ქეთი ხატიაშვილი: თავდაყირა დგომა ორ-სამ ძვირად ღირებულ სახის მოვლის პროცედურას უდრის

ქეთი ხატიაშვილი: 2021 წელს უკეთესი მომავლის იმედით ველოდით. ოჯახი ერთად შევხვდით. ტრადიციული კერძები მოვამზადეთ. ჩემი და და დისშვილებიც ჩვენთან იყვნენ და კაჭიც. ყოველ ახალ წელს ნაძვისხეს ახალ სათამაშოს ვამატებთ, რომელიც გასული წლის მოვლენას უკავშირდება და რადგან დედა უკრაინიდანაა, ჩვენს სუფრაზე აუცილებლად ნახავთ „ოლივიეს“ და „შუბას“. მე ძალიან მიყვარს გოჭი და ამ დღეს თავს უფლებას ვაძლევ, მივირთვა. ახალი წლის ღამეს, ლამის, ნახევარი გოჭი შევჭამე (იცინის).
– კარგი მზარეული ხართ?
– სხვათა შორის, გამომდის კერძების მომზადება. ახალ წელსაც მოვამზადე ტოლმა ვაზის ფოთოლში, დაბრაწული სვანური მარილით – ძალიან გემრიელი კერძია. ვერ ვიტყვი, რომ ბევრი კერძის მომზადება ვიცი, მაგრამ რაც მიყვარს და მაინტერესებს, ვცდი ხოლმე და მეგობრები და ოჯახის წევრები მეუბნებიან, გემრიელი ხელი გაქვსო. ძირითადად, ვცდილობ, გემრიელთან ერთად ჯანსაღიც გამომივიდეს, განსაკუთრებით – ბავშვისთვის. მაგალითად, ფხლის კატლეტების გაკეთება ვისწავლე და ანასტასიას ძალიან მოეწონა.
სხვათა შორის, ძალიან მცივანა ვარ და ზამთართან გამკლავება მიჭირს. აქამდე სულ მინდოდა, რომ მალე გასულიყო ზამთარი და წელს ნათია ფანჯიკიძის ძალიან კარგი პოსტი ვნახე. წერდა, ზამთარს ისე შევხედოთ, როგორც პატარა ბავშვს, რომელიც სულ ახალი დაბადებულია და ჩვენ კი ვამბობთ, როდის მოკვდება – როდის გაივლის მალეო. უფრო კარგი იქნება, შევეცადოთ როგორმე გავიფერადოთ ეს პერიოდი და ცოცხალი არსებასავით მივუდგეთო. გულთან ახლოს მივიტანე ეს სიტყვები და შევეცადე გამეთვალისწინებინა. პირველივე დეკემბერს დავიწყეთ სახლის საახალწლოდ მორთვა და ვეცდები, იანვრის ბოლომდე ნაწილობრივ მაინც შევინარჩუნოთ, იმიტომ რომ ძალიან გამიხალისა ახალი წელი და ზამთარიც გამითბო.
– რით იყავით დაკავებული გასულ წელს?
– სხვათა შორის, დიდი მოწონება დაიმსახურა ჩვენმა პროექტმა მთელი საქართველოს მასშტაბით. გავაკეთეთ ონლაინ უფასო ვარჯიშები სოციალურ ქსელებში, რომელსაც უამრავი ნახვა და გამოხმაურება ჰქონდა. ძალიან ბევრი გვიხდიდა მადლობას, რადგან ეს განსაკუთრებით მნიშვნელოვანი ამ პერიოდშია, როცა ბავშვები სახლებში დასხდნენ. შემდეგ დედებისთვისაც გავაკეთეთ ვარჯიშები და მოსაბეზრებელი რომ არ ყოფილიყო, ცეკვებს ვიგონებდით ვარჯიშის ელემენტებითა და მუსიკის თანხლებით ვასრულებდით. ეს ვიდეოები ნახევარ მილიონამდე ნახვას აგროვებდა და კვირიდან-კვირამდე ელოდნენ, რაც ძალიან სასიამოვნოა. პირველი ონლაინშეჯიბრება ჩავატარეთ იმდენი მაყურებლით, რამდენიც ფიზიკურად არ ესწრება ხოლმე. მოკლედ, მიუხედავად ყველაფრისა, ვერ ვიტყვი, რომ პასიური წელი გამოვიდა.
– რაც შეეხება პირად ცხოვრებას – სულ არის საუბარი თქვენსა და დავით კაჭარავას ურთიერთობაზე, ბოლო პერიოდში, შეყვარებულებადაც მოგიხსენიებენ, ზოგი – უკვე ოჯახად. როგორია რეალობა?
– ვიტყვი, რომ კარგად ვართ და დანარჩენს ჩვენთვის შევინახავთ.
– მან ძალიან მნიშვნელოვანი ნაბიჯი გადადგა. ვგულისხმობ სპორტის შემდეგ მომავლის პოლიტიკასთან დაკავშირებას. ბევრმა მხარი დაუჭირა, თუმცა ამ გადაწყვეტილებას კრიტიკაც მოჰყვა. ამ ფონზე საინტერესოა მისი დახასიათება იმ ადამიანისგან, ვინც ძალიან კარგად იცნობს.
– ალბათ, ჩემი მხრიდან ცოტა უხერხულია მასზე საუბარი. თუმცა, ვიტყვი იმას, რომ ძალიან შესტკივა გული საქართველოზე, ჩვენი ქვეყნის მომავალზე და დიდი პასუხისმგებლობით ეკიდება თავის საქმეს. ვინ რას წერს, ამაზე ვერაფერს ვიტყვი, ყველას თავის არჩევანი აქვს.
– ვისაუბროთ ქეთიზე, რომელმაც ნაბიჯ-ნაბიჯ შექმნა საკუთარი კარიერა. რა დაგეხმარათ ამაში?
– ჩემი შემთხვევა მართლა განსხვავებულია სხვა ცნობილი ადამიანებისგან. ჩემი თვისებებიდან დისციპლინას გამოვყოფდი, რაც სპორტმა ჩამომიყალიბა. ეს ყველაფერში მეხმარება. მიჭირს იმ ადამიანებთან ურთიერთობა და მუშაობა, ვისაც დისციპლინა არ აქვს. საკუთარი საქმის სიყვარულიც ძალიან მნიშვნელოვანი მგონია. თუ ის გიყვარს, გაცილებით მეტად ცდილობ წინსვლას და თან, ეს სიამოვნებას განიჭებს. ჩემი აზრით, სხვა შემთხვევაში ძალიან რთული იქნება წარმატების მიღწევა. მე მიყვარს ჩემი საქმე და დღეში 18 საათი რომ ვიმუშავო, კი დავიღლები, მაგრამ სახლში დადებითი ემოციებით დავბრუნდები და არა წუწუნით.
– რა მოგცათ ცნობადობამ და ყურადღების ცენტრში ყოფნამ?
– კიდევ უფრო დიდი რწმენა იმისა, რომ თუ რამე გულით გინდა და შრომა არ გეზარება, აუცილებლად გამოვა. ამის ადრეც მჯეროდა, მაგრამ გეტყვით, რომ არც ჩემი პროექტებიდან გამოდის ყველა კარგი და ზოგი საერთოდაც არ გამოდის, მაგრამ მაინც მჯერა იმის, რომ შეუძლებელი არაფერია. როცა ხალხი გიცნობს, პასუხისმგებლობაც დიდია, მაგრამ ვერ ვიტყვი, რომ რამის გაკეთება მინდა და იმიტომ არ ვაკეთებ, რომ თუნდაც სოციალურ ქსელში ბევრი ადამიანი მადევნებს თვალყურს. ჩემს გამომწერებთან ისეთი ვარ, როგორიც რეალურად.
– ვინც ეკრანსა და სოციალურ ქსელში გაკვირდებათ, მათგან შესაძლოა, ბევრი ფიქრობს, ქეთისთვის ყველაფერი მარტივია – კარგი გარეგნობა აქვს, წარმატებული კარიერა და ვერ წარმოუდგენია, რომ შეიძლება, ქეთის რაღაც არ გამოუვიდეს.
– სხვათა შორის, ბევრია ასეთი, ვინც ფიქრობს, შენ რა გენაღვლება, ხალხი გიცნობს, კარგ ფორმაში ხარ და ყველაფერი გაქვს, რაც გინდაო. გააჩნია, ვინ რითი კმაყოფილდება. მეც არ გამომსვლია ბევრი რამ და ძალიან დამწყვეტია გული, ისე, რომ ღამეც არ დამძინებია, მაგრამ ვაცნობიერებ, რომ ცხოვრება ასეთია. ხან გამოდის, ხან – არა. სპორტშიც ასეა, ხან მოიგებ, ხან – ვერა. როცა რამე არ გამომდის, ვცდილობ, სწორი ანალიზი გავაკეთო, რაც მომავალში მეხმარება. თუ არ გამომივა, ფარ-ხმალს არ ვყრი, პირიქით, ეს მოტივაციას მაძლევს.
– უკრაინელ დედას აღზრდის თავისებური მეთოდები ჰქონდა? რა არის ქეთიში უკრაინული?
– პირველ რიგში, გენსა და სხეულის ფორმებს აღვნიშნავ. ვარჯიშის შედეგიც დიდია, მაგრამ ჩემს დასთან შედარებით, მე შემიძლია, ნორმაზე მეტი ვჭამო, მაგრამ ერთხელ ვივარჯიშო და ზედმეტი კალორიები მაშინვე მოვიშორო. ეს, ალბათ, ყველაზე თვალშისაცემია, რაც დედასგან ბონუსად მერგო. მეორეა აღზრდა და დისციპლინა ბავშვობიდანვე. ძალიან მომწონს, რომ ანასტასიაზეც გადავიდა ეს გავლენა. პირველ რიგში, ის მახარებს, რომ უკვე სამი ენა იცის, ქართული, რუსული და ინგლისური. დედის გავლენა კვებაზეც აისახება: ქართველებს ძალიან უყვართ გემრიელად ჭამა, დედას კი მხოლოდ ჯანსაღი პროდუქტები. მე თუ რამე მავიწყდება, მისი იმედი მაქვს, რომ აუცილებლად მიმითითებს.
– გენეტიკა, ვარჯიში და კიდევ რა არის საჭირო იმისთვის, რომ კარგად გამოიყურებოდე?
– მინდა, ყველას ვუთხრა, რომ აუცილებელია, ბევრი ვიმოძრაოთ. მარტო იმიტომ კი არა, რომ გამხდრები ვიყოთ და
ლამაზი ფორმები გვქონდეს, ეს ჩვენს განწყობაზეც აისახება და ჯანმრთელობაზეც. ყველას გვინდა, ჯანსაღი და ლამაზი სახის კანი გვქონდეს, ამიტომაცაა კარგი თავდაყირა დგომა, ეს სისხლის მიმოქცევას აუმჯობესებს და თქვენ წარმოიდგინეთ, ორ-სამ ძვირად ღირებულ სახის მოვლის პროცედურას უდრის. დღეში ოცდაათი წამი რომ დადგეთ თავდაყირა, ეს ძალიან სასარგებლოა – ეს არც ფინანსებს მოითხოვს და არც ბევრ დროს. მარტო ვარჯიში არა, სახლში თავის მოვლის საშუალებებიც შეგვიძლია მოვამზადოთ. მაგალითად, დედას აქვს არაჩვეულებრივი რეცეპტი: ერთმანეთში უნდა აურიოთ მცირე რაოდენობით C და D ვიტამინები და თმის ძირებში შეიზილოთ. ეს ძალიან აჯანსაღებს თმას.
– მგონია, რომ სამოსს განსაკუთრებულ ყურადღებას აქცევთ.
– კი, ძალიან მიყვარს ლამაზად ჩაცმა და გამიმართლა, რომ როგორც ინფლუენსერს, ბევრ ქართულ ბრენდთან მიწევს მუშაობა. დღის დიდ ნაწილს ვარჯიშში ვატარებ და შესაბამისად, სპორტულად მაცვია. ამიტომ, თუ იმის საშუალება მაქვს, რომ გარეთ გავიდე და განსხვავებულად ჩავიცვა, ვცდილობ, ამით მაქსიმალური სიამოვნება მივიღო.
– ინფლუენსერობის პლიუსებზე და სირთულეებზეც ვისაუბროთ.
– ბევრ ქართულ ბრენდს გავეცანი და მეამაყება, რომ ჩვენს ქვეყანაში ამდენი ძალიან კარგი პროდუქტი იწარმოება. ინფლუენსერობას ბევრი პლუსი აქვს და ყველაფერთან ერთად კარგი შემოსავლის წყაროცაა. ათი წლის წინ ვინ იფიქრებდა, რომ სოციალურ ქსელში ფოტოს დადებით ძალიან დიდ თანხას გამოიმუშავებდი. თუმცა, რთულიცაა, ზოგჯერ მცირე ვადა გაქვს, დამკვეთს არ მოსწონს შენი ფოტო, იღებ კიდევ ერთს, ელოდები დასტურს და ასე შემდეგ. ან მათ მოსწონთ და შენ – არა. თუმცა, უკვე ამასაც მოვერგე.