რის გამო იქცა ნიდერლანდების სამეფოში გახსნილი რესტორანი „ტიფლისი“ უცხოელი სტუმრებისა და დიპლომატების საყვარელი ადგილი და რაშია მისი უნიკალურობა

ნინა ხონელიძე (რესტორან „ტიფლისის“ დამფუძნებელი): რესტორანი „ტიფლისი“ ორი თვის გახსნილია და მიხარია, რომ უკვე საკმაო პოპულარობით სარგებლობს. ამ რესტორნის გახსნის მიზანი იყო ქართული კერძების, სასმლისა და კულტურის გაზიარება უცხოელებისთვის. ასევე, იმ სტუმარმასპინძლობის ჩვენება, რაშიც ქართველები მართლაც უნიკალურები ვართ. როგორც მოგეხსენებათ, „იუნესკომ“ ქართული სამზარეულო და ღვინო კულტურულ მემკვიდრეობად გამოაცხადა და ჩვენი იდეა და მოტივაციაც ეს იყო, რომ უცხოელებისთვის ჩვენი ლეგენდარული სტუმართმოყვარეობა სწორედ ამ რესტორნიდან გაგვეზიარებინა. მოხარულები ვართ, რომ უმოკლეს დროში, ბევრი ადამიანის საყვარელი ადგილი გახდა და უამრავი ადამიანი გვსტუმრობს. ჩვენი რესტორნის მენიუში კერძების ფართო ასორტიმენტია წარმოდგენილი. აქ, ფაქტობრივად, რაც საქართველოში მზადდება, ყველაფერს დააგემოვნებთ. ამ რესტორნის უდიდესი პრივილეგია არის ის, რომ გვაქვს საქართველოდან ჩამოტანილი ღვინო, რომელიც უნიკალური ჯიშების „ბუკეტია“ და მისი არაჩვეულებრივი გემოვნური თვისება სტუმრების გაოცებას იწვევს. ამისთვის დიდი მადლობა თიკა სვანიძე-ვენკოს, რომელიც ამ ღვინის მწარმოებელია.

„ტიფლისში“ მოხვედრილი ადამიანი ერთი გადახედვითაც მიხვდება, რომ მის დამფუძნებლებს ამ სივრცეში მთელი გული და სული აქვთ ჩადებული და ცდილობენ, უმაღლესი ხარისხის პროდუქტებით, მრავალფეროვანი და უგემრიელესი კერძები შექმნან, მათი გასინჯვით იქ მისული საზოგადოება არარეალურ სამყაროში ამოგზაურონ, გაუჩინონ სურვილი, კიდევ ერთხელ გასინჯონ ჩვენი უნიკალური სამზრეულო, შესვან საქართველოში დაყენებულ-დავარგებული, უნიკალური ჯიშის ყურძნისგან დაწურული ღვინო. ინტერიერის გაფორმებაში ქართველი ქალის სილამაზე და სტუმართმოყვარეობაა წამოწეული, რომელიც აღგიძრავს სურვილს, კიდევ ერთხელ მიხვიდე და კიდევ ბევრი სიახლე აღმოაჩინო ქვეყანაზე, რომელსაც საქართველო ჰქვია.

თიკა სვანიძე-ვენკო (კომპანია TIKA SVANIDZE VANCKO ESTATE WINERY-ის დამფუძნებელი): ჩემი კომპანიის მიზანი, ჩვენი იდენტობის უმთავრესი ნაწილის – ღვინის პოპულარიზაციაა. მინდოდა, ღვინო წარმომედგინა არა ბანალურად, როგორც ღმერთების სასმელი, ვაზის ცრემლები, ჭეშმარიტება სითხეში და ასე შემდეგ, არამედ, ისე, რაშიც ჩვენი ქვეყნის კულტურული და ისტორიული მეხსიერებაა დალექილი. ზუსტად ასე შეიქმნა ჩვენი ბრენდის ყველაზე გამორჩეული პროდუქტი „მეფის რჩეული“. ხელნაწერთა ეროვნულ ცენტრთან თანამშრომლობის შედეგად, ხელნაწერებსა და არქივებში ქექვისა და ხანგრძლივი მუშაობის შემდეგ შეიქმნა ლეგენდარული ქართველი მეფის, ერეკლე მეორის ღვინო, რომელიც „ქვევრი საფერავთან“ ერთად, არაერთი საერთაშორისო ღვინის კონკურსის ოქროს მედლის მფლობელია. ასევე, ყველა ბოთლის დიზაინი სრულიად უნიკალურია, რომელიც ოქროს ფონდის არქეოლოგიურ ექსპონატებზე და ქართულ ქსოვილზე ყვება ისტორიას. გარდა ამისა, ჩვენ გვქონდა სპეციალური ჩამოსხმებიც, რომელთაგანაც ერთ-ერთი დიდგორის ბრძოლის 900 წლისთავს მიეძღვნა. ასევე, სრულიად უნიკალური და განსაკუთრებული ბოთლი, რომელიც ნიდერლანდების კუნძულ ტექსელზე მეორე მსოფლიო ომის მიწურულს აჯანყებული გმირი ქართველი ჯარისკაცების ხსოვნას დაუკავშირდა. TSV ESTATE WINERY უამრავი საერთაშორისო კონკურსისა და ფესტივალის გამარჯვებულია. რაც შეეხება რესტორან „ტიფლისს“, ნინამ და ნათიამ გული და სული ჩადეს ამ ყველაფერში. რაც მთავარია, ყველა კერძი ნატურალური პროდუქტით მზადდება, ყველიც კი აქ ამოჰყავთ. უამრავი ქართული რესტორანია გახსნილი მსოფლიოს სხვადასხვა ქვეყანაში, მაგრამ ის გრძნობა, რომ რესტორანში შესულმა სამშობლოში იმოგზაურო, მხოლოდ „ტიფლისში“ დამეუფლა. ამ რესტორნის უნიკალურობა, ფასეულობა და პლუსია ის, რომ კერძებს შესანიშნავად ეხამება ღვინო, რომელიც საქართველოში იწურება, ქვევრებში ვარგდება და ევროპულ და ქართულ კერძებთან საოცარ კომბინაციას ქმნის. ქართულ მრავალფეროვან კერძებთან ერთად, რეტორან „ტიფლისში“ აქვთ ევროპული სამზარეულო, რომელიც სხვა ბევრ ქართულ რესტორანს არ გააჩნია.

აღსანიშნავია, რომ რესტორანი „ტიფლისი“, გარდა იმისა, რომ იქ მისულ სტუმრებს გემრიელი ქართული და ევროპული ხარისხიანი კერძებით უმასპინძლდება და ქართული უნიკალური, ექსკლუზიურად ჩამოსხმული, სხვადასხვა ჯიშის ყურძნისგან დამზადებული ღვინითა და ჭაჭით აოცებს, ასევე, დიდი წვლილი შეაქვს საქართველოს ტურიზმის განვითარებაში. იქ, მისული სტუმრების უმრავლესობას, უდიდესი სურვილი უჩნდება, თავისი თვალით იხილოს ის ჯადოსნური სამყარო, რასაც ჩვენი ქვეყანა ჰქვია.