განსხვავებული ჩებურეკი
ავტორი: „თბილისელები“ 12:00 02.03, 2021 წელი
საჭირო ინგრედიენტები: ცომი, 200 გრამი ფარში, 1 თავი ხახვი, 210 გრამი ფქვილი, 2 კვერცხი, 2,5 სადილის კოვზი ზეთი, 100 მილილიტრი წყალი, 1 სადილის კოვზი სოიის სოუსი, მარილი, პილპილი. ცოტა კამა, ქინძი, მწვანე ხახვი, 60 გრამი ყველი – ზემოდან მოსაყრელად.
მომზადების წესი: გაცრილ ფქვილს დაუმატეთ 1 კვერცხი და ასრისეთ ძალიან კარგად. დაუმატეთ ზეთი და ისევ აზილეთ. ნელ-ნელა ჩაასხით წყალი, მოაყარეთ მარილი და მოზილეთ ცომი. უნდა იყოს რბილი და ერთგვაროვანი. შეახვიეთ ცომი ცელოფანში და ერთი საათით მოათავსეთ მაცივარში.
ფარშში შეურიეთ წვრილად დაჭრილი ხახვი, შემდეგ – დაქუცმაცებული კამა და ქინძი, ცოტა მწვანე ხახვი, მარილი, შავი პილპილი. კარგად აურიეთ და ჩაუმატეთ სოიის სოუსი.
ცომი გააბრტყელეთ თხლად, ბლინივით. მრგვალი უნდა იყოს, 10 სანტიმეტრის დიამეტრის.
ცალ მხარეს დაადეთ ერთი კოვზი ფარში. გადაკეცეთ და ჩანგლით ნაპირები დაუფიქსირეთ.
დაალაგეთ ჩებურეკები გამოსაცხობ ტაფაზე. ზედაპირზე წაუსვით კარგად გათქვეფილი კვერცხი. მოაყარეთ გახეხილი ყველი და გამოაცხვეთ 200 გრადუსზე, 15 წუთის განმავლობაში.
მიირთვით ტომატ-პასტასთან ერთად. შეგიძლიათ, მოაყაროთ დაჭრილი ოხრახუში.
სიახლეები ამავე კატეგორიიდან
