რატომ არის მნიშვნელოვანი საკუთარი კარმული თარიღის ცოდნა და რა შემთხვევაში იწყებს ადამიანი ჰარმონიულ სვლას იმასთან ერთად, რისთვისაც ამქვეყნად მოვიდა

- დაბადების თარიღები სხვადასხვანაირია: „ჩვეულებრივი“ და კარმული, რომელიც მიუთითებს, რომ ადამიანი ამ ცხოვრებაში მოვიდა დაუმთავრებელი გაკვეთილის დასასრულებლად, ტესტის ჩასაბარებლად ან წარსულ ცხოვრებაში დაშვებული შეცდომის გამოსასწორებლად. ასეთები ხშირად ამბობენ: „ყველაფერი რატომ მირთულდება?“ „რატომ მეორდება სიტუაციები?“ „რატომ ვგრძნობ, რომ ამის გადატანა მომიწევს?“ პასუხი მარტივია: თქვენი სული ამქვეყნად მოვიდა არა მხოლოდ საცხოვრებლად, არამედ იმისთვის, რომ განიკურნოს, დაწყებული საქმე დაასრულოს და განვითარდეს.

- როგორ უნდა მივხვდეთ, წინა ცხოვრებიდან რა საქმე გადმოგვყვა დასამთავრებელი, ან რა - გამოსასწორებელი?

- ამაში ნუმეროლოგია დაგვეხმარება, რომელიც განასხვავებს კარმული თარიღების რამდენიმე ჯგუფს. პირველი მოიცავს ძირითად კარმულ რიცხვებს: 13, 14, 16, 19 - ყველაზე ძლიერსა და ყველაზე ამოსაცნობ კარმულ ვიბრაციებს. თუ მათგან ერთ-ერთში მაინც დაიბადეთ, თქვენ განსაკუთრებული ბედი გერგოთ. დავიწყოთ 13-ით - შრომისა და დისციპლინის კარმაა და ასეთი ადამიანის წარსულ ცხოვრებაში იყო ქაოსი: სიზარმაცე, უდისციპლინობა, საქმის ბოლომდე მიუყვანლობა, ანუ, შექმნის ნაცვლად - განადგურება. ამ ცხოვრებაში კი მოუწევს: ბევრი შრომა, წესრიგის აღდგენა, მოთმინების გამოცდა, სისტემური აზროვნება. კარმის არსია: გამანადგურებლიდან შემოქმედამდე. 14 — თავისუფლებისა და სიმწიფის კარმაა და ამ ნიშნით დაბადებული წარსულ ცხოვრებას ბოროტად იყენებდა: იყო დამოკიდებული დამღუპველ სიამოვნებებზე და ახასიათებდა იმპულსურობა. ამ ცხოვრებაში კი უნდა გაიაროს: პასუხისმგებლობის გაკვეთილები, შეინარჩუნოს ბალანსი, აკონტროლოს სურვილები და სწორად შეაფასოს მინიჭებული თავისუფლება. კარმის არსია: თავისუფლება ნგრევის გარეშე. 16 — სულიერი გამოღვიძების კარმაა. ამ ნიშნით დაბადებულმა წარსულში სიამაყის, ეგოს, საკუთარი განსაკუთრებულობის რწმენით იცხოვრა - შეეძლო ენერგიისა თუ ძალაუფლების ბოროტად გამოყენება. ამ ცხოვრებაში კი მოუწევს: ბედის ქარტეხილების, მძიმე კრიზისების გადატანა, ელის ილუზიების დამსხვრევა და სულიერი გამოღვიძება. კარმის არსია: ეგოს დათრგუნვა და სულიერი გახსნილობა. 19 — ძალისა და დამოუკიდებლობის კარმაა და ამ რიცხვში დაბადებული წარსულ ცხოვრებაში სხვებს თრგუნავდა ან მათზე იყო დამოკიდებული. დარღვეული იყო ბალანსი ძალაუფლებასა და პირად პასუხისმგებლობას შორის. ამ ცხოვრებაში კი მან: ძალაუფლების, პატივისცემისა და დამოუკიდებლობის გამოცდები უნდა ჩააბაროს; გაიაროს გაკვეთილი, როგორ გახდეს ლიდერი დიქტატურის გარეშე; დაამყაროს თანასწორი ურთიერთობები. კარმის არსია: ჩამოყალიბებული, პატიოსანი ძალა.

- სულ ექვსი ჯგუფია?

- დიახ. მათგან მეორე ჯგუფია - კარმული თარიღები ვიბრაციით 7, რომელიც აერთიანებს - 7-ს, 16-ს და 25-ს. ესენი უძველესი სულის თარიღებია და ახლავს: სიბრძნე წარსული ინკარნაციებიდან, სიღრმისეული გაკვეთილები, კავშირი ინტუიციასთან, კარმული გამეორებები, მარტოობის სირთულეები. ამ ჯგუფის გზაა: ჭეშმარიტების ძიება და საკუთარი შინაგანი სამყაროს ამოხსნა. მესამე ჯგუფი - ციკლების დამასრულებელი კარმული თარიღები: 9, 18, 27 - ეს ადამიანები მოდიან საგვარეულო პროგრამის ან ძველი კარმის დასასრულებლად. მათი ამოცანებია: წარსულისგან გათავისუფლება, ოჯახური სცენარის დარღვევა, საგვარეულო ისტორიების გაწმენდა, სხვების დახმარება და მიტევება. მათი ცხოვრება სულიერი გზაა. მეოთხე ჯგუფის კარმული თარიღებია 13 და 31 - ეს ადამიანები ატარებენ ხელახალი დაბადების ძლიერ ენერგიას. მათი დავალებებია: საკუთარი თავის ტრანსფორმაცია, სივრცის შეცვლა, სხვა ადამიანების დაუმთავრებელი პროგრამების დასრულება, ძლიერი, გარდამტეხი მომენტების განცდა. ისინი ცვლილებების აგენტები არიან. მეხუთე ჯგუფი: მთვარის კარმული თარიღები - სავსე მთვარეზე ან ახალმთვარეობაზე დაბადებულებს მოიცავს. სავსე მთვარის დღეებში დაბადებულებს აქვთ გაძლიერებული პროგრამა: ინტუიცია, ემოციური სიღრმე, წინათგრძნობა, მგრძნობელობა ენერგიების მიმართ, კარმული ურთიერთობები. მათი ცხოვრება აშკარად უკავშირდება სულის წარსულ გამოცდილებას. მეექვსე ჯგუფშია კარმული მსახურების თარიღები: 6, 15, 24 - ამ ადამიანებს სდევთ ემოციური და საგვარეულო კარმა. უნდა გაიარონ სიყვარულის, ჰარმონიის, სხვების დახმარების, თანაგრძნობის გაკვეთილები, თან, სხვებზე ზრუნვისას, არც საკუთარი თავი დაივიწყონ. მათი მისიაა სიყვარულით განკურნება.

- კარმული დაბადების აბსოლუტური თარიღები რაღაც ნიშნავს?

- თუ ამ თარიღებიდან ერთ-ერთში დაიბადეთ, თქვენი სული განსაკუთრებული დავალებებით მოვიდა ამქვეყნად. დააკვირდით რიცხვებს: 13, 14, 16, 19 — ძლიერი კარმა; 7, 9, 18, 25, 27 — სიბრძნის კარმა; 31 — ტრანსფორმაციის კარმა; 6, 15, 24 — სიყვარულის კარმა; სავსემთვარეობის / ახალი მთვარის დაბადების თარიღები ინტუიციის და ემოციების კარმაა - ეს ადამიანები სწვდებიან ცხოვრებისეულ სიღრმეებს, გადიან რთულ გაკვეთილებს, მაგრამ განიცდიან ძლიერ სულიერ ზრდას. რატომ არის მნიშვნელოვანი საკუთარი კარმული თარიღის ცოდნა? - იმიტომ რომ, როცა ადამიანს ესმის: რა გაკვეთილი უნდა ისწავლოს, რატომ ვითარდება ცხოვრება ისე, როგორიც არის და რა უნდა შეიცვალოს — გასავლელი გზის დაძლევა უფრო უადვილდება. ის წყვეტს ბედისწერასთან ჭიდილს და იწყებს ჰარმონიულ სვლას იმასთან ერთად, რისთვისაც ამქვეყნად მოვიდა.