უფლის გზაზე
ავტორი: „თბილისელები“ 16:00 10.06, 2022 წელი
მეცნიერება, ცოდნა, სიბრძნე
როგორ მდიდრდება სამყარო უბედურებებითა და მწუხარებებით! საჭიროა, რომ არანაკლებ მდიდრდებოდნენ ღვთის შვილები მოწყალების გრძნობებითა და საქმეებით!
***
კარგია, თუ ქვის გული არ გაქვს: მაგრამ ცუდია, თუ მშრალი და დაკრუნჩხული ხელი გაქვს, რომელიც გლახაკისაკენ არ არის გაწვდილი!
***
ადამიანი, რომელსაც შეუძლია, დაეხმაროს ვინმეს და სიკეთე გააკეთოს, – მაგრამ არ აკეთებს, – საბრალო და ამავე დროს, უღირსი ქმნილებაა!
***
ქალწულების გარეშე ცათა სასუფევლის დამკვიდრება შესაძლებელია! მოწყალების გარეშე კი – არა!
***
თუ გლახაკს არაფრად ჩააგდებ, უარგყოფს ის, ვინც მისი გულისთვის დაგლახაკდა; თუ არ გაუღებ მას. ვინც გიკაკუნებდა, – არც შენთვის გაიხსნება ღვთის სასუფევლის კარი; არ შეისმინე მწუხარის კვნესა?! არც უფალი შეისმენს შენი ლოცვის სულთქმას?
„სულიერი მარგალიტი“
***
ცრემლი ყოველი ღატაკისა, რომელიც მადლობას გადაიხდის იმქვეყნად უძვირფასეს ალმასად აკიაფდება. თითოეული ცრემლი, რომლის დაღვრასაც მის მიმართ შენი სიცივე და გულის სისასტიკე დაარღვევინებს, შენს სულს დაეცემა ცეცხლოვან წვეთად ღვთის ტახტის წინაშე.
***
„ღმერთი მოგვცემს!“ – ეუბნებიან ზოგიერთნი მათ, ვინც მოწყალებას სთხოვს. უგუნურად იქცევი, თუ ასე ექცევი გაჭირვებულ მოძმეს! ღატაკს უფალი გიგზავნის, შენ კი მას კვლავ ღმერთს უბრუნებ: „ღმერთი მოგცემს“. ღმერთი კი აუცილებლად მისცემს, მაგრამ შენც მიეცი; ის მისცემს ღატაკებს, მაგრამ გაიღებს კი იგი შენზე თავის წყალობას, რომელიც შენ შეუდარებლად მეტად გჭირდება, ვიდრე – ღატაკს შენი მოწყალება?!
***
გააფრქვიე სიყვარულისა და ქველმოქმედების ზეთი მოყვასთ და ჩააქრობ გეენიის ცეცხლს, რომელიც ცოდვილს დაწვავს.
***
აცხოვნე სხვები, თუ გინდა, რომ ცხონდე, აჩუქე დროებითი ბედნიერება მოყვასს, თუ გინდა, რომ მარადიული ბედნიერებით დატკბე; გაუნაწილე მიწიერი მადლი სხვებს, თუ გსურს, ზეციერი მადლი იგემო!
***
ღვთის წყალობაა ჩვენზე, როდესაც სხვისი დახმარების შესაძლებლობა გვეძლევა.
***
განა ღვთის დიდება წყალობა არ არის ჩვენზე, რომ ყველას გვაქვს უფლება, ჩვენი ცოდვები მოწყალებით გამოვისყიდოა?
***
ნეტარია, ვისაც წმიდა გრიგოლ ნოსელთან ერთად შეუძლია თქვას: „უფალო! ისევე მომექეცი, როგორც მე სხვებს ვექცეოდი!“
ო, საბრალო მიწაზე მოგზაურებო, სად მივდივართ, თუკი არ მივუყვებით ქრისტიანული მოწყალების გზას ქრისტეს მოწყალებისაკენ?!
„სულიერი მდელო“
სიახლეები ამავე კატეგორიიდან
