როგორ ახერხებს ნიკოლოზ ქართველი ადამიანების დარწმუნებას ყოველთვის

ნიკოლოზ ქართველი: 26 იანვარს დავიბადე, შესაბამისად, ზოდიაქოთი მერწყული ვარ. ვერ ვიტყვი, რომ ძალიან მჯერა ზოდიაქოსი, მაგრამ ვიცი, რომ გარკვეული დამთხვევები არის.

– „მერწყული არის ამოუცნობი ადამიანი, რომელსაც ბოლომდე ვერ გაშიფრავ“, ასეა?

– ჩემ შესახებ, პირიქით, ამბობენ, რომ ძალიან ღია და მეგობრული ვარ. ამოუცნობი? შეიძლება, რაღაცები დავმალო, უფრო სწორად, ჩემს თავში ჩავიკლა, ანუ ჩემ გარშემო მყოფებს ჩემი დარდები არ გავუზიარო.

– მუდამ ორიგინალური და გამორჩეულია...

– სავარაუდოდ, ასეა, თუმცა, ეს უფრო სხვამ უნდა შეაფასოს. ამბობენ ხოლმე, რომ რაღაც მხრივ, ძალიან ორიგინალური და გამორჩეული ვარ.

– მისი აზრები ყოველთვის უსწრებს დროს...

– ასი პროცენტით ვეთანხმები (იცინის). სხვებზე ადრე ვგრძნობ განვითარების პერსპექტივებს და ვცდილობ, ვიმოქმედო ამ მიმართულებით. არ მიყვარს პოტენციალის დაკარგვა.

– ურთიერთობებში ზედმეტად მსუბუქები არიან...

– მე ვფიქრობ, რომ მერწყული ძალიან თბილი ნიშანია, მაგრამ თუ იმავეს ერთხელ მაინც ვერ დაინახავს პარტნიორისგან, ძალიან სწყდება გული და როცა გულდაწყვეტილია, მიდის. ადამიანებს ყოველთვის ისე ექცევა, როგორც უნდა, რომ მას მოექცნენ. ყოველ შემთხვევაში, მე ასე ვიქცევი. რასაც გავცემ, მინდა, საპასუხოდაც ის მივიღო.

– თუ ძალიან მობეზრდით, შეუძლია, ზედმეტი დრამებისა და სცენების გარეშე გაქრეს თქვენი ცხოვრებიდან.

– კი, ძალიან მარტივად შემიძლია ამის გაკეთება. არანაირი კამათი და საქმის გარჩევა. მე როგორც ვიცი, მერწყულს საერთოდ არ უყვარს კონფლიქტები, მეც არ მიყვარს, ვერ ვიტან და მირჩევნია, უბრალოდ, დავასრულო ისეთ ადამიანთან ურთიერთობა, ვისგანაც იმავე დოზით ვერ ვიღებ ყურადღებას, რა დოზითაც მე გავცემ მის მიმართ. ასევე, იმ ადამიანთან, ვინც მომატყუებს. ადამიანს ერთხელ აუცილებლად ვაპატიებ ტყუილს, მაგრამ მეორედ იმავეს აღარ ვაპატიებ. თუ მეორედაც მომატყუა, ჩემს თავთან მართალი ვიქნები, რომ ავდგე და უბრალოდ, წავიდე.

– საინტერესო მოსაუბრე და კარგი მრჩეველია.

– სხვათა შორის, ასეა. დღემდე ძალიან ბევრი ადამიანის საიდუმლოს ვინახავ. ძალიან ბევრი ადამიანი მიყვება თავის თავზე, სულიერ მდგომარეობაზე, ისეთ რამეებზე, რაზეც სხვასთან ვერ საუბრობენ. მართლა ბევრი ასეთი მეგობარი მყავს. მე თვითონ ძალიან ბევრ რამეს ვიკლავ ჩემს თავში. შეიძლება, ძალიან ბევრი დარდი მქონდეს, მაგრამ არაფერს ვამჟღავნებდე. უმეტესწილად ვიღიმი, მაგრამ შეიძლება, ასეთ განწყობაზე საერთოდ არ ვიყო. ამას იმიტომ ვაკეთებ, რომ სხვას არ ვავნო და ცუდ ხასიათზე არ დავაყენო. ტყუილი გამომდის, მაგრამ სხვას მაინც არ ვავნებ. არ მიყვარს სხვისთვის ჩემი პრობლემების გაზიარება, ვფიქრობ, დავამძიმებ. ვცდილობ, ჩემი პრობლემები მე თვითონვე მოვაგვარო, თუ ვერ ვაგვარებ, უბრალოდ, ჩუმად ვიყო.

– რამდენად პრინციპული ადამიანი ხარ?

– ზოგადად, პრინციპული ვარ, მაგრამ როცა საქმე წყენას ეხება, ამ შემთხვევაში არ ვარ პრინციპული. ანუ, წყენა ძალიან მალე გამივლის ხოლმე, მიზანმიმართულად ვივიწყებ. გულში ბოღმას არასდროს ვიდებ. არავისი მშურს. პირიქით, სხვისი კარგი ძალიან მიხარია. ასე ვიტყვი თუ ისე, პრინციპული ვერ ვარ, შეიძლება, ვთქვა რამე და ვერ შევასრულო, თუმცა მიზანდასახული ვარ.

– მაშინ მიზანდასახულობა როგორ გამოგდის?

– ყველაფერს ბრძოლა სჭირდება, რაც არ მეზარება და ხშირ შემთხვევაში, ვაღწევ კიდეც დასახულ მიზანს. 90 პროცენტში ასეა. გააჩნია, რამდენად ძლიერია ჩემი სურვილი და რამდენად რთულია მიზანი.

– ყოველთვის სიმართლის მხარეს არის.

– ცოტა მიკერძოებული ვარ. ხანდახან შეიძლება, სიმართლის მხარეს არ ვიყო და მეგობრის მხარე დავიჭირო. არის ხოლმე ასეთი მომენტები. არ შემიძლია ადამიანის გაწირვა. რომც ვხვდებოდე, მეგობარს რაღაც შეეშალა, შემიძლია, შევალამაზო.

– ყოველთვის იმას აკეთებს, რაც უნდა.

– ყოველთვის ვცდილობ, ასე მოვიქცე, ანუ, ის გავაკეთო, რაც მინდა. ძალიან არაკონფლიქტური ვარ. შეიძლება, გვერდზე მყოფს არ უნდოდეს იმის გაკეთება, რაც მე მინდა, მაგრამ ტკბილი სიტყვით აზრი შევაცვლევინო და მაინც ის გავაკეთო, რაც მე მინდა. ალბათ, ეს მანიპულირება გამოდის, მაგრამ კარგი კუთხით (იცინის). ამ გზას ცუდი განზრახვით არ მივმართავ, ჩემ გვერდზე მყოფს არ ვავნებ.

– როდის რა მოუვა თავში, კაცმა არ იცის.

– სხვათა შორის, მართლა ასეა. მაგრამ ამითაც არ ვვნებ სხვას. მაგალითად, შეიძლება, ბათუმში წავიდე დასასვენებლად და მეორე დღეს ისევ თბილისში მომინდეს დაბრუნება. შეიძლება, შუა გზიდანაც დავბრუნდე უკან. თუ სხვასთან ერთად ვარ, უკეთეს რამეს შევთავაზებ, რომ უარის თქმა არ მოუნდეს (იცინის). დიპლომატიის უნარიც მაქვს და სხვათა შორის, ეს ძალიან მადგება.

– თუ მერწყულს შეზღუდავ, სამუდამოდ დაკარგავ.

– ზუსტად ასეა. ჩემთვის თავისუფლება ნომერ პირველია. თუმცა, ესეც ზომიერების ფარგლებშია. მაგალითად, ჩემმა მეორე ნახევარმა რომ მითხრას, ათ საათზე სახლში მოდი ან სადმე არ წახვიდეო, ასეთ რამეს ვერ გავიგებ და ვერ მივიღებ. არ უნდა შემზღუდოს. მადლობა ღმერთს, ჩემს მეორე ნახევარს ძალიან კარგად ესმის ჩემი და ხელს მიწყობს. მან ზუსტად იცის, რა მჭირდება.