი აქვს მაგიასთან და ამჯერად მათი საშუალებით შეგვიძლია გავიგოთ: „რა დონის ჯადოქრები ვართ“ და გვაქვს კი საერთოდ, ეს უნარი? დავიწყოთ იმით, რომ დაბადების თარიღი რიცხვების შემთხვევითი ნაკრები არ არის - ის შენი ჯადოსნური საჩუქარია. შესაბამისი ნომრით დაბადებისას დაგაჯილდოვათ სამყარომ და სულ თქვენთანაა - ვერსად დაკარგავთ და მთელი ცხოვრება უნდა აკონტროლოთ. აბა, გაიხსენეთ: გამხდარხართ მოწმე უცნაური, თითქმის ჯადოსნური მოვლენებისა?

– ალბათ, ყველა და მათ შორის მეც... და როგორ უნდა გავიგო რა მაგიურ ძალას ვფლობ?

- სამყაროსგან ნაბოძები ჯადოსნური საჩუქრის გამოსათვლელად, საჭიროა: შეკრიბოთ დაბადების თარიღის რიცხვები: დღე, თვე, წელი. ჯამი დაიყვანეთ ერთ ციფრამდე. მაგალითად, თუ დაიბადეთ 1978 წლის პირველ აგვისტოს, გამოთვლა ასეთი იქნება: 1+8+1+9+7+8=34=3+4=7. მიღებულ ციფრს, ამ შემთხვევაში „7-ს“ დიდი მნიშვნელობა აქვს. ახლა განვიხილოთ მიღებული 1-9 ციფრის ჩათვლით, თითოეულის მნიშვნელობა ცალ-ცალკე. დავიწყოთ „1-იანიდან“, რომელიც ნიშნავს შექმნას და ყველაზე ძლიერი მაგიური შესაძლებლობების ადამიანები სწორედ ამ ნომრით იბადებიან. მათ ხელთ უპყრიათ მაგიის სამეფოს გასაღები და წარმოუდგენელ ნებისყოფას ფლობენ. მაგრამ უნდა გაგაფრთხილოთ: არ ეცადოთ, სამყაროსგან მომადლებული უნარი მანიპულირებისთვის გამოიყენოთ და თქვენ გარშემო ყველას და ყველაფრის გაკონტროლება მოინდომოთ. თქვენი მაგიური ძალა ნებისყოფითა და გამბედაობით ვლინდება.

- როგორც გამოვთვალე 8 ნომრით დავიბადე... მანამდე დიდი ინტერესით გავეცნობი დანარჩენ „ჯადოქრებს“...

- „2“ ნომრით დაბადებულის კოდი თანაგრძნობაა. ასეთი ადამიანი ძალიან მგრძნობიარეა მის ირგვლივ არსებული ენერგიის მიმართ, ბევრად აღემატება სხვა ადამიანების მგრძნობელობას. სწორედ ამიტომ, თუ „ორიანი“ ხართ, თქვენ ადრეული ბავშვობიდან შეგწევთ უნარი უთანაგრძნოთ და გაუგოთ სხვებს. თქვენ ამ „ჯადოსნურ საჩუქარს“ გულით ატარებთ და შეგიძლიათ, სხვისი ტკივილის შესამსუბუქებლად გამოიყენოთ. მისი საშუალებით, ასევე სწრაფად აღიდგენთ ენერგიას, ბუნებასთან კავშირის დამყარებისას. ჯამში, თქვენი მაგიური ძალა სიზმრები და ინტუიციაა. „3-იანის“ სიმბოლო სამსახიანი მთვარეა - განასახიერებს მთვარის სამ ფაზას. თქვენ კი ამ სამსახა ქალღმერთის ინსტრუმენტი და მხლებელი ხართ. ლიტერატურაში ის ცნობილია, როგორც „თეთრი ქალღმერთი” (სიყვარულის, დაბადებისა და სიკვდილის თეთრი ქალღმერთი) განსხეულებული ქალწულის, დედისა და მოხუცის სახებაში. ქალის ცხოვრების ეს სამი ეტაპი შეესაბამება მთვარის სამ ფაზას: ახალგაზრდას, სავსესა და მილევადს. ასე რომ, შემოქმედებისა და განადგურების ძალა ერთდროულადაა თქვენში. ხომ გაგიგიათ: „უფრთხილდი საკუთარ სურვილებს”. იცოდეთ, ეს თქვენზეა ნათქვამი, რადგან თქვენი ყოველი აზრი და სურვილი ადვილად გაცხადდება. „4“ ელემენტალისტია, აღნიშნავს დედამიწის 4 ელემენტს: ცეცხლს, წყალს, ჰაერსა და მიწას. თქვენი არსია იდეალური ბალანსი ოთხივე ელემენტთან. მათი ენერგიის მუდმივმა გამოყენებამ კი მეტად რაციონალური და ჭკვიანი გაგხადათ. შეიძლება ითქვას, წყევლაც კი არ მოქმედებს თქვენზე, ისეთ მაგიურ ველს ქმნიან თქვენ გარშემო ცეცხლი, მიწა, წყალი და ჰაერი - ყოველგვარ ნეგატივს იგერიებს. ასე რომ, თქვენი უნარი ელემენტთა მაგიაა. „5-იანი“ სპირიტუალისტია - განასახიერებს მეხუთე ელემენტს: სულს, რომელსაც ძველბერძნულ მაგიაში ეთერი ერქვა. ამ ნომრით დაბადებულებს მუდმივი კონტაქტი აქვთ სულიერ სასუფეველთან. მათ შეუძლიათ ადვილად გამოიძახონ ძალები იმიერ სამყაროდან და დაუკავშირდნენ მას. ისინი შესანიშნავი სპირიტუალისტები არიან. თქვენი ძალა წინაპართა სულებთან და მათ მაგიასთან კონტაქტია.

– „ექვსიანი“ და შვიდიანი“ ვიცი, რომ მზესთან და მთვარესთანაა კავშირში...

- „6-იანი“ მზის მოწაფეა - სიმბოლო მზისა და სხვა ყველაფრის, რაც კი მას უკავშირდება. თქვენ ფლობთ ენერგიის ძლიერ შინაგან ნაკადს და ჯადოსნური ძალით მზე გასაჩუქრებთ. ეს ნიშნავს, რომ ძალიან ძლიერი ხართ, გაქვთ მკურნალისა და ლიდერის უნარები. მაგრამ არ დაგავიწყდეთ, რომ დიდ ძალაუფლებას დიდი პასუხისმგებლობაც მოჰყვება. შეეცადეთ, თქვენი უნარი სხვათა საზიანოდ არ გამოიყენოთ. თქვენი ჯადოქრობა მაგიურ რიტუალებსა და სამკურნალო ძალაშია. „7-იანი“ მთვარის მოწაფეა, რომლის სიმბოლოც სწორედ მთვარე და მისი მაგიაა. ამიტომაც ვრცელდება მასზე მთვარის სუფთა და ყოვლის წამლეკავი მაგია. შესაბამისად, არც რიტუალური მაგიის შესახებ სჭირდება რაიმეს სწავლა-მოძიება: დაბადებიდანვე იცის - რა და როგორ. ყველაფერი მარტივად და ოსტატურად გასდის. იმპროვიზაციის ეს ნიჭი ასოცირდება ინტუიციასთან, რომელიც უხვად გაქვთ, „შვიდიანებო“... და კიდევ ერთი - თქვენი ოცნებები, როგორც წესი, წინასწარმეტყველურია, მალევე ახდება. თუ ამ უნარს გონივრულად გამოიყენებთ, სასწაულების მოხდენა შეგიძლიათ. თქვენი ძალა ხილვებსა და წინასწარმეტყველებაშია.

– „8-იანსაც“ მივადექით...

- „8-იანი“ ტრადიციული ჯადოქარი და ერთ-ერთ ყველაზე მაგიური ნიშანია. ასე რომ, „რვიანებო“, თქვენ გაქვთ უზარმაზარი ჯადოსნური ძალა - ერთგვარი შინაგანი კომპასი, რომლითაც ზუსტად იცით, რა არის სწორი და რა – არა. თქვენი მაგია ენერგიული მოქმედება და ალქიმია. ბოლოს კი, „9-იანი“ - შამანი: სიის უკანასკნელი ციფრი სიმბოლოა ყოველივე ზემოთქმულისა. ის არის კარიბჭე, სადაც ყველაფერი მთავრდება და იწყება კიდეც. ამიტომაც ხედავთ და აღიქვამთ ისე, როგორც არავინ სხვა. როგორც არტისტული და შემოქმედი პიროვნება სამყაროსაც და ადამიანებსაც არასტანდარტულად უყურებთ, სხვადასხვა ფოკუსიდან და პერსპექტივიდან. შესაბამისად, შეგიძლიათ მკურნალობა და განკურნება. რადგან 9 სიმბოლოა სიკვდილისა და აღდგომისა, მოჩვენებებსა და სულებსაც შეიგრძნობთ. ყოველივე აქედან გამომდინარე კი, თქვენ შეგიძლიათ გაცდეთ სამყაროსა და ადამიანური შესაძლებლობების საზღვრებს, როგორც ამას აკეთებს ნებისმიერი შამანი. თქვენი უნარია: ასტრალური პროექცია და მაგიის მცველი სული.