ქოქოსის ნამცხვარი
ავტორი: „თბილისელები“ 12:00 11.04, 2021 წელი
გემრიელი დესერტი „თბილისელებისგან“ 👇
საჭირო ინგრედიენტები: 1 ქილა შესქელებული რძე („სგუშჩონკა“), 1 ქილა ჩვეულებრივი რძე, 3 კვერცხი, 125 გრამი ქოქოსის ფანტელი, 1 შეკვრა ტკბილი ვანილი, 1-2 სადილის კოვზი ყავისფერი შაქარი.
მომზადების წესი: გააცხელეთ აირღუმელი 200 გრადუსზე. აიღეთ ცეცხლგამძლე შუშის ან კერამიკის ფორმა. ასევე, მოამზადეთ მეორე, შედარებით დიდი და ღრმა ფორმა, რომელშიც გამოსაცხობ ფორმას ჩადგამთ. მასში სანახევოდ ჩაასხით წყალი და მოათავსეთ აირღუმელში, რომ გაცხელდეს.
ღრმა თასში ჩაასხით შესქელებული რძე. შესქელებული რძის ცარიელი ქილა შეავსეთ ჩვეულებრივი რძით, ჩაასხით შესქელებულ რძეში და კარგად აურიეთ. კვერცხის გული და ცილა გააცალკევეთ. კვერცხის გულები ჩაუმატეთ რძეს, მოაყარეთ ვანილი, ქოქოსის ფანტელები და კარგად აურიეთ. ცალკე ათქვიფეთ კვერცხის ცილა, ისე, რომ არ იღვრებოდეს და ძალიან ფრთხილად შეურიეთ საერთო მასას.
მოამზადეთ კარამელი: მშრალ ტაფაზე დაყარეთ შაქარი და ნელ ცეცხლზე გაადნეთ. მზა კარამელი მოასხით გამოსაცხობი ფორმის ფსკერზე და ჩაასხით ბისკვიტი. ეს ფორმა ჩადგით წყლიან ფორმაში, ისე, რომ წყალი ნახევრამდე მოადგეს. 40 წუთის შემდეგ გამოიღეთ და მოათავსეთ მაცივარში. რომ გაცივდება, ფორმიდან ამოიღეთ.
სიახლეები ამავე კატეგორიიდან