ქათმისა და ბეკონის ხვეულები თაკო ვადაჭკორიასგან
ავტორი: „თბილისელები“ 12:00 14.10, 2021 წელი
საყვარელი კერძის რეცეპტს თაკო ვადაჭკორია ,,თბილისელებს" უზიარებს 👇
თამამად შემიძლია ვთქვა, რომ კარგი კულინარი ვარ. ტკბილეული, დესერტი და კერძებიც ძალიან კარგად გამომდის. ერთადერთი, ხინკალი და საცივი არ მაქვს გაკეთებული, თუმცა თეორიულად ვიცი და რომ მოვინდომო, დარწმუნებული ვარ, გამომივა. თუ რამის გაკეთება მინდა, ყველაფერი გამომდის და თან, როგორც მეუბნებიან, ძალიან გემრიელი. თავად, ხორცისა და ყველის მოყვარული ვარ, ამიტომ, ჩემს ყველა კერძში ხორცი და ყველი უნდა ფიგურირებდეს. ძალიან მიყვარს ჩვენი ტრადიციული სამზარეულო – მწვადი, ქაბაბი, ლობიანი... თუმცა, სტეიკსა და პიცაზეც არ ვამბობ უარს (იცინის). არ მიყვარს „ფასტფუდები“, ამერიკული კვება. გურმანი ვარ, თუმცა, საღამოს ჭამას ვერიდები. ბევრს დავდივარ ფეხით, ვვარჯიშობ და ამით ვინარჩუნებ წონასა და კანის სიმკვრივეს. ახლა კი შემოგთავაზებთ ქათმისა და ბეკონისგან მომზადებული რულეტის რეცეპტს, რომელიც უგემრიელესია ყველა სეზონზე გამოგადგებათ.
საჭირო ინგრედიენტები:
🔸 600 გრამი ქათმის ფილე
🔸 10 ნაჭერი ბეკონი
🔸 1/4 ჩაის ჭიქა ყავისფერი შაქარი
🔸 ნახევარი კონა ოხრახუში
🔸 მარილი და პილპილი – გემოვნებით.
მომზადების წესი 👩🍳
გააცხელეთ ღუმელი 175 გრადუსზე, საცხობ ტაფას დააფარეთ ფოლგის ქაღალდი. შაქარი მოათავსეთ ღრმა თეფშზე. ქათამი დაჭერით პატარა ნაჭრებად და მოაყარეთ პილპილი და მარილი. გაჭერით ბეკონი ორ ნაწილად, შემოახვიეთ ქათმის ნაჭრებს და ამოავლეთ ყავისფერ შაქარში. დააწყვეთ მომზადებული ქათმის ნაჭრები საცხობ ტაფაზე, მოაყარეთ მარილი და პილპილი და მოათავსეთ ღუმელში. 45 წუთში მზად იქნება. სუფრასთან მიტანისას გააფორმეთ დაჭრილი ოხრახუშით.
სიახლეები ამავე კატეგორიიდან
