როგორ მოვასწროთ ყველაფერი ისე, რომ შევინარჩუნოთ საკუთარი თავი

ბევრი ქალისთვის ეს დილემა ძალიან ახლობელია – თითქოს ყოველდღე ვიბრძვით. ვცდილობთ, გავქანდეთ ყველა მიმართულებით და საბოლოოდ მაინც გვრჩება დაღლილობის განცდა და შინაგანი უკმაყოფილება.

დღეს ქალის დროის განაწილება ხშირად სხვების საჭიროებებზეა დამოკიდებული. კვლევები აჩვენებს, რომ ქალები, საშუალოდ, ორჯერ მეტ დროს ხარჯავენ საოჯახო საქმეებზე, ვიდრე კაცები. ამას ემატება პროფესიული პასუხისმგებლობები, ბავშვების სკოლა, ბაღი, ოჯახის წევრების საჭიროებები და ბოლოს სულ მცირე დრო – საკუთარი თავისთვის. თანამედროვე ცხოვრების ტემპი თითქოს გვაიძულებს, ვიყოთ მუდმივად „ფორმაში“ – იდეალური დედა, იდეალური პროფესიონალი, იდეალური მეუღლე. მაგრამ რამდენად რეალურია ეს?

• ყველაფრის მოსწრების მითი

ხშირად გვგონია, რომ თუ ყველაფერს არ მოვასწრებთ და ყველაფერში იდეალურები არ ვიქნებით, ეს ჩვენს ნაკლად ჩაითვლება. სინამდვილეში კი, ეს მითი მხოლოდ გვღლის. უნდა ჩავხედოთ სიმართლეს თვალებში – შეუძლებელია, ერთდროულად ვიყოთ სრულყოფილი ყველა როლში. მნიშვნელოვანია, გავიაზროთ, რომ რაღაცას ვერ მოვასწრებთ და ეს სრულიად ნორმალურია.

• პრიორიტეტების განსაზღვრა

დაწერეთ, რა არის ყველაზე მნიშვნელოვანი დღევანდელი დღის, კვირის ან თვისთვის. მიხვდებით, რომ საქმეების ნახევარი არც ისე სასიცოცხლოდ მნიშვნელოვანია;

• ისწავლეთ, თქვათ „არა“

ეს არის დროის მართვის ყველაზე ძლიერი ინსტრუმენტი. არაა საჭირო ყველასთან და ყველაფერზე თანხმობა. როცა სხვას „არას“ ეუბნები, ეს საკუთარი თავისთვის არის „დიახ“.

• დელეგირება

ოჯახში საქმეების გადანაწილება აუცილებელია. ბავშვებსაც შეუძლიათ, მცირე პასუხისმგებლობა აიღონ. პარტნიორს კი მეტი ჩართულობა მართებს. ტექნოლოგიების დახმარებითაც ბევრი რუტინული საქმე მარტივდება.

• საკუთარი დროის კალენდარში შეტანა

საკუთარი თავისთვის დრო დაგეგმილი უნდა გქონდეთ, ისევე, როგორც ნებისმიერი სხვა მნიშვნელოვანი საქმე, მაგალითად, წიგნის კითხვა, სეირნობა, თავის მოვლის პროცედურა – გახსოვდეთ, ეს დრო აუცილებელი ინვესტიციაა.

ქალური ბედნიერება – მითი თუ რეალობა?

„ქალური ბედნიერება“ – ფრაზა, რომელიც ხშირად ისმის სარეკლამო სლოგანებში, სოციალურ ქსელებში ან ყოველდღიურ საუბარში. თითქოს არსებობს ერთი უნივერსალური ფორმულა, რომელიც ყველა ქალისთვის უნდა იყოს ბედნიერების გასაღები: ოჯახი, შვილები, წარმატებული კარიერა და იდეალური გარეგნობა. მაგრამ რეალურად, არსებობს კი ასეთი ფორმულა?

ჩვენი დედებისა და ბებიების თაობა „ქალურ ბედნიერებას“ ხშირად მხოლოდ დედობასა და ოჯახურ ცხოვრებასთან აიგივებდა. ქალი, რომელსაც არ ჰყავდა ქმარი ან შვილი, საზოგადოებაში „არასრულფასოვნად“ აღიქმებოდა. ეს სტერეოტიპი დღესაც ცოცხალია: ქალები ხშირად გრძნობენ წნეხს – თითქოს მათ „სწორი ბედნიერება“ ჯერ კიდევ არ უპოვიათ.

როგორია რეალობა – თანამედროვე საზოგადოებაში ქალი აღარ იკავებს მხოლოდ დედის ან მეუღლის როლს. ბევრი ქალი კარიერაში პოულობს რეალიზაციას, ზოგისთვის ეს ხელოვნებაა, მოგზაურობა, თვითგანვითარება ან, უბრალოდ, პირადი დრო. ბედნიერების ერთიანი ფორმულა არ არსებობს. ვიღაცისთვის ბედნიერებაა ხმაურიანი ოჯახი, ვიღაცისთვის – თავისუფლება და საკუთარი თავის რეალიზაცია.

ფსიქოლოგები ამბობენ: ბედნიერება ინდივიდუალურია. მთავარია, რომ ქალი თავად ირჩევდეს, რა არის მისთვის მთავარი. სინდისის გრძნობა, რომელიც ხშირად აწუხებს დედებს – „ვხარჯავ დროსა და ფულს საკუთარ თავზე, როდესაც ოჯახს სჭირდება“ – ხშირ შემთხვევაში სტერეოტიპული მემკვიდრეობაა. საკუთარი ინტერესებისა და სურვილების დაკმაყოფილება არა ეგოიზმი, არამედ ემოციური ჯანმრთელობის საფუძველია. არსებობენ ქალები, რომლებიც ბედნიერებას პოულობენ 40 წლის ასაკში ახალი პროფესიის შესწავლით და ეს ნორმალურია.

დიახ, „ქალური ბედნიერება“ რეალობაა, ოღონდ მაშინ, როცა თავად ქალს აქვს უფლება და ძალა, განსაზღვროს, რას ნიშნავს ეს მის ცხოვრებაში.