ექიმის რჩევები
ავტორი: „თბილისელები“ 16:00 03.11
კითხვა: მაინტერესებს ჯესის შეწყვეტის შემდეგ შესაძლებელია თუ არა გამონაყარი სახეზე ბეჭებსა და გულმკერდზე?
პასუხი: ჯესის შეწყვეტის შემდეგ გამონაყარი შესაძლებელია. მაგრამ ეს არ არის დაკავშირებული პრეპარატთან.
კითხვა: ორსულობის გამო საშოში გამიჩნდა წყლული. მაინტერესებს, მედიკამენტური აბორტის შემდეგ წყლულიც ქრება თუ ცალკე სჭირდება მკურნალობა?
პასუხი: ეროზია (წყლული) არის საშოს ლორწოვანი გარსის დეფექტი, მიზეზი არის მექანიკური გაღიზიანება/ტრავმირება, ასევე, სქესობრივი გზით გადამდები ინფექციები. საჭიროა, დროულად დადგინდეს მიზეზი და ჩატარდეს შესაბამისი მკურნალობა.
კითხვა: ძალიან მაწუხებს მხარის ტკივილი, გადავიღე რენტგენი და აღმომაჩნდა ძვლოვანი წანაზარდი, ოსტეოფიტი. რომელ სპეციალისტს უნდა მივმართოთ, ან მკურნალობის რა ფორმაა საჭირო?
პასუხი: ოსტეოფიტების მკურნალობის ორი გზაა: კონსერვატიული (არასტეროიდული ანთების საწინააღმდეგო და ტკივილგამაყუჩებელი პრეპარატები, ფიზიოთერაპია და ასე შემდეგ) და ქირურგიული – როცა ტკივილის მართვა მედიკამენტებით არ ხერხდება და მოძრაობა იზღუდება. მდგომარეობის ობიექტურად შესაფასებლად და მკურნალობის ტაქტიკის განსაზღვრისთვის მიმართეთ ორთოპედ-ტრავმატოლოგს.
კითხვა: 2 კვირის წინ თვალში ჩოგბურთის ბურთი მომხვდა. დავიდე ცივი, არ დასივდა და ტკივილმა და სიწითლემაც მალევე გამიარა. გავიდა 2 კვირა და ვამჩნევ, რომ მომენტებში ამ თვალში ვხედავ სინათლეს, რომელიც უცებ ჩნდება და იმ წამსვე ქრება. რამდენჯერმე იყო ასეთი მომენტი. რა შეიძლება, იყოს და გაივლის თუ არა თავისით?
პასუხი: აუცილებლად უნდა ეჩვენოთ ოფთალმოლოგს, არ გადადოთ ექიმთან ვიზიტი. შეიძლება ბადურა იყოს დაზიანებული.
სიახლეები ამავე კატეგორიიდან
