თუ რომელიმე ქვას ერთი ადამიანისთვის ბედნიერება მოაქვს, მეორისთვის უბედურების მომტანია

ნებისმიერ ჩვენგანს შეუძლია, თილისმად აირჩიოს ძვირფასი ლითონის ან ასტროლოგიური ქვისგან დამზადებული სამკაული. თუმცა, უნდა გაითვალისწინოთ, რომ ნებისმიერ საგანს და მით უმეტეს, ქვას, მეხსიერების უნარი აქვს. ამიტომ, ის ჰარმონიაში უნდა იყოს ადამიანთან, რადგან, თუ რომელიმე ქვას ერთი ადამიანისთვის ბედნიერება მოაქვს, მეორისთვის უბედურების მომტანია. და, ეს კი ყველამ უნდა გაითვალისწინოს. ცნობილია, რომ ასტროლოგიაში ნებისმიერი ლითონი თუ ქვა კონკრეტული ზოდიაქოს ნიშნის ქვეშ დაბადებულ ადამიანს და კვირის კონკრეტულ დღეს შეესაბამება.

გაეცანით კვირის რომელ დღეს რომელი ასტროლოგიური ქვა და ლითონი შეესაბამება და რომელი მათგანის ტარება მოგიტანთ წარმატებასა და სიკეთეს და თილისმა ისე შეარჩიეთ.

ორშაბათი

ორშაბათს მთვარის ენერგია შეესაბამება, ამიტომ გირჩევთ, ატაროთ ვერცხლის სამკაულები. ამ დღეს ბედნიერებისა და წარმატების მომტანია ასევე, უფერო, გამჭვირვალე ქვები, ასევე, ლურჯი და ცისფერი ასტროლოგიური ქვებისგან დამზადებული სამკაულები. უმჯობესია, ქალბატონებმა ატარონ საფირონის თვლიანი ბეჭედი.

სამშაბათი

სამშაბათს განაგებს პლანეტა მარსი. ამ დღეს კარგია ფოლადის სამკაულების ტარება. ასტროლოგიური ქვებიდან კი, უპირატესობა ოპალს და იასპს მიანიჭეთ.

ოთხშაბათი

ოთხშაბათის თილისმად მოიაზრება ხისგან დამზადებული სამკაულები და მარჯნის ასტროლოგიური ქვა. ამ დღეს განაგებს მერკური. გირჩევთ, ასევე ატაროთ, მუქი ფერის, მაგალითად, ნაცრისფერი ქალცედონი, მწვანე ძოწი, სარდონიქსი. ეს მოგიტანთ წარმატებას და ჯანმრთელობაზეც დადებით ზეგავლენას მოახდენს.

ხუთშაბათი

ხუთშაბათს მფარველობს პლანეტა იუპიტერი. ამ დღეს უნდა ატაროთ ტყვიისგან დამზადებული სამკაულები. უკეთესია, თუ ისინი თვალშისაცემად გამორჩეული ფორმის იქნება. ძვირფასი ასტროლოგიური ქვებიდან კი ატარეთ – ტოპაზი ან ამეთვისტო.

პარასკევი

პარასკევს პლანეტა ვენერა მფარველობს და ამ დღის თილისმაა სპილენძის სამკაულები. ასტროლოგიური ქვებიდან კი წარმატებებს გპირდებათ ქრიზოლითი, აქატი, ნებისმიერი მწვანე ან ღია ფერის ქვა.

შაბათი

შაბათს მფარველობს პლანეტა სატურნი. ამიტომ, ამ დღეს კარგია კალისგან დამზადებული სამკაულების ტარება. ეს ლითონი ამ დღის თილისმაა და ადამიანებს წარმატებების მიღწევასა და ბარიერთა ადვილად გადალახვაში ეხმარება. ასტროლოგიური ქვებიდან კი, გირჩევთ, ატაროთ მწვანე ქრიზოპრაზი ან იაგუნდი. ეს ქვები შაბათს დაგიცავთ ცუდი სიტუაციებისგან და ნერვულ სისტემაზეც დადებით ზეგავლენას მოახდენს.

კვირა

კვირა დღის მფარველი პლანეტა მზეა, ლითონებიდან კი ამ დღის თილისმა ოქროა. სხვათა შორის, ამ დღეს ოქროს სამკაულების ტარება გამოკვეთს ადამიანის ინდივიდუალურობასა და შარმს, ხელს უწყობს გარშემო მყოფების კეთილგანწყობის მოპოვებას. ასტროლოგიური ქვებიდან კი კვირა დღეს თილისმად უნდა ატაროთ წითელი, ყვითელი ან ფორთოხლისფერი ქვებისგან დამზადებული სამკაულები. მაგალითად, ლალი ან ქარვა.

ადამიანმა რომ კვირის კონკრეტულ დღეს თავი დაცულად, წარმატებულად და მშვიდად იგრძნოს, აუცილებელია, ზემოთ თქმული გაითვალისწინოს, სწორად შეარჩიოს ასტროლოგიური კუთხით მისთვის საჭირო ლითონი თუ ქვა და ამით ცხოვრებაში უსიამოვნებებსა და პრობლემებს ადვილად აიცილებს თავიდან.