ატმისა და ავოკადოს სალათა ყველითა და თაფლის სოუსით ნინო მუმლაძისგან
ავტორი: „თბილისელები“ 12:00 21.08, 2022 წელი
ნინო მუმლაძე საყვარელი კერძის რეცეპტს ,,თბილისელებს" უზიარებს 👇
სამზარეულოში ფუსფუსი არასდროს მღლის. პირიქით, მსიამოვნებს და მეხალისება კერძების ახალი ვარიაციების მოგონება. სულ ძიებაში ვარ და ახალ გემოებსაც ყოველთვის ვპოულობ. კერძებს, ძირითადად, დაბალკალორიული პროდუქტებით ვამზადებ სწრაფად და მარტივად. ყველაზე მეტად კი ჩემი მომზადებული ქათამი მოსწონთ. არ არსებობს კერძი, რომელიც ვცადე და არ გამომივიდა. ცომს ვერიდები, რადგან მასუქებს, სალათებს კი, უმეტესად, იმპროვიზაციებით ვამზადებ. ახლა ატმის სეზონია და შემიძლია შემოგთავაზოთ უგემრიელესი, დაბალკალორიული და უცხო სალათის მომზადება.
საჭირო ინგრედიენტები:
🔸 1 ცალი ატამი
🔸 1 ცალი ავოკადო
🔸 სალათის ფურცელი
🔸 70 გრამი პარმეზანი
🔸 1 კბილი ნიორი
🔸 1 სუფრის კოვზი თაფლი
🔸 1 სუფრის კოვზი სოიის სოუსი
🔸 1 ჩაის კოვზი სეზამის ზეთი
🔸 1 სუფრის კოვზი ზეითუნის ზეთი
🔸 1 ჩაის კოვზი ბრინჯის ძმარი
🔸 მარილი და მწვანილი – გემოვნებით.
მომზადების წესი 👩🍳
სოუსისთვის ღრმა ჯამში მოათავსეთ გახეხილი ნიორი, სეზამის ზეთი, ბრინჯის ძმარი, სოიის სოუსი, თაფლი, ზეითუნის ზეთი, მარილი და კარგად აურიეთ, სანამ ერთიან მასას არ მიიღებთ. ცალკე ღრმა ჯამში მოათავსეთ სალათის ფურცლები, დაჭრილი ავოკადო და ატამი. მოასხით სოუსი და კარგად აურიეთ. ზემოდან მოაყარეთ გახეხილი პარმეზანი და დაჭრილი მწვანილი.
სიახლეები ამავე კატეგორიიდან