რა შედეგი მოჰყვება ადამიანის კონკრეტულ ქცევას სამყაროსგან

გახსოვდეთ, რომ ბინის ინტერიერის სწორად შერჩევა თქვენი ბედის, ფინანსური კეთილდღეობისა და კარიერული წინსვლის საწინდარია. თუ ოჯახში სრული ჰარმონიის, ბარაქისა და იდილიის შექმნა გსურთ, სახლს მეტი ყურადღება მიაქციეთ. უიღბლობას, ცუდ განწყობასა და უფულობას ადვილად დააღწევთ თავს, თუ ასტროლოგიაში აპრობირებულ, საკმაოდ მარტივ რჩევებს გაითვალისწინებთ და საკუთარ თავს დააძალებთ, იყოთ მომთმენი. ასე კი სწორი არჩევანის გაკეთებას შეძლებთ. საკუთარი ძალებითვე მოახერხებთ, მატერიალური დოვლათის მოზიდვას, ბინაში იდილიის შექმნასა და ოჯახში კეთილდღეობის დამკვიდრებას.

ყველა ჩვენგანმა ისე უნდა მოაწყოს საცხოვრებელი ბინა, რომ თავი ენერგიულად, დაცულად და კომფორტულად იგრძნოს. თუ ადამიანის ემოციები და გუნება-განწყობა უარყოფითი ენერგიებით არის დამუხტული, ამას სახლიც გრძნობს და შესაბამისად რეაგირებს. ამიტომ, ცუდი განწყობა და უგუნებობა სახლის კარს იქით დატოვეთ და სახლში ხალისითა და ღიმილით შეაბიჯეთ.

👉დაძინებამდე ბინაში ყველაფერი მოაწესრიგეთ და იმ ფიქრით დაწექით მშვიდად, რომ ხვალინდელი დღე უფრო იღბლიანი და წარმატებული იქნება, ვიდრე გუშინდელი იყო. სამყაროში თითოეულ კონკრეტულ ქცევას თავისი შედეგი მოჰყვება და აუცილებელია, ეს ყველამ კარგად გავაცნობიეროთ;

👉 ბინაში არსებობს ზონები, რომლებიც ფინანსებზეა პასუხისმგებელი. ამიტომ, ეცადეთ, სახლში მისაღები ოთახის დასავლეთ მხარეს არ დადგათ ტექნიკა და კედელზე არ ჩამოჰკიდოთ სარკე. ამან უბარაქობა იცის, მაგრამ თუ ამ ადგილას დადგამთ ვაზას, ჩააწყობთ ყვავილებს და ჩაყრით ხურდა ფულს, აუცილებლად მოიმატებს ფინანსური წყარო და შემოსავლებიც გაიზრდება. ოღონდ, ეს ფული, წლიდან წლამდე არ უნდა დახარჯოთ და დროდადრო უნდა ჩაამატოთ კიდეც;

👉კარგი იქნება, თუ მისაღები ოთახის აღმოსავლეთ მხარეს დადგამთ დივანს, სკამსა და მაგიდას. ეს ხელს შეუწყობს ახალ კონტაქტებს და წარმატებულ ნაცნობობას, რომელიც საქმეში დაგეხმარებათ, ასევე, უზრუნველყოფს პარტნიორების მოზიდვას საქმეში;

👉არ არის აუცილებელი სახლის ძვირად ღირებული ნივთებითა და ავეჯით გადატვირთვა, მთავარია, იცოდეთ, რა სად დადგათ. მაგალითად, ტანსაცმლის კარადა აღმოსავლეთით დადგით, ხოლო საწოლი – ჩრდილო-აღმოსავლეთით, რომ მშვიდი ძილი და სასიყვარულო პარტნიორთან კარგი დამოკიდებულება გარანტირებული გქონდეთ. არ არის სასურველი, პირადი ჰიგიენის საშუალებები უცხო პირმა დაინახოს. ეს თქვენსავე ჯანმრთელობაზე იმოქმედებს უარყოფითად. გირჩევთ, აბაზანაში პატარა კარადა ჩამოკიდოთ და იქ შეინახოთ, რომ ცხოვრების თანამგზავრთან პრობლემა არ შეგექმნათ.

ზოგადად, კარმული აღმავლობის დროს ადამიანი ადვილად აღწევს წარმატებებს, არ ექმნება პრობლემები და წინაღობები, ცხოვრება მშვიდად და ჰარმონიულად მიდის, მაგრამ, როგორც კი კარმული ჩავარდნების პერიოდი დაიწყება, ის უბარაქობის მსხვერპლი ხდება. ეს შესაძლოა, წლებიც კი გაგრძელდეს, მაგრამ ამას ისევ მოსდევს აღმასვლა და ამიტომ, დეპრესიაში არ უნდა ჩავარდეთ. აღმართს დაღმართი მოჰყვება და დაღმართს – აღმართი და სწორედ ეს პრინციპი მოქმედებს ადამიანის კარმაზეც. ამას ვერავინ ასცდება. უბრალოდ, კარმული დაღმასვლის პერიოდში მეტი ყურადღება უნდა გამოიჩინოთ, უნდა აკონტროლოთ საკუთარი ქცევა, სიტყვები, ურთიერთობები, ფინანსები და სურვილებიც კი. თუ ენერგიის მოზღვავებას გრძნობთ, ეს აღმასვლის კარმული პერიოდია და ის მაქსიმალურად უნდა გამოიყენოთ წინსვლისა და სიტუაციების დარეგულირებისთვის. არ იზარმაცოთ, აკეთეთ ბევრი საქმე და წინ წაიწიეთ წარმატების ადვილად მისაღწევად. ეს ეხება როგორც პირად ცხოვრებას, ასევე ფინანსურ სფეროსაც. კარმული აღმასვლის პერიოდში ადამიანი მაქსიმალურად უნდა დაიხარჯოს და შეძლოს საკუთარი ძალებისა და შესაძლებლობების დემონსტრირება. ხოლო, როცა კარმული დაღმასვლის პერიოდი დგას, ამ დროს ყურადღებით უნდა იყოთ და მეტი დაკვირვებულობა გამოიჩინოთ. რაც უფრო ფრთხილად გაივლით ამ პერიოდს, მით მეტი წინსვლის საშუალება მოგეცემათ მომავალში.