როგორ ამოვიცნოთ D ვიტამინის ნაკლებობა

ძირითადი სიმპტომები

ქრონიკული დაღლილობა და ენერგიის ნაკლებობა – მუდმივი სისუსტის შეგრძნება, იმ შემთხვევაშიც კი, როდესაც ძილი და დასვენება საკმარისია.

ძვლებისა და წელის ტკივილი – D ვიტამინი აუცილებელია კალციუმის ათვისებისთვის. მისი ნაკლებობისას ხშირად ვითარდება ტკივილი წელის, მენჯისა და ძვლების არეში.

ხშირი ავადობა და ინფექციები – D ვიტამინი იმუნური სისტემის სწორ ფუნქციონირებას უზრუნველყოფს. თუ ხშირად ცივდებით ან გემართებათ სასუნთქი გზების ინფექციები, ეს შესაძლოა, D ვიტამინის დეფიციტზე მიუთითებდეს.

კუნთების სისუსტე და ტკივილი – კუნთების ტონუსის დაქვეითება, სპაზმები ან ტკივილის შეგრძნება ფიზიკური დატვირთვის გარეშე.

გუნება-განწყობის ცვლილება და დეპრესია: D ვიტამინის რეცეპტორები ტვინის იმ უბნებშიც არის, რომლებიც განწყობაზე აგებენ პასუხს. დეფიციტი ხშირად უკავშირდება უმიზეზო მოწყენილობას ან სეზონურ დეპრესიას.

ჭრილობების ნელი შეხორცება: ოპერაციის, ტრავმის ან ნაკაწრების შემდეგ.

თმის ცვენა – განსაკუთრებით ქალებში, თმის ინტენსიური ცვენა (მათ შორის ალოპეცია) ხშირად უკავშირდება D ვიტამინის დაბალ დონეს.

D ვიტამინის დეფიციტის შევსება სახლისა და ბუნებრივ პირობებში სამი ძირითადი გზით არის შესაძლებელი: მზის სხივებით, საკვები რაციონითა და დანამატების მიღებით.

1. მზის აბაზანები (ყველაზე ბუნებრივი გზა) – D ვიტამინის დაახლოებით 80-90% კანში მზის ულტრაიისფერი (UVB) სხივების ზემოქმედებით სინთეზდება. კვირაში 3-4-ჯერ, დღის 11:00-დან 15:00 საათამდე შუალედში, იყავით მზეზე 15-20 წუთის განმავლობაში. გაითვალისწინეთ: მზის სხივები პირდაპირ უნდა ხვდებოდეს შიშველ კანს (სახე, მკლავები, ფეხები) მზის დამცავი კრემის გარეშე (კრემი UVB სხივებს ბლოკავს). გახსოვდეთ: მინის მიღმა (ფანჯარასთან) ჯდომით D ვიტამინი ვერ სინთეზდება, რადგან მინა UVB სხივებს არ ატარებს.

2. კვების რაციონის გამდიდრება – საკვებით D ვიტამინის მხოლოდ მცირე ნაწილის შევსებაა შესაძლებელი, თუმცა სწორი რაციონი მნიშვნელოვანი დამხმარეა. ცხიმიანი თევზი: ორაგული, სკუმბრია, ქაშაყი, თუნეცი, სარდინები. თევზის ქონი – D ვიტამინის ყველაზე მდიდარი ბუნებრივი წყარო. კვერცხის გული – განსაკუთრებით სოფლის კვერცხი. სოკო – განსაკუთრებით ის სოკო, რომელიც მზის სინათლეზეა გაზრდილი. კარაქი და რძის ნაწარმი.

3. ვიტამინის დანამატები (სამკურნალო დოზირება) თუ ლაბორატორიულად დადასტურებული დეფიციტი გაქვთ, მხოლოდ მზითა და საკვებით მისი შევსება თითქმის შეუძლებელია — საჭიროა D3 ვიტამინის მიღება.