როგორ გახდა პატარა სუპერჯიბგირი საბჭოთა ესტრადის ვარსკვლავი

„გრძელთითება ჯადოქარი“

მურმან სახოკია სამეგრელოს ერთ-ერთი რაიონის მკვიდრი იყო. მან 13 წლის ასაკში დაიწყო ჯიბგირობა, რაშიც ყველა მონაცემი ხელს უწყობდა: ძალიან ელასტიკური, სწრაფი და გრძელი თითები ჰქონდა, რაც შეუმჩნეველი მოქმედების საშუალებას აძლევდა. ამას ემატებოდა ბიჭის სანდომიანი გარეგნობა და არტისტიზმის უშრეტი ნიჭი. მურმანი, ძირითადად, ტრანსპორტში „მოღვაწეობდა“ და ისე ოსტატურად უცარიელებდა ჯიბეებს ფულიან მოქალაქეებს, რომ ეჭვიც კი არავის შეჰქონდა, რომ მათ პატარა ბიჭი „ასუფთავებდა“. მეტიც, სახოკია ზოგჯერ მგზავრის ჯიბიდან მოპარული საფულიდან იღებდა ბანკნოტებს, საფულეს კი უკან აბრუნებდა და ამას ელვისებური სისწრაფით, შეუმჩნევლად აკეთებდა. ამის გამო მურმანს მეგობრებმა „გრძელთითება ჯადოქარი“ შეარქვეს. სახოკია 5 წლის განმავლობაში დაუსჯელად „ჩალიჩობდა“ და, ალბათ, ვერასოდეს დაიჭერდნენ, რომ არა წინასწარ დაგეგმილი ოპერაცია.

ის 18 წლის იყო, როდესაც 17 წლის ბელა კოკაია შეუყვარდა და მამამისს ქალიშვილის ხელი სთხოვა, რაზეც სასტიკი უარი მიიღო. თუმცა, მურმანმა ბელას მამასთან დაიქადნა – ბელას მაინც შევირთავო და წავიდა. ანტონ კოკაიამ დახმარებისთვის მილიციას მიმართა და ოპერებს უთხრა, რომ ჯიბგირი ორი დღის შემდეგ ერთ-ერთ რესტორანში აპირებდა მეგობრის დაბადების დღეზე დასწრებას. ოპერებმა მურმანს თავიანთი თანამშრომელი დაახვედრეს, რომელსაც საფულე ასმანეთიანებით ჰქონდა სავსე და ამგვარად მიიტყუეს. რესტორანი გადაცმული ოპერებით იყო სავსე და როდესაც მურმანმა საფულე ჩვეული ოსტატობით მოიპარა, ის იქვე დააკავეს და 6 წლით აღუკვეთეს თავისუფლება, რაც ჯიბგირობისთვის ძალიან ბევრი იყო.

წითელდიპლომიანი

მურმანი მხოლოდ 3 წელიწადი იჯდა ციხეში და პატიმრობიდან 21 წლის ასაკში გავისუფლდა. ორი დღის მერე კი ის ოთარ ხმალაძემ მოინახულა და ესაუბრა. ოთარი საცირკო-საესტრადო სასწავლებლის პედაგოგი იყო და მურმანის ამბავი თავისი უფროსი ძმისგან შეიტყო, რომელიც მილიციის მაიორი იყო და მას „გრძელითითება ჯადოქრის“ შესახებ მოუყვა. გამოცდილი პედაგოგი მიხვდა, თუ რა განძს ჩაიგდებდა ხელში, თუკი მას სწავლაზე დაითანხმებდა და მოახერხა კიდეც ამის გაკეთება. ციხიდან 3 თვის გამოსული მურმანი საცირკო-საესტრადო სასწავლებელში ჩაირიცხა. ორი წელი ისწავლა და წითელ დიპლომზე დაამთავრა. შემდგომ კი 20 წლის განმავლობაში დიდი წარმატებით გამოდიოდა საბჭოთა ესტრადაზე და მაყურებელს თავისი ტრიუკებით აცვიფრებდა. იმავდროულად, მურმანმა თავისი სიტყვაც შეასრულა და ბელა კოკაია ცოლად მოიყვანა, რომელმაც მას სამი ვაჟი გაუჩინა. სამსახიობო კარიერის განმავლობაში მურმანმა იმდენი ფული იშოვა, რომ თბილისსა და მოსკოვში ბინები შეიძინა. პრესტიჟულ მანქანებს ყოველწლიურად იცვლიდა, საბჭოთა კავშირის დედაქალაქში დასახლდა და ოჯახს არაფერს აკლებდა. ამასობაში, საბჭოთა კავშირი დაიშალა. მთელს პოსტსაბჭოთა სივრცეში ქაოსი დაიწყო. ესტრადა და ფოკუსები აღარავის აინტერესებდა. ადამიანები გადარჩენისთვის იბრძოდნენ. საცირკო-საესტრადო ჟანრი მდარე შოუებმა შეცვალა და სახოკიამ გამოსვლები შეწყვიტა. მურმანს სხვებივით არ უჭირდა, მაგრამ ჭკვიანი კაცი იყო და მიხვდა, რომ თუკი ფულის საშოვნელად რაიმე წყაროს არ იპოვიდა, მის ოჯახსაც დაუდგებოდა კრიზისი. მურმანი ახალ ცხოვრებაზე დაფიქრდა, ახალ გარემოს დააკვირდა და რადგან ხეირიანი სამსახური არ ჩანდა, გადაწყვიტა, თავისი ნიჭი და ცოდნა სათამაშო ინდუსტრიაში გამოეყენებინა. იმ პერიოდში მთელს პოსტსაბჭოთა სივრცეში სოკოებივით მომრავლდა კაზინოები და სამორინეები. სახოკიამ მოსკოვის ერთ-ერთ პატარა კაზინოს მიაშურა და იმის დადგენა დაიწყო, თუ როგორ შეიძლებოდა ამ დაწესებულებაში ფულის შოვნა.

ბანქო – ფულის წყარო

კაზინოში წარმოებული დაკვირვების შედეგად მურმან სახოკია მიხვდა, რომ მისი ნიჭის წყალობით, იქ, ბანქოს თამაშის დროს, საკმაოდ მსუყე თანხების შოვნა შეიძლებოდა. კონკრეტულად კი, ეგრეთ წოდებულ, „პოკერში“. მაგიდასთან კარტის დამრიგებლის წინ ზიხარ. ის გირიგებს კარტს შენი სურვილისამებრ და თავისთვისაც ირიგებს მას მერე, როცა შენ კარტი აღარ გინდა. შემდგომ, ორივე ხსნით კარტს და ვისაც მაღალი „მასტის“ კარტი აღმოაჩნდება, მოგებული ისაა. მურმანს კაზინოში ფულის შოვნის გზაზე ერთი დაბრკოლება შეხვდა. ყოველ კაზინოს თავისი ლოგოთი დაბეჭდილი, სპეციალური კარტი აქვს და მან ეს ამოცანაც წარმატებით გადაჭრა. კაზინოს ერთ-ერთ თანამშრომელს ათასი დოლარი გადაუხადა და კაზინოს კარტების 10 ახალი დასტა მოაპარინა. შემდგომ სახოკია სწორედ ამ კარტებით დადიოდა კაზინოში. ბანქოს ოსტასტურად მალავდა სმოკინგის სახელოში. თამაშობდა „პოკერს“ და თავისი ოსტატობის წყალობით, ელვისებურად ჩაანაცვლებდა დარიგებულ ბანქოს დამალული ბანქოთი და მოგებული რჩებოდა. მურმანი ზოგჯერ აგებდა კიდეც, რომ არ დაკვირვებოდნენ და შულერობაში არ გამოეჭირათ. სახოკიამ სხვა კაზინოების კარტებიც შეიძინა, კაზინოებში მონაცვლეობით დადიოდა და დიდ ფულს იგებდა. მით უმეტეს, რომ თავდაპირველად პატარა კაზინოებში ვიდეოთვალები არ იყო დამონტაჟებული. მურმან სახოკია მოსკოვის პატარა კაზინოებს 10 თვის განმავლობაში „პარსავდა“ და მან ამ გზით 500 ათასი დოლარი იშოვა. ოჯახი კანადაში გადაიყვანა, მერე კი თავადაც შეუერთდა მათ. დღესდღეობით სახოკიები ტორონტოში ცხოვრობენ“.