ორნი ძმანი „გირჩელები“

ეს ამბავი თავად ზურაბ-გირჩი ჯაფარიძემ გვამცნო – ახალ პოლიტიკურ პლატფორმას ვქმნი, ოღონდ ძველი სახელითო (ეგ როგორო – არ მკითხოთ, ამდენს ჩემი რუხი ნივთიერება ვერ „ქაჩავს“).

არა მხოლოდ სახელი, ლოგოც იგივე გვექნებაო და, ზედაც, დასძინა, ერთიც ყელში ჰქონდა ამოსული საზოგადოებას, მაგრამ მეორესაც დავამატებთ, სავარაუდოდ – იქნებ, სულაც, ამოგახრჩოთო. მე რომ მკითხოთ, ყველაზე საინტერესო ბ-ნი ზურაბ-გირჩის განმარტების ის ადგილია, სადაც ის ამბობს, „გირჩმა“ აჩვენა, რომ პოლიტიკის სუფთად და წესიერად კეთებაა შესაძლებელიო (განსაკუთრებით, სუფთა, როგორც ჩანს, ისაა, ბავშვთა პორნოგრაფიის ყურებას რომ ნორმად გაასაღებ).

ჯერჯერობით არაფერი უთქვამთ ძველ „გირჩებს“, მაგრამ, რაკი ზურაბ-გირჩი გვპირდება, რომ ორი „გირჩობა“ კონკურენციას შეუწყობს ხელს და პოლიტბაზარზე დარჩება ის, ვინც უფრო ძლიერი აღმოჩნდება, უფასოდ ვთავაზობ იდეას – ვინც უფრო სწრაფად გაბერავს ეკლესიას, გამარჯვებულადაც ის გამოცხადდეს ან, სულაც, ის, ვისაც უფრო მეტი საბავშვო პორნოსთვის უცქერია.