რა შემთხვევაში შეიძლება გაიხსნას ენერგეტიკული პორტალი თქვენს სახლში და რომელი საშიში ძალების შემოდინება ხდება შესაძლებელი მისი საშუალებით

- პორტალი ანუ კარიბჭე, გადასასვლელია ჩვენი სამყაროდან სხვა განზომილებებში (ნატიფ სამყაროში), ერთგვარი გზაჯვარედინია სამყაროთა შორის, მრავალი კვეთითა და დერეფნით. პორტალი შეიძლება გაიხსნას სპონტანურად, ენერგეტიკულ ნაკადთა გადაკვეთისა თუ სხვა ფაქტორთა ზეგავლენით, თუმცა მაგიის მსახურთაც შეუძლიათ, ის განზრახ გახსნან.

- რა საფრთხეს ქმნის პორტალი?

- პორტალის გავლით შეიძლება ათასი ჯურის არსებამ შემოაღწიოს თქვენს სივრცეში, შემოვიდნენ მიცვალებულები, დემონები თუ ასტრალის სხვა ბინადრები... და ყველა მათგანს, თავისი არსებობით, შეუძლია ნეგატიურად იმოქმედოს ადამიანის ცხოვრებაზე - გამოაცალოს ენერგია და დაუზიანოს ჯანმრთელობა. რაც მთავარია, ასეთ სტუმრებს ღია პორტალით არა მხოლოდ ბინაში დარჩენა შეუძლიათ, არამედ უფრო ახლო მეზობლებიც ხდებიან - ადამიანის ენერგეტიკულ ველში იბუდებენ. ამიტომ, თუ მიხვდით, რომ თქვენს ბინაში ასეთი პორტალი ღიაა, ის უნდა დაიხუროს. თუმცა პორტალის დახურვა არც ისე ადვილია. ეს ყველაფერი იმ ძალებზეა დამოკიდებული, ვინც გაააქტიურა. ზოგ შემთხვევაში, ბინის კურთხევა დაგეხმარებათ. ხდება ისეც, რომ პორტალი საკმაოდ დიდია. მაგალითად, ყოფილა შემთხვევა, როცა ბინაში, სადაც ადამიანი წინასწარი განზრახვით გამოასალმეს სიცოცხლეს, ისეთი ძლიერი პორტალი გახსნილა, რომ არსებული სივრცის მიღმა მისი მოსაზღვრე მეზობლის ბინაც დაუპყრია. ასეთი პორტალი დაუყოვნებლივ უნდა დაიხუროს, უშუალოდ მისი გახსნის ადგილას, სადაც ეს ყველაფერი მოხდა. პორტალის ბლოკირება შეგიძლიათ ასევე რუნებით (რუნები – უძველესი გერმანული (სკანდინავური) ნიშნებია, რომელსაც, ძირითადად, მაგიური დატვირთვა აქვს). თუმცა ნუ იმოქმედებთ თვითნებურად, მიმართეთ სპეციალისტს. პირადად მე, როცა მსგავსი საჭიროება იჩენს ხოლმე თავს, რუნებს სარკეზე ვალაგებ.

- რა შეიძლება იყოს პორტალის გახსნის მიზეზი?

- პორტალი ბინაში/სახლში შეიძლება გაჩნდეს სხვადასხვა მიზეზით: თუ იქ ჯადოსნური პრაქტიკით იყვნენ დაკავებულნი; ხშირად ხდებოდა და კვლავაც გრძელდება ძლიერი ნეგატიური ემოციების აფეთქება; იქ ცხოვრობდა პირი არასტაბილური მენტალიტეტით (განსაკუთრებით თუ ეს გარემოება იმავე ბინაში მცხოვრების მიზეზით იყო გამოწვეული); სახლი მდებარეობს ბუნებრივ ანომალიურ ზონაში; სასაფლაოსთან და ძველი სამარხების ადგილზე; იმ ადგილთან, სადაც რაღაც უსიამოვნო, ტრაგიკული მოვლენა მოხდა; ბინაში ვიღაც გარდაიცვალა, მით უმეტეს, თუ ეს იყო ნებაყოფლობით ან პირიქით, ძალადობრივი გზით - სულის გადასვლის მომენტში შეიძლება შეიქმნას პორტალი, განსაკუთრებით მაშინ, თუ სიკვდილის დროს უარყოფითი ენერგიის ძლიერი ამოფრქვევა მოხდა. პორტალი შეიძლება გაჩნდეს სხვადასხვა ადგილას, მაგრამ ძალიან ხშირად მას სარკე ემსახურება. სარკე თავისთავად პორტალია, მაგრამ მიძინებულ, უმოქმედო მდგომარეობაში.

- რით შეიძლება მისი გააქტიურება?

- სარკის გააქტიურებას ხელს უწყობს: სარკეებით მკითხაობა და მაგიური პრაქტიკა სარკის წინ - ნუ იმკითხავებთ სარკის დახმარებით, არ დასხდეთ მის წინ ანთებული სანთლით, ნუ ეცდებით სარკის დერეფნის შექმნას. არსებობს სპეციალური რიტუალები სარკით, მაგრამ მათი შესრულება პროცესის ცოდნისა და გაგების გარეშე, ძალიან საშიშია - შეიძლება ისეთი ძალები შემოიყვანოთ თქვენს ცხოვრებაში, რომელთაგან თავის დაღწევა შეუძლებელი თუ არა, ძალიან რთული აღმოჩნდეს.

- როგორ გავიგოთ, რომ სახლში ენერგეტიკული პორტალია?

- ამის ნიშნებია: როცა სახლში ყოფნისას ზურგს უკან ვიღაცის არსებობას გრძნობთ, თითქოს ვიღაც გითვალთვალებთ, განსაკუთრებით ღამით; პერიფერიული მხედველობით ჩრდილების მოძრაობას ამჩნევთ, თითქოს თქვენს სიახლოვეს რაღაც ნაცრისფერმა (კვამლივით) სილუეტმა გაიელვა; თითქოს ჰაერი ირყევა, ლიცლიცებს - როგორც ეს სიცხეში ცხელი და ცივი ნაკადების შეჯახებისას ხდება (რაღაც მსგავსი მოვლენაა); ხშირად გრძნობთ ჰაერის გამჭოლ ნაკადს ზურგში (დახურული სარკმლისა და ფანჯრების პირობებში) ისე, როგორც ორპირი ქარისას იცის; ტემპერატურა ქვეითდება იმ ადგილას, სადაც პორტალია და შეიძლება აცივდეს; ღამით, სიზმარში განიცდით ასტრალურ გადასვლებს, ძილისა და რეალობის ზღვარზე მყოფს რეგულარულად გეწვევიან, როგორც სასიამოვნო, ისე არც თუ სასიამოვნო სტუმრები; შეიძლება, მოგესმათ ფრაზების ფრაგმენტები, ხმები, ნაბიჯები და სხვა ბგერები; ღია პორტალის (კარიბჭის) მიდამოში შეიძლება გაფუჭდეს ელექტრომოწყობილობა, იციმციმოს განათებამ; სახლში გაჩნდეს ადგილი, რომელიც გაშინებთ: ქვეცნობიერად გრძნობთ შფოთვას, არ გინდათ იმ ოთახში ყოფნა, მაგრამ მაინც თუ მოგიწიათ დარჩენა, გაწუხებთ კოშმარები, თავის ტკივილი თუ სხვა უსიამოვნო შეგრძნება; ზოგჯერ პორტალის არსებობა შეიძლება განსაზღვროთ ანთებული სანთლის გამოყენებით (ამ დროს ალი უჩვეულოდ „იქცევა“): პორტალის ადგილთან მიახლოებისას სანთელი შეიძლება უეცრად ჩაქრეს, ან პირიქით, ძლიერად აალდეს; თუ სახლში ოთხფეხა მეგობრები გყავთ, ისინიც უცნაურად იქცევიან (განსაკუთრებით კატები) - შფოთავენ, თითქოს ვიღაცის მზერას ადევნებენ თვალს და სახლში გარკვეულ ადგილზე ყოფნას გაურბიან; ასევეა მცენარეებიც, შეიძლება დაჭკნეს ან არანორმალურად სწრაფად გაიზარდოს.