ჭეშმარიტების გზაზე

– თვითონ მოუსმინე მის ხმას და შენსას, ვის ეჯიბრები?!

მაგრამ ყვავი თავის განზრახვაზე ხელს არ იღებდა – მისთვის მთავარი კამათის პროცესი იყო. მოკლედ, ედავა, ეკამათა, შეეჯიბრა და დამარცხდა, მაგრამ მაინცდამაინც არ სწყენია, რადგან წინ კიდევ ერთი დავა ჰქონდა დაგეგმილი – ჟირაფთან, იმის თაობაზე თუ ვის უფრო მაღალი კისერი აქვს.

* * *

გასაღებსა და კლიტეს ერთმანეთში ჩხუბი მოუვიდათ, არც ერთი არ თმობდა და შერიგებაზე პირველი არ მიდიოდა.

„მე რატომ დავუთმო, – ფიქრობდა გასაღები, – უჩემოდ ის უბრალო რკინის ნაჭერია!“

კლიტეს კი საკუთარი აზრი ჰქონდა ამის თაობაზე:

„თუ დიდხანს გაჯიუტდება, მის მაგივრად სასწრაფოდ ახალს მომიძებნიან“.

ადამიანები კი ელოდნენ-ელოდნენ და კარის კლიტე გამოცვალეს. მერე კი, როცა ნახეს, რომ გასაღები არ მოერგო, ორივე – კლიტეცა და გასაღებიც სანაგვეზე მოისროლეს.

* * *

ერთმანეთს ერის ბრძენკაცი და მონასტრის ბერი შეხვდნენ.

– მამაო, რა არის შენთვის მთავარი, – ჰკითხა ბრძენკაცმა.

– სიწმინდე. ჩემთვის მთავარია, წმინდა ვიყო ღვთისა და ადამიანების წინაშე.

ეჰ, მამაო, სიბრძნე გაცილებით მნიშვნელოვანია.

– რაში მდგომარეობს სიბრძნის არსი?

– განასხვავო სიკეთე ბოროტებისგან.

– სიწმინდე კი ნიშნავს, აკეთო სიკეთე და ეკრძალე ბოროტებას.

– ესე იგი, სიბრძნე სიწმინდისკენ აღმავალი საფეხური ყოფილა, – დაფიქრებით თქვა ბრძენკაცმა.

* * *

ხელოსანმა ფანქარი დაამზადა, მაგრამ სანამ კოლოფში ჩადებდა და სამომხმარებლო ქსელში გაუშვებდა, მას ასეთი სიტყვით მიმართა: ხუთი რამ დაიმახსოვრე, არასდროს დაივიწყო და შენ გახდები ყველაზე კარგი ფანქარი!

პირველი: შენ შეგიძლია, ბევრი დიდი შედევრი შექმნა, მაგრამ ამისთვის საჭიროა, რომ ვინმეს დაემორჩილო და საშუალება მისცე, ხელში დაგიჭიროს.

მეორე: დროდადრო მოგიწევს წვერწათლის მტკივნეული პროცესის დათმენა, მაგრამ ეს აუცილებელია იმისთვის, რომ შენი დანიშნულება კარგად შეასრულო.

მესამე: შენ გექნება საკუთარი შეცდომების გასწორების უნარი, ამიტომ ნუ დატოვებ დაშვებულ შეცდომებს გაუსწორებლად.

მეოთხე: შენი ყველაზე მნიშვნელოვანი ნაწილი ყოველთვის შენ შიგნით იქნება.

მეხუთე: როგორც ზედაპირზე არ უნდა გამოგიყენონ, ყოველთვის უნდა დატოვო შენი კვალი – არ უნდა მიატოვო წერა და ხატვა, რადგან ეს შენი უნარი და თვისებაა.

შენც დაიმახსოვრე, ადამიანო, მსგავსი ხუთი წესი.

პირველი: შენ შეგეძლება ბევრი დიდი საქმე გააკეთო ცხოვრებაში, თუკი ღმერთის ხელს მიეცემი და სხვა ადამიანებსაც საშუალებას მისცემ, ისარგებლონ ღვთისგან ბოძებული შენი ნიჭებით.

მეორე: დროდადრო შენც მოგიწევს მტკივნეული „გათლის“ გადატანა (სხვადასხვა განსაცდელების დათმენა). ეს შენთვის აუცილებელია, რათა ძლიერი ადამიანი გახდე.

მესამე: შენ შეგეძლება საკუთარი შეცდომებისა თუ ცოდვების გამოსწორება გონიერებისა და სინანულის გზით, ამიტომ ხელიდან არ უნდა გაუშვა ეს შესაძლებლობები.

მეოთხე: შენთვის ყველაზე მნიშვნელოვანი პროცესები ყოველთვის შენ შიგნით, შენს გულში გაიმართება.

და მეხუთე: ყველგან, სადაც არ უნდა წახვიდე, შენი კვალი უნდა დატოვო. მიუხედავად გარემოებისა და ვითარებისა, არასდროს შეწყვიტო ღვთის აღმსარებლობა საქმითა თუ სიტყვით, რადგან ეს არის ჭეშმარიტი ქრისტიანის უნარი და თვისება.