როგორ გახდა კატერინა კახნიაშვილი საბერძნეთის სილამაზის კონკურსის გამარჯვებული

– კატერინა, გილოცავთ დიდ წარმატებას! გვიამბეთ როგორია ცხოვრება ორ ქვეყანაში ერთდროულად, საქართველოსა და საბერძნეთში, ემიგრაციის ბავშვობაზე...

– 2003 წელს, ჩემი მშობლები საქართველოდან საბერძნეთის ქალაქ სალონიკში ჩამოვიდნენ საცხოვრებლად. ოჯახის საუბრებიდან ვიცი, რომ მათთვის ეს ადვილი არ ყოფილა, არა იმდენად ახალი გარემოს გამო, სადაც უნდა ეცხოვრათ, არამედ უფრო იმის გამო, რომ სამსახურში კოლეგებისგან ქსენოფობიური მოპყრობა შეხვდათ. ჩემთვის, თუნდაც პატარა ასაკიდან, ასეთი დამოკიდებულებები თანატოლებისგან არ ყოფილა, მაგრამ დიდებისგან – ხშირად. მაგალითად, მასწავლებლები არ მაქებდნენ, როცა კარგად ვლაპარაკობდი ან ვწერდი ბერძნულად, მაგრამ ვერ ვხვდებოდი მიზეზს, რადგან ისევე ვსწავლობდი, როგორც სხვები. ახლა კი შემიძლია, ვთქვა, რომ ახალგაზრდებს შორის ეს ფაქტები თითქმის აღარ ხდება, რადგან საბერძნეთში სულ უფრო მეტი ქართველი იზრდება ერთად.

– სკოლის პერიოდში მრავალ მიმართულებაში იყავით ჩართული...

– ჩემი სკოლის წლები ყოველთვის დატვირთული იყო სწავლისა და სხვადასხვა სკოლისგარე აქტივობებით, როგორიცაა მუსიკა, ცეკვა ან სპორტი. თუმცა სკოლაში სწავლის ბოლო წელი განსაკუთრებით ინტენსიური იყო, რადგან პარალელურად, მოდელინგით ვიყავი დაკავებული და ეროვნული გამოცდებისთვისაც ვემზადებოდი. ხშირად მქონდა ფოტოსესიები, რომლებიც სასწავლო გრაფიკსა და დამატებით გაკვეთილებთან უნდა შემეთავსებინა, რის გამოც ბევრჯერ მიწევდა გადარბენა ერთი აქტივობიდან მეორეზე. ამ გამოცდილებამ მასწავლა, როგორ უნდა დამეგეგმა დრო უფრო ზუსტად, რომ მქონოდა მკაფიო ყოველდღიური გრაფიკი და სწავლისთვის მაქსიმალურად გამომეყენებინა მცირე თავისუფალი წუთები. ყოველთვის არ იყო მარტივი, იყო გადაღლილობისა და სტრესის მომენტები, მაგრამ საბოლოოდ შევძელი კარგი შედეგის მიღწევა და პროფესიონალური საქმიანობის გაგრძელება. ამ ყველაფრიდან მივხვდი, რამდენად მნიშვნელოვანია პრიორიტეტების დალაგება, მიზნებისადმი ერთგულება და მოთხოვნებთან შეგუება ისე, რომ ბალანსი არ დაიკარგოს.

– წარმატებების შედეგად კერძო კოლეჯში ჩაირიცხეთ, როგორ გახსენდებათ იქ გატარებული წლები?

– როცა იმ პერიოდს ვიხსენებ, რომელსაც კერძო სკოლაში ვატარებდი, ყოველთვის დიდ სიამოვნებას ვგრძნობ. სკოლაში მიღებისთვის საჭირო იყო სპეციალური გამოცდები, რომლებიც ჩავაბარე, და ცოტა ხნის შემდეგ გავიგე, რომ ჩემი შედეგები საკმარისი იყო, რათა სტუდენტი გავმხდარიყავი. იმ სკოლაში შევიძინე ერთგული მეგობრები და დამრჩა არაჩვეულებრივი მოგონებები, რომლებიც სამუდამოდ დამამახსოვრდება. სკოლამ მომცა უამრავი შესაძლებლობა სხვადასხვა აქტივობაში მონაწილეობისათვის, მაგალითად, სხვადასხვა სფეროს ვორქშოპებში, ასევე, ეროვნული დღესასწაულის აღლუმში, რაც განსაკუთრებული გამოცდილება იყო. ამ აქტივობებიდან გავიცანი ახალი ადამიანები, ვისწავლე თანამშრომლობა და შევაფასე შემოქმედება და კოლექტიური მუშაობის მნიშვნელობა. ეს პერიოდი დამეხმარა პიროვნულად განვითარებაში, სკოლაში ყოველდღიური სიამოვნების მიღებასა და მეგობრებთან ერთად გატარებული მომენტების დაფასებაში. ვფიქრობ, რომ ეს გამოცდილებები დამეხმარება ახალი ჰორიზონტების გახსნაში, რომ მაქსიმალურად გამოვიყენო ყველა შესაძლებლობა სწავლისა და პიროვნული ზრდისთვის.

– პარალელურად, რამდენად ხშირად ახერხებდით საქართველოში ჩამოსვლას, აქაურ ნათესავებთან ერთად ყოფნას?

– მუდმივად მიხარია, როცა საქართველოში ვბრუნდები და ჩემს ნათესავებს ვხვდები. ყოველდღიური ვალდებულებებისა და სხვა მოგზაურობების მიუხედავად, წელიწადში ერთხელ ან ორჯერ მაინც ვახერხებ მათ მონახულებას. ხშირად ისინი თვითონაც მოდიან საბერძნეთში. ორივე სიტუაცია განსაკუთრებულ სიხარულს მანიჭებს, რადგან გვაძლევს შესაძლებლობას ისევ შევხვდეთ, იქნება ეს საქართველოში თუ საბერძნეთში და იმავდროულად ვისიამოვნოთ იმ ქვეყნის ბუნებითა და გარემოთი, სადაც ვართ. ხშირად, ასევე, ერთად ვმოგზაურობთ სხვა ქვეყნებში, რაც კიდევ უფრო განსაკუთრებულ გამოცდილებად გვექცევა.

– როდის გადადგით პირველი ნაბიჯები სამოდელო სფეროში?

– მოდელინგი 14 წლის ასაკში დავიწყე თესალონიკის ერთ-ერთ მოდელების სააგენტოში. ჩემი პირველი ფოტოსესია სააგენტოს სოციალური ქსელებისთვის იყო. ეს გამოცდილება ჩემთვის ახალი, მაგრამ იმავდროულად, ძალიან მომხიბვლელი და საინტერესო იყო. შემდგომ ყველა სააგენტოში დავიწყე პორტფოლიოს შექმნა, რათა მათ ჰქონოდათ მასალა, რომლითაც შეძლებდნენ ჩემს პოპულარიზაციას კლიენტებთან. მთელი ეს პროცესი ჩემთვის დიდი გაკვეთილი აღმოჩნდა, გავიგე, თუ როგორ უნდა აჩვენო თავი კლიენტებს და როგორ უნდა მართო სამუშაო შეთავაზებები.

- როგორია საბერძნეთში სამოდელო სფერო?

- საბერძნეთში და კონკრეტულად თესალონიკში მოდელინგის სფერო და სამუშაო შესაძლებლობები შეზღუდულია. ამ ქალაქში არსებობენ კონკრეტული სააგენტოები, კლიენტები და ჯგუფები, რის გამოც, ასევე, შეზღუდულია პროფესიული განვითარების არეალიც. ძალიან მნიშვნელოვანია, რომ შეისწავლო ბაზარი და მუდმივად იკვლიო ყველა შესაძლებლობა, იმავდროულად, უნდა ავითარებდე სწორ კონტაქტებს, რათა გახდე დაკავებული და ცნობადი მოდელი საბერძნეთში.

– დღევანდელობა და სამომავლო გეგმები...

– დღეს ვსწავლობ საბერძნეთის საერთაშორისო უნივერსიტეტში, ორგანიზაციების მართვის, მარკეტინგისა და ტურიზმის დეპარტამენტში. ჩემი ფაკულტეტი ძალიან მომწონს, რადგან მაძლევს აუცილებელ ცოდნას, რომ უკეთ გავიგო ბიზნესის, კომუნიკაციისა და მართვის სფეროები. ხოლო, ამავე დროს, მაცნობს კრეატიული შესაძლებლობების მიღების გზებს მარკეტინგსა და ტურიზმის სფეროში.

პარალელურად, დიდი სიყვარულით ვაგრძელებ მოდელინგს. ჩემი მიზანია პროფესიულად განვვითარდე ამ სფეროში და მონაწილეობა მივიღო მნიშვნელოვან პროექტებში, გამოვიყენო ჩემი გამოცდილება და შესაძლებლობები, რომელსაც ყოველი ახალი თანამშრომლობა მაძლევს. ასევე, მონაწილეობას ვიღებ ERASMUS-ის პროგრამებში სხვადასხვა ქვეყანაში, რაც მაძლევს შესაძლებლობას, გავიცნო განსხვავებული კულტურები, გავაფართოო ჩემი ქსელი და მივიღო ფასეული საერთაშორისო გამოცდილება, რაც ასრულებს ჩემს აკადემიურ სწავლებებს. ვფიქრობ, რომ სწავლებების, ხელოვნებითი საქმიანობისა და საერთაშორისო გამოცდილების შეთავსება მაძლევს უნიკალურ პერსპექტივას მომავლისთვის და მეხმარება მიზანდასახულად და თავდაუზოგავად წინ წავიწიო.

– მიღწეული წარმატებები და გამოცდილება ძალიან დაგეხმარებათ სამოდელო სფეროში კვლავაც დიდ წარმატებებს მიაღწიოთ...

– დიახ, ამჟამად მაქვს გამოცდილება სხვადასხვა ფოტოსესიებში, რომლებიც დაკავშირებულია მოდის კომპანიების კატალოგებთან და სოციალურ ქსელებისთან, ასევე, განკუთვნილია ფოტოგრაფებთან და სტილისტებთან თანამშრომლობისთვის. ეს გამოცდილება ძალიან ფასეული იყო ჩემთვის, რადგან მასწავლა, როგორ უნდა ვიმუშაო კამერის წინ და როგორ დავამყარო პროფესიონალებთან ეფექტური კომუნიკაცია. თესალონიკში ქართული კომპანიების პოდიუმზე მომიხდა გავლა, რამაც გაზარდა ჩემი გამოცდილება მოდის ჩვენებებში და მასწავლა, როგორ წარმოვაჩინო თავდაჯერებულად ტანსაცმელი და აქსესუარები აუდიტორიის წინაშე. ამასთანავე, მონაწილეობა მივიღე სილამაზის კონკურსებში, რომლებმაც შესაძლებლობა მომცა, კიდევ უფრო მეტი ფოტოსესია გამეკეთებინა, ვისწავლე გუნდური მუშაობა და მომემატა თავდაჯერებულობა სცენაზე. ჩემი საქმიანობის მნიშვნელოვანი ნაწილი, ასევე, უკავშირდება Beauty ფოტოსესიებს, ანუ მაკიაჟთან დაკავშირებულ სამუშაოებს, სადაც ვისწავლე, როგორ ვთანამშრომლო Makeup არტისტებთან და სწორად წარმოვაჩინო მათი შემოქმედების შედეგი.