რა შეიძლება, იყოს სისუსტისა და დაღლილობის მიზეზი და როგორ აღმოვფხვრათ ის

რკინის ერთ-ერთი უმდიდრესი წყაროა ძროხის ღვიძლი. მცირე ულუფაც კი ხელს უწყობს დღიური ნორმის მნიშვნელოვანი ნაწილის მიღებას. ღვიძლი, ასევე, მდიდარია B12 ვიტამინითა და ცილებით. უმჯობესია, ღვიძლი სწრაფად მოხარშოთ, რომ რბილი იყოს. მოშუშეთ ხახვთან ერთად, არაჟანში, გააკეთეთ პაშტეტი ან დაუმატეთ სალათას. ის უხდება წიწიბურას, კარტოფილის პიურესა და ჩაშუშულ ბოსტნეულს. თუ გემო ძალიან ძლიერია, მომზადებამდე 30 წუთით ადრე ნაჭრები რძეში დაალბეთ.

წითელი ხორცი – ძროხისა და ხბოს ხორცი შეიცავს ადვილად შეწოვად რკინას, ამიტომ ისინი ხშირად შედის რაციონში ფერიტინის დაბალი დონის მქონე პირთათვის. ეს არის სადილის ან ვახშმის ნოყიერი ვარიანტი, რომელიც დიდი ხნის განმავლობაში დაგაკმაყოფილებთ. კერძის მომზადებისას, აირჩიეთ ცხობა, ჩაშუშვა ან შეწვა ზედმეტი ზეთის, მით უმეტეს, კარაქის გარეშე. სტეიკები, კატლეტები და ხორცის ბურთულები კარგი ვარიანტებია. ხორცი საუკეთესოა ბოსტნეულთან, სალათასთან, წიწიბურასთან ან ბულგარულ წიწაკასთან ერთად. თუმცა, მისი მხოლოდ მაკარონთან ერთად მირთმევა ნაკლებად სასარგებლო იქნება.

რკინას და ბევრ ცილას შეიცავს ზღვის პროდუქტები – მიდიები, ხამანწკები, კალმარი და კრევეტები. ზოგიერთი სახეობა რკინის შემცველობით ადვილად უწევს კონკურენციას ხორცს. მიდიები შესანიშნავია პომიდვრის სოუსში, სალათებში. უმჯობესია, ზღვის პროდუქტები არ გადახარშოთ, წინააღმდეგ შემთხვევაში გამაგრდება. კარგი შეხამებაა ლიმონის წვენი, მწვანილი, ნიორი და პომიდორი.

როდესაც რკინაზე ვსაუბრობთ, ერთ-ერთი ყველაზე პოპულარულია წიწიბურა. წიწიბურას გარნირი მარტივი მოსამზადებელია და თითქმის ნებისმიერ მენიუს უხდება. წიწიბურა შეგიძლიათ, მიირთვათ ფაფის სახით საუზმეზე, კვერცხთან ერთად, ხორცეულის გარნირად ან ბოსტნეულის სალათის საფუძვლად. მარტივი და გემრიელი სადილისთვის სცადეთ სოკოს, ხახვისა და მწვანილის დამატება.

ოსპი რკინისა და ცილის მცენარეული წყაროა. იდეალურია მათთვის, ვისაც სურს ნაკლები ხორცის ჭამა ან, უბრალოდ, მრავალფეროვნების მოყვარულია. წითელი ოსპი სწრაფად იხარშება და შესანიშნავია კრემ-სუპებისთვის. მწვანე და ყავისფერი ოსპი შესანიშნავია გარნირებისა და სალათებისთვის. შეუხამეთ პომიდორს, ბულგარულ წიწაკას, ისპანახს, ნიორსა და მწვანილებს. ოსპით შეგიძლიათ, გემრიელი კატლეტებიც მოამზადოთ.

ლობიო ხელს უწყობს თქვენი რაციონის რკინით შევსებას და კერძებს უფრო ნოყიერს ხდის. ლობიოს დამატება შეგიძლიათ სუპებში, ბოსტნეულის ჩაშუშულებში, სალათებსა და პაშტეტებში.

ისპანახი – ეს ფოთლოვანი ბოსტნეული შეიცავს რკინას, ფოლატს (B9) და ბოჭკოს. ის მარტივი გზაა ჩვეულებრივი კვების გასაჯანსაღებლად. ისპანახი შესანიშნავია ომლეტებში, სმუზში, მაკარონში, სუპებსა და სალათებში დასამატებლად. ის კარგად ერწყმის კვერცხს, ყველს, პომიდორსა და ავოკადოს. რკინის შეწოვის გასაუმჯობესებლად, დაამატეთ ბულგარული წიწაკა ან მოასხით კერძს ლიმონის წვენი.