როგორ ვუმკურნალოთ მუცლის შებერილობას

მკურნალობისა და პრევენციის ძირითადი მეთოდები

1. კვების რეჟიმის მოწესრიგება

* მიირთვით ნელა და დაღეჭეთ კარგად: როდესაც სწრაფად ვჭამთ ან ვსვამთ, დიდი რაოდენობით ჰაერს ვყლაპავთ, რაც აირების დაგროვებას იწვევს;

* მოერიდეთ გაზიან სასმელებს: გაზიანი სასმელები შეიცავს ნახშირორჟანგს, რომელიც პირდაპირ კუჭ-ნაწლავში ხვდება;

* შეზღუდეთ პროდუქტები, რომლებიც აირებს წარმოქმნის: ასეთებია: პარკოსნები (ლობიო, ოსპი), კომბოსტო, ბროკოლი, კარტოფილი, ტკბილეული და ცომეული;

* დააკვირდით ინდივიდუალურ აუტანლობას: ზოგიერთ ადამიანს აქვს ლაქტოზის (რძის შაქარი) ან გლუტენის (ხორბლეული) აუტანლობა, რამაც შეიძლება გამოიწვიოს შებერილობა.

2. ცხოვრების წესის ცვლილება

* იმოძრავეთ: ფიზიკური აქტივობა, თუნდაც მსუბუქი სეირნობა, ხელს უწყობს ნაწლავების მოძრაობას და აირების გამოყოფას;

* მოერიდეთ სტრესს: ემოციურმა სტრესმა შეიძლება გავლენა მოახდინოს საჭმლის მომნელებელ სისტემაზე და გამოიწვიოს მეტეორიზმი;

* დაანებეთ თავი სიგარეტს და საღეჭ რეზინს.

როდის უნდა მიმართოთ ექიმს

უმეტესად, მუცლის შებერილობა უწყინარი მდგომარეობაა, რომელიც რამდენიმე საათში ან დღეში ქრება. თუმცა, აუცილებელია ექიმთან კონსულტაცია, თუ მას თან ახლავს შემდეგი სიმპტომები:

* მუცლის ძლიერი ტკივილი;

* გულისრევა და ღებინება;

* წონაში აუხსნელი კლება;

* სისხლი განავალში.

ეს სიმპტომები შეიძლება მიუთითებდეს საჭმლის მომნელებელი სისტემის უფრო სერიოზულ დაავადებაზე, როგორიცაა გაღიზიანებული ნაწლავის სინდრომი, დისბაქტერიოზი ან სხვა პათოლოგიები.

მუცლის შებერილობის სამკურნალოდ ხალხურ მედიცინაში არაერთი მარტივი და ეფექტური რეცეპტი არსებობს. ეს მეთოდები ხელს უწყობს აირების გამოდევნას და საჭმლის მონელების პროცესის მოწესრიგებას.

ხალხური რეცეპტები მუცლის შებერილობისთვის

კამის ჩაი – კამა ერთ-ერთი ყველაზე ცნობილი საშუალებაა მეტეორიზმის სამკურნალოდ. ის ამშვიდებს ნაწლავის კუნთებს და ხელს უწყობს აირების გამოყოფას,

მომზადება: 1 ჩაის კოვზ კამის თესლს დაასხით 1 ჭიქა მდუღარე წყალი. დააყენეთ 10-15 წუთის განმავლობაში, შემდეგ გადაწურეთ. დალიეთ ჭამის შემდეგ, დღეში 2-3-ჯერ.

ჯანჯაფილის ნაყენი – ჯანჯაფილი შეიცავს აქტიურ ნივთიერებებს (ჯინჯეროლს), რომლებიც აუმჯობესებენ საჭმლის მონელებას და ამცირებენ ნაწლავებში გაზების დაგროვებას.

მომზადება: ახალი ჯანჯაფილი დაჭერით 1-2 სანტიმეტრის ზომის ნაჭრებად. დაასხით 1 ჭიქა მდუღარე წყალი და გააჩერეთ 10 წუთი. სურვილის შემთხვევაში, შეგიძლიათ, დაამატოთ ლიმონის ნაჭერი ან ცოტა თაფლი. დალიეთ ჭამამდე 20 წუთით ადრე.