რა მინიშნებებს ვიღებთ სიზმრის საშუალებით და როგორ შეიძლება მოსალოდნელი საფრთხეებისა თუ გარე გავლენების თავიდან აცილება

- სიზმრები არა მხოლოდ ჩვენი აზრებისა და გამოცდილების ანარეკლია, არამედ ფანჯარაა ნატიფ სამყაროში. სიზმარში შეიძლება მიიღოთ მინიშნებები, რაც შეიცავს ინფორმაციას თქვენი მდგომარეობის, მოსალოდნელი საფრთხეებისა თუ გარე გავლენების შესახებ და ეს განსაკუთრებით ეხება ჯადოს. აქედან გამომდინარე, კარგი იქნება, იცოდეთ, რა შეიძლება დაგესიზმროთ უცხო გავლენის ქვეშ მყოფს და რას ნიშნავს მასში ასახული ესა თუ ის მოვლენა ან ქმედება. გახსოვდეთ, სიზმრები უდიდეს როლს თამაშობს ჩვენს ცხოვრებაში.

- საინტერესოა, რა ესიზმრება ჯადოს ზემოქმედების ქვეშ მყოფ ადამიანს?

- ჯადოს ზემოქმედების თანმხლები პროცესია მძიმე, შემაშფოთებელი სიზმრები, რომლებშიც ყველაზე ხშირად ადამიანი ხედავს: 1. სასაფლაოს, საფლავებს, დაკრძალვას - ასეთი სიზმრები განსაკუთრებით დამახასიათებელია სასიკვდილო ჯადოს ან სერიოზული დაავადებების დროს, რაც სიგნალია იმისა, რომ ვერაგი პროგრამა უკვე მოქმედებს; 2. ეს არის დაცემა, როცა გესიზმრებათ, რომ უფსკრულში ვარდებით ან თავს ვერ იკავებთ - ჯადო ამ დროს გამიზნულია თქვენი განადგურების ან გაღარიბებისთვის; 3. ჭუჭყიანი, ჭაობიანი ადგილი - ჭუჭყი სიმბოლურად გამოხატავს დაბნეულობას, პრობლემებს, რაც მიუთითებს, რომ თქვენი ცხოვრება არეულ-დარეულია; 4. დევნა - სიზმარში თუ ვინმე გდევნით, ეს ჯადოს გავლენის ან თქვენზე კონტროლის დაწესების მანიშნებელია; 5. ახლობელ ადამიანთა ან ქონების დაკარგვა - გაფრთხილებაა იმისა, რომ თქვენს ცხოვრებაში გარე გავლენებით გამოწვეული დანაკარგების სერია დადგა; 6. შიშის გრძნობა - მაშინაც კი, თუ სიზმრის სიუჟეტი არ არის საშიში, მაგრამ თქვენ მაინც რაღაც გზარავთ, ეს შეიძლება იყოს ჯადოს ნიშანი.

- თუ შეიძლება, სიზმრით ადამიანმა მიიღოს შეტყობინება, რომ ვინმემ მიზანში ამოიღო, აკვირდება და უკვე ჯადოსაც უმზადებს?

- თუ თქვენი მოჯადოების მსურველი გითვალთვალებთ, დიაგნოზის დასმის ან თქვენს სულზე მკითხაობის პროცესი მიმდინარეობს, სიზმრის სიუჟეტი შეიძლება იყოს შემდეგნაირი: 1. უცხო სახეები - თუ სიზმარში ხედავთ, რომ ვიღაც უცნობები გითვალთვალებენ, ეს შეიძლება მართლაც იყოს ჯადოს მზადების სიგნალი; 2. განმეორებადი სიზმრები - თუ ერთი და იგივე ადგილი ან სიტუაცია გესიზმრებათ, ეს შეიძლება იყოს სიგნალი, რომ თქვენს ენერგეტიკულ ველში შემოღწევას ცდილობენ; 3. თქვენი ფოტო ან ნივთები - თუ სიზმარში ფოტოს, ტანსაცმელს ან სხვა პირად ნივთებს ხედავთ, ეს შეიძლება მაგიურ რიტუალს უკავშირდებოდეს, რისთვისაც თქვენი ატრიბუტები გამოიყენება; 4. თვალთვალი - თუ სიზმარში ვიღაც გაკვირდებათ, ან არავინ ჩანს, მაგრამ მაინც იმავეს გრძნობთ, ეს პირდაპირი ნიშანია იმისა, რომ ვიღაც ნატიფ დონეზე გიკვლევთ; 5. სარკე - სიზმარში სარკე მაგიური ჩარევის სიმბოლოა და თუ თქვენი ანარეკლი უცნაურად იქცევა ან სარკე ტყდება, ეს მანიშნებელია, რომ მტერი თქვენზე გავლენის მოხდენას ცდილობს.

- რა შეიძლება იყოს გაღვიძებისას იმის მანიშნებელი, რომ სიზმარი მაგიურია?

- თუ საგანგაშო ხასიათის სიზმრები რეგულარულად მეორდება, ეს ყურადღების მიქცევის მკაფიო სიგნალია. ასევე, სიმძიმის შეგრძნება - როცა გაღვიძებისას თავს ისე გრძნობთ, თითქოს მთელ ტანში გამტვრევთ, დაღლილი და გამოუძინებელი ხართ. სიზმარი მოქმედებს ემოციებზე - იწვევს შიშს, შფოთვას. სიზმრები შეიძლება არა მხოლოდ განმეორდეს, არამედ გამოიწვიოს განცდა, რომ რაღაც ნახევრად ბუნდოვანების მდგომარეობაში ხართ. ეს არ არის კოშმარი, მაგრამ რამდენჯერაც ასეთ სიზმარს ნახავთ, შფოთვას და შინაგან დისკომფორტს განიცდით. თითქოს საშინელი არაფერი ხდება, მაგრამ ინტუიციით ხვდებით, რომ ეს არ არის ჩვეულებრივი სიზმარი. ამ მდგომარეობას თან ახლავს შფოთვა და ისეთი შეგრძნება, რომ ვიღაც თქვენს სივრცეში შემოღწევას ცდილობს. კიდევ ერთ მაჩვენებელზე გავამახვილებ ყურადღებას: თითქოს ამ სიზმრებმა პირდაპირ შეგიპყროთ და „ხელს აღარ გიშვებთ“; გრძნობთ, რომ ზღვრზე ხართ რეალობასა და ქვეცნობიერს შორის და ამ დროს ვიღაც ან რაღაც მნიშვნელოვანი გზავნილის გადმოცემას ცდილობს.

- რა შეიძლება, ამ ყველაფრის მიზეზი იყოს?

- რა თქმა უნდა, მაგიური გავლენის მცდელობები. ვიღაც თვალყურს გადევნებთ, ან რიტუალების გამოყენებით ცდილობს, გავლენა მოახდინოს თქვენს ცხოვრებაზე. არის ვარიანტიც, რომ ეს გაფრთხილებაა გარდაცვლილი ნათესავების მხრიდან. ზოგჯერ ასე თქვენი უახლოესი, საყვარელი ადამიანები იქცევიან და იმ ქვეყნიდან სიზმრების საშუალებით გიგზავნიან გამაფრთხილებელ მინიშნებებს, რათა გარკვეულ მოვლენებს ყურადღება მიაპყროთ. ეს სიზმრები შემთხვევითი არ არის, განსაკუთრებით, თუ თან ახლავს განცდა, თითქოს თქვენს ცხოვრებაში ყველაფერი წესრიგშია, მაგრამ რაღაც მაინც ცნობიერების მიღმა რჩება. მიენდეთ თქვენს ინტუიციას - ის იშვიათად ცდება.

- რა უნდა გავაკეთოთ, თუ ასეთ სიზმრებს ვხედავთ?

- უნდა ჩაიტაროთ დიაგნოსტიკა მაგიური ზემოქმედების არსებობაზე. ეს დაგეხმარებათ, გაიგოთ: ჯადოა, თუ ვინმე, უბრალოდ, თქვენთვის თვალყურის დევნებას ცდილობს. თუ გაირკვევა, რომ ეს ჯადო, ანუ თქვენზე მომართული დამანგრეველი ძალა არ არის, შეგიძლიათ, ცალკე, სხვა დიაგნოსტიკაც ჩაიტაროთ, რომელიც დაგეხმარებათ სიზმრებში ასახული მინიშნებების გაშიფვრაში.