როდის თარსავს ადამიანი გაუაზრებელი საქციელით ქვეცნობიერ დონეზე საკუთარ თავს

კარმული ჩავარდნის დროს უნდა გაიაზროთ თქვენი ყოველი ქცევა და სიტყვა, რომ საკუთარი ბედი და იღბალი ცუდისკენ არ დააპროგრამოთ. ამ დროს ადამიანს უჩნდება სურვილი, გამუდმებით იწუწუნოს ბედზე, დასწყევლოს საკუთარი ყოფა, ინატროს სიკვდილი და ასე შემდეგ. ადამიანი ასეთი გაუაზრებელი საქციელით ქვეცნობიერ დონეზე თარსავს საკუთარ თავს. წარუმატებელ დღეებში ძნელია, აკონტროლო სიტყვა, აზრი თუ ქცევა, მაგრამ აუცილებელია, სწორედ ამ პერიოდში აკონტროლოთ ყველაფერი, სურვილებიც კი, თუნდაც ქვეცნობიერ დონეზე.

კარმული ჩავარდნის პერიოდში ადამიანის ენერგეტიკულობა დასუსტებულია და შესაბამისად, ადვილად ხვდება არასასურველი შედეგის მსხვერპლი. ამიტომ, ამ დროს დამცავად, თილისმის სახით, უნდა ატაროთ დაბადების ზოდიაქოს შესაბამისი ასტროლოგიური ქვები. თუ გასათხოვარი ხართ, ის ჩანთის სარჩულზე ან ტანსაცმელზე მიამაგრეთ ისე, რომ არ ჩანდეს. პლატინის ქინძისთავზე წამოცმული ქვის ტარება კარგია თანამდებობის პირის ან ბიზნესმენისთვის. ადამიანებს ის ეხმარება, რომ გონივრული გადაწყვეტილებები მიიღონ, იყვნენ ფრთხილი და წინდახედული საქმიან პარტნიორებთან და საქმეში სწორი, სასარგებლო არჩევანი გაკეთონ. პლატინის ქინძისთავზე წამოცმული ზოდიაქოს შესაბამისი ქვის ტარება ადამიანებს მეექვსე გრძნობასაც უვითარებს და ნეგატიური სიტუაციებისგანაც იცავს.

ტანსაცმელზე მიმაგრებული ოქროს ქინძისთავი თუ გულსაბნევი ადამიანს ჭორებისა და მითქმა-მოთქმისგან იცავს. ვერცხლისფერი ქინძისთავი კაპიტალის მოზიდვას უწყობს ხელს. თუ ჯანმრთელობასთან დაკავშირებული პრობლემები გაქვთ, მაშინ გირჩევთ, მელქიორის გულსაბნევი ატაროთ. რაც შეეხება თილისმურ ქვებს, ბრილიანტის ქვით მოჭედილი გულსაბნევი საქმიან ქალბატონებს ხელს უწყობს, ნებისმიერი მოლაპარაკების დროს მისი აზრი გაითვალისწინონ და გადაწყვეტილებაც მის სასარგებლოდ მიიღონ. ზურმუხტისთვლიანი გულსაბნევის ტარება ჯანმრთელობისთვის ძალიან კარგია, რადგან ის შესაძლო დაავადებებისგან დაგიცავთ. ოპალის ქვით მოჭედილი გულსაბნევი ადამიანებს მიზნის მიღწევაში ეხმარება. მარგალიტისთვლიანი სამკაული კი კარგია მათთვის, ვისაც ქორწინებასთან დაკავშირებული პრობლემები აქვს.

იმისთვის, რომ იცოდეთ, კვირის რომელ დღეს რომელი ასტროლოგიური ქვა და ლითონი შეესაბამება და რომელი მათგანის ტარება მოგიტანთ წარმატებასა და სიკეთეს, გთავაზობთ შემდეგ რჩევებს:

ორშაბათი – მთვარის ენერგიის მატარებელი დღეა. გირჩევთ, ატაროთ ვერცხლის სამკაულები. ამ დღეს ბედნიერებისა და წარმატების მომტანია უფერო, გამჭვირვალე ქვები, ლურჯი და ცისფერი ასტროლოგიური ქვებისგან დამზადებული სამკაულები.

სამშაბათი – ამ დღეს განაგებს პლანეტა მარსი. კარგია ფოლადის სამკაულების ტარება. ასტროლოგიური ქვებიდან უპირატესობა ოპალსა და იასპს მიანიჭეთ.

ოთხშაბათი – ამ დღეს განაგებს მერკური. თილისმად კარგია ხისგან დამზადებული სამკაულები და მარჯნის ქვა, ასევე, ნაცრისფერი ქალცედონი, მწვანე ძოწი, სარდონიქსი. ეს მოგიტანთ წარმატებას.

ხუთშაბათი – ამ დღეს მფარველობს პლანეტა იუპიტერი. ამიტომ უნდა ატაროთ ტყვიისგან დამზადებული დიდი ზომის სამკაულები. ქვებიდან კი – ტოპაზი ან ამეთვისტო.

პარასკევი – ამ დღეს პლანეტა ვენერა მფარველობს და თილისმა კი სპილენძის სამკაულებია. ქვებიდან წარმატებებს გპირდებათ ქრიზოლიტი, აქატი, ნებისმიერი მწვანე ან ღია ფერის ქვა.

შაბათი – ამ დღის მფარველი პლანეტა სატურნია. კალისგან დამზადებული სამკაულები ამ დღის თილისმაა და ადამიანებს ბარიერთა გადალახვაში ეხმარება. ქვებიდან კი ატარეთ მწვანე ქრიზოპრაზი ან იაგუნდი.

კვირა – ამ დღის მფარველი პლანეტა მზეა, თილისმა კი – ოქრო. ამ ლითონის სამკაულების ტარება ხელს უწყობს გარშემო მყოფების კეთილგანწყობის მოპოვებას. ქვებიდან კი თილისმად ლალი ან ქარვა უნდა ატაროთ.