რატომ შექმნა ბერიამ რუსული და ჩინური მაფიები ნიუ-იორკში

იაკობ კამენსკი: „საბჭოთა „ჩეკა“ მართალია, ფელიქს ძერჟინსკიმ შექმნა, მაგრამ სწორედ ლავრენტი ბერიამ გადააქცია ის ისეთ მრისხანე ძალად, რომელსაც ფაქტობრივად, ყველაფერი შეეძლო და საბჭოთა პოლიტიკის განსახორციელებელ უმძლავრეს იარაღს წარმოადგენდა. ცოდვა გამხელილი ჯობსო, ნათქვამია და ბერიას მიერ შექმნილ უსაფრთხოების სისტემაში მუშაობდნენ ისეთი ადამიანები, რომლებიც არც თავს ზოგავდნენ ქვეყნისთვის და არც სხვას, მით უმეტეს, მტერს. კადრებს პირადად ბერია არჩევდა და ნიშნავდა. იყო ეს მისივე მოადგილე თუ ბევრად დაბალი რანგის თანამშრომელი. ლავრენტი პავლეს ძე თითოეულ მათგანს პირადად ესაუბრებოდა, კითხვებს უსვამდა, პასუხებს ყურადღებით ისმენდა, ეცნობოდა მათ დოსიეებს და ღრმა ანალიზის შემდეგ იღებდა გადაწყვეტილებას. ამგვარად, 1938 წლის დეკემბერში „ენკავედეს“ შეფად დანიშნულმა ბერიამ 1939 წლის აგვისტოსთვის (სულ რაღაც 8 თვის განმავლობაში) ეს უწყება გადააქცია ერთიან, მონოლითურ სისტემად, რომელიც სტრატეგიულ პოლიტიკურ ამოცანებს წყვეტდა. „წითელ არმიასთან“ ერთად, სწორედ ამან ითამაშა მთავარი როლი ფაშიზმის განადგურებაში. ომის მოგების შემდეგ საბჭოთა უშიშროებას გამოუჩნდა მთავარი და უძლიერესი მტერი დასავლეთის სახით, რომელსაც ამერიკის შეერთებული შტატები ხელმძღვანელობდა. ამერიკას ძალიან დიდი რესურსი ჰქონდა და მან მოკლე დროში, „ცეერუს“ სახით, შეძლო უმძლავრესი სპეცსამსახურის შექმნა, რომელიც სხვა ქვეყნების ანალოგიურ უწყებებთან ერთად, დიდ კონკურენციას უწევდა ბერიას დაქვემდებარებულ სამსახურს. ამიტომ, ახალი გეოპოლიტიკური მდგომარეობის შესანარჩუნებლად ბერიას უწყებამ მთავარი მეტოქის ბანაკში დისონანსის შესატანად ახალი კომბინაცია წამოიწყო.“

გენერალი პავლე სუდოპლატოვი იხსენებდა: „ჰიტლერის განადგურების შემდეგ რომ შეერთებული შტატები გახდებოდა ჩვენი მთავარი მტერი, ამას ბერია ჯერ კიდევ 1943 წელს თეირანის კონფერენციამდე ამბობდა. ბერიამ სტალინს სწორედ მაშინ უთხრა, რომ ამ დაპირისპირებისთვის მზადება უნდა დაეწყოთ და ბელადისგან თანხმობაც მიიღო. ბერიას ღრმა რწმენით, ამერიკის შეერთებულ შტატებში უნდა შექმნილიყო მძლავრი მეხუთე კოლონა, რომელიც ნებისმიერ ბრძანებას შეასრულებდა და საჭიროების შემთხვევაში, ქაოსის გამომწვევი ძალა გახდებოდა. მსგავსი კომბინაცია ბერიამ, ჯერ კიდევ, ომამდე დაიწყო. ანუ ნიუ-იორკში, „ენკავედეს“ საფარქვეშ, რუსული დიასპორა გაძლიერდა, რომლის ავანგარდიც კრიმინალური სტრუქტურა იყო (მოგვიანებით ეს სტრუქტურა „რუსულ მაფიად“ შერაცხეს). ის ძალიან მალე გაძლიერდა და კონკურენციას თვით „კოზა ნოსტრად“ წოდებულ იტალიურ მაფიას უწევდა. ბერიას ჩანაფიქრით, საჭირო იყო ანალოგიური სტრუქტურის შექმნა, რომ მეხუთე კოლონა კიდევ უფრო მეტად გაძლიერებულიყო და იქს დღეს, მოსკოვის ბრძანებით, კარგად დახვეწილი გეგმის შესაბამისად ემოქმედა. ამიტომ, „ენკავედეს“ სადაზვერვო სკოლაში აღზრდილი ჩინელების წყალობით, ნიუ-იორკის ჩინურ კვარტალში ჩინური მაფია ჩამოყალიბდა და მხოლოდ რამდენიმე ადამიანმა იცოდა, რომ ეს სტრუქტურა მოსკოვიდან, ლუბიანკიდან ლავრენტი ბერიას მიერ იმართებოდა. რუსული და ჩინური მაფიები ერთმანეთისგან დამოუკიდებლად მოქმედებდნენ და არ იცოდნენ, რომ ორივე მოსკოვს ემსახურებოდა. თუმცა, ყველაფერი იმგვარად იყო მოწყობილი, რომ ერთმანეთთან დაპირისპირება არ ჰქონდათ. ბერიამ გაითვალისწინა ისიც, რომ ჩინურ მაფიაში შეღწევას შეეცდებოდა, როგორც „ეფბეერი“, ასევე, ჩინური დაზვერვაც. ამიტომ, ბერია ამ მომენტსაც შესანიშნავად იყენებდა და საბჭოთა აგენტებმა კონტრმოქმედებების გამოყენებით შეაღწიეს როგორიც ჩინურ დაზვერვაში, ასევე, „ეფბეერშიც“. იგივე განხორციელდა რუსული მაფიის მიერაც და ბერიას მიერ ეშმაკურად მოფიქრებულმა სქემამ ბერიას სიკვდილის შემდეგაც მრავალი წლის განმავლობაში იმუშავა. გარდა ზემოთქმულისა, მეხუთე კოლონები დაარსდა ყველა მტრულად განწყობილ დასავლურ სახელმწიფოში და თითოეული მათგანი დიდი ეფექტურობით გამოირჩეოდა. სხვათა შორის, ამერიკელებმაც სცადეს, რაღაც მსგავსი ჩვენთვის გაეკეთებინათ, მაგრამ კრახი განიცადეს. ყოველი მათი მოქმედება მყისვე ჩაახშეს და სრულად გაანეიტრალეს. განსაკუთრებულ ინტერესს იწვევდა, ეგრეთ წოდებული, „კავკასიის გათავისუფლების ორგანიზაცია“, რომელზეც „ცეერუ“ დიდ იმედებს ამყარებდა. 1950 წელს საბჭოთა კავშირში შემოაგზავნეს მეფის არმიის ყოფილი ოფიცერი, მეორე მსოფლიო ომის დროს ვლასოვის არმიის ერთ-ერთი ბატალიონის მეთაური, პოლკოვნიკი ტიტე აბაშიძე. მას საბჭოთა ხელისუფლება სძულდა და მზად იყო, ნებისმიერი რამ ჩაედინა, ოღონდ კი საბჭოეთისთვის ზიანი მიეყენებინა. ტიტე აბაშიძეს დავალება ჰქონდა მიღებული, რომ საქართველოს მთიანეთში შეექმნა მძლავრი შეიარაღებული დაჯგუფება, რომელიც მთელ კავკასიაში იმოქმედებდა და ზიანს მიაყენებდა სტრატეგიულ ობიექტებს, მოაწყობდა ტერორისტულ აქტებს ხალხმრავალ ადგილებში, რაც გამოიწვევდა დიდ მსხვერპლს მშვიდობიან მოსახლეობაში. ეს ჩაფიქრებული იყო, ერთი მხრივ, მოსახლეობის დასაშინებლად, მეორე მხრივ კი – საბჭოთა ხელისუფლების დისკრედიტაციისთვის. „ენკავედე“ თავიდანვე კუდზე ეჯდა მოღალატე ქართველს და აცადეს, რომ საწყისი სამუშაოები ჩაეტარებინა. შემდგომ კი მისი ოცდახუთკაციანი რაზმი ზემო ავჭალის ჰიდროელექტროსადგურთან გაანადგურეს. თავად ტიტე აბაშიძე კი „ჩეკისტებს“ სიცოცხლის შენარჩუნების მიზნით ჩაბარდა. თუმცა მოღალატე ქართველს იქვე მოჰკვეთეს თავი.“