ბადრიჯანი ხაჭოთი და პომიდვრით ხატია წერეთლისგან
ავტორი: „თბილისელები“ 12:00 20.05, 2021 წელი
გემრიელი რეცეპტები თბილისელებისგან:
საჭმელების კეთება მეხერხება, ყველაზე კარგად ცომეული, სალათები და სუპები გამომდის. ვაკეთებ ელვის სისწრაფით და ძალიან გემრიელს. მიყვარს გემოებით თამაში.
ასევე, ყურადღებას ვაქცევ, რომ საჭმელი იყოს ჯანსაღი, ნაკლები კონსერვანტებით, დაბალი ქოლესტერინის შემცველობით. ასევე, მნიშვნელოვანია, აპეტაიზერი – ყველა საჭმელს შესაფერისი სასმელი უხდება. მაგალითად, ხორცის სიმსუყის განეიტრალებას მშრალი, არა ტკბილი ღვინით ვახერხებ, მძაფრი სუნის მქონე ყველს მარტივად ვუხამებ რუკოლას ან ტარხუნას, ნიგვზიან ბოსტნეულს კი, რომელიც ჩვენში ძალიან პოპულარულია – წითელ 16-18 გრადუსიან, ნახევრად ტკბილ ღვინოს. ცომეულს ლუდი უხდება. ლუდსაც და ცომეულსაც ფუძედ ერთნაირი კომპონენტები აქვთ – საფუარი, მარცვლეული, წყალი. ასე რომ, ავსებენ ერთმანეთს. რაც შეეხება წონას, მონოდიეტები ჩემთვის მიუღებელია, უპირატესობას დაბალანსებულ კვებას ვანიჭებ. თუ წონის კლება გვინდა, 800-კალორიიანი დიეტა ყველაზე ეფექტურია. ასევე, სწრაფი სიარული და აქტიური ცხოვრების წესი. დახარჯეთ რაც შეიძლება მეტი კალორია და გააყოლეთ ცხიმები, შლაკები, მარილები. იმოძრავეთ სწრაფად, და საერთოდ, ყველაფერი სწრაფი ტემპით აკეთეთ. ახლა კი გასწავლით ამ სეზონის ყველაზე პოპულარული კერძის – ბადრიჯნის მომზადებას ხაჭოთი და პომიდვრით.
საჭირო ინგრედიენტები: 200 გრამი ხაჭო, 3 ცალი ბადრიჯანი, 1 სუფრის კოვზი არაჟანი, 2 ცალი პომიდორი, 3 კბილი ნიორი, სუნელები, მარილი და პილპილი – გემოვნებით. უხდება ზეითუნის ზეთი.
მომზადების წესი: ხაჭოს დაუმატეთ წვრილად დაჭრილი ნიორი, მარილი, პილპილი, სუნელები, არაჟანი. კარგად ჩაზილეთ, რომ ერთგვაროვანი მასა მიიღოთ. ბადრიჯანი დაჭერით სიგრძეზე, შეწვით ტაფაზე, გადაიტანეთ ხელსახოცზე, რომ ზედმეტი ცხიმისგან გათავისუფლდეს. ბადრიჯანზე გადაანაწილეთ ხაჭოს შიგთავსი, გვერდულად მიუდეთ პომიდვრის ნაჭერი და რულეტივით გადაახვიეთ.
სიახლეები ამავე კატეგორიიდან
