რა უნდა გაითვალისწინოთ, რომ რუჯი დიდხანს გაგყვეთ

რუჯის მიღების შემდეგ, განსაკუთრებით უნდა ერიდოთ კანის გამოშრობას, ამიტომ გამოიყენეთ ზეთოვან საფუძველზე დამზადებული საშხაპე გელი.

კანის მოვლის მომდევნო ეტაპია კვება და დატენიანება. ამისთვის შესანიშნავია საბავშვო ზეთი ან გარუჯვის შემდეგ წასასმელი სპეციალური კრემ-ბალზამი. ის ამშვიდებს კანს, თავიდან აგაცილებთ აქერცვლას და დიდხანს შეინარჩუნებთ რუჯს.

დილა-საღამოს წაისვით დამატენიანებელი კრემი. უმჯობესია, ისეთი, რომელიც შეიცავს E ვიტამინს, ჰიალურონის მჟავასა და თერმულ წყალს. გარუჯული კანისთვის, ძალიან სასარგებლოა ავოკადოს ზეთი და გლიცერინი.

სწორად შეარჩიეთ საკვები თუ ხილი. მაგალითად, გარგარის, ატმის, გოგრის, ნესვისა და ქოქოსის ნატურალურ წვენებში შედის ნივთიერებები, რაც დაგეხმარებათ ფერის შენარჩუნებაში. ასევე, ახალგამოწურული სტაფილოს წვენის დალევა დიდი ხნის განმავლობაშიც შეგინარჩუნებთ შოკოლადისფერ სხეულს.

სპეციალური ნიღბები კი, შეგიძლიათ თავადაც დაამზადოთ:

* 1 ცალი სტაფილოს წვენი, 1 კვერცხის გული და 1 სადილის კოვზი ზეითუნის ზეთი აურიეთ ერთმანეთში. წაისვით როგორც სახეზე, ასევე ტანზე და 20 წუთის შემდეგ თბილი წყლით ჩამოიბანეთ. შეგიძლიათ, ეს პროცედურა კვირაში 2-ჯერ ჩაიტაროთ;

* კარგია ყავის ნალექითა და ცოტა ზეითუნის ზეთის ნარევით სახის გაწმენდა მსუბუქი მასაჟით. ეს პროცედურა კანს წმენდს და ოქროსფერ შეფერილობასაც დიდხანს უნარჩუნებს.

თუ გსურთ, რაც შეიძლება, დიდი ხნით შეინარჩუნოთ ნამზეური, მაშინ აუცილებლად უნდა გაითვალისწინოთ ქვემოთ მოყვანილი რჩევები:

* ავტორუჯი იდეალური საშუალებაა მათთვის, ვინც უკვე გაირუჯა. უმჯობესია, ტანის ლოსიონების გამოყენება, რომლის ფერი დროთა განმავლობაში ჯდება. გარუჯულ სხეულზე არანაირი დეფექტი არ გამოჩნდება, თან, ვერც კი შეამჩნევთ, როგორ ჩაანაცვლებს ხელოვნური ნამზეური, ბუნებრივს;

* დაბანისას არ გამოიყენოთ უხეში ღრუბელი. რაც უფრო მშრალია კანი, მით უფრო სწრაფად გადავა ნამზეური, ამიტომ, ტანი დუშგელით დაიბანეთ და არა საპნით;

* მელანინი არის პიგმენტი, რომელიც კანის ფერს განსაზღვრავს. ნამზეური დაგრჩებათ დიდხანს, თუ სწორად იკვებებით. დიდი რაოდენობით მიიღეთ A ვიტამინის შემცველი ხილი, ნიგოზი, ყვითელი და ნარინჯისფერი ბოსტნეული, სტაფილო, ტკბილი წიწაკა, შოკოლადი და კენკრა.