ექიმის რჩევები

პასუხი: ექიმთან ვიზიტის გარეშე ჰორმონული კონტრაცეპტივების მიღება დაუშვებელია, რადგან არასწორად შერჩეულმა პრეპარატმა შეიძლება, სერიოზული გართულებები, მათ შორის თრომბოზი ან ციკლის მძიმე დარღვევა გამოიწვიოს. თუ გსურთ ისეთი მეთოდი, რომელიც ჰორმონულ ცვლილებებსა და წონაში მატებას საერთოდ არ იწვევს, საუკეთესო გამოსავალი პრეზერვატივის გამოყენება ან არაჰორმონული სპილენძის სპირალია, რომელსაც ექიმი მხოლოდ გამოკვლევის შემდეგ დგამს.

კითხვა: ფეხმძიმობის დროს ბავშვის მოძრაობას რომ გრძნობ, ასეთი შეგრძნებები მაქვს. მაინტერესებს, შეიძლება ეს ნაწლავების შებერილობის გამო იყოს? ზოგადად, მაწუხებს შებერილობა.

პასუხი: სავსებით შესაძლებელია, რომ მუცლის ქვედა ნაწილში ამგვარ შეგრძნებებს, სწორედ, ნაწლავებში დაგროვილი აირების გადაადგილება ან პერისტალტიკა (ნაწლავების კუნთების შეკუმშვა) იწვევდეს. ვინაიდან ნაწლავები მუცლის ღრუს დიდ ნაწილს იკავებს და მათი მარყუჟები მცირე მენჯის ღრუმდე ჩადის, შებერილობა ხშირად იწვევს „ბუშტუკების“ ან მსუბუქი მოძრაობის მსგავს შეგრძნებას ზუსტად იმ არეში, სადაც თქვენ აღწერთ. თუმცა, თუ ეს შეგრძნება სისტემატურია, დიდ დისკომფორტს გიქმნით ან თან ახლავს ტკივილი, აუცილებელია მიმართოთ ექიმს – გასტროენტეროლოგს, რათა ზუსტად დადგინდეს შებერილობის მიზეზი და გამოირიცხოს სხვა სამედიცინო საკითხები.

კითხვა: ტანტუმ ვერდე გამოიყენება თუ არა ყელის სოკოს საწინააღმდეგოდ ან მის სამკურნალოდ, ასევე ფაგიო სპრეი?

პასუხი: ტანტუმ ვერდე სოკოს საწინააღმდეგო პრეპარატი არ არის – ის ამცირებს ტკივილსა და ანთებას, მაგრამ ყელის სოკოს არ კურნავს. ფაგიო სპრეი შეიძლება, გამოიყენოთ დამხმარედ, თუმცა სოკოზე პირდაპირი მოქმედება არ აქვს. ყელის სოკოს სამკურნალოდ საჭიროა ანტიფუნგალური პრეპარატი.

რუბრიკას უძღვება ოჯახის ექიმი

მაია ნუცუბიძე