კრემლის ექსკლუზივი

იმის გათვალისწინებით, რომ დასავლური სანქციები რუსეთის მოსახლეობაზეც იმოქმედებს (ვისთვისაც სულერთია, შია თუ სწყურია, მთავარია, მათ სახელმწიფოს ბევრი მიწა ჰქონდეს), რაც მთავარია, ჩინოვნიკ-პოლიტიკოს-ფულიანებსაც შეეხოთ. შესაბამისად, იოლად მისახვედრია, რომ გარემოცვას უჯანყებენ ვლადიმირს.

მეორე მხრივ, ისიც ფაქტია, რომ რფ-ის ხელმძღვანელობა მზად იქნებოდა სანქციებისთვის, თუმცა, როგორც ლავროვმა შენიშნა, არ ელოდნენ, თუ ისინი კულტურისა და ხელოვნების სფეროს წარმომადგენლებსაც შეეხებოდა.

ვფიქრობ, რუსული დიპლომატიის წარმოშობით თბილისელი პირველკაცი თვალთმაქცობს, ვინაიდან 2008 წლის ომის შემდეგ რფ-ის ხელისუფლების ბრძანებით რუსეთის ყველა სკოლაში ქართულგვარიან მოსწავლეებს დაერივნენ და სკოლებიდან ყრიდნენ (სადაც – ხელოვანი და სპორტსმენი, იქაც – ბავშვი, მეტიც, ბავშვი უფრო ფაქიზი თემაა). მაგრამ, როგორც უნდა იყოს, არანაკლებ საინტერესოა ლავროვის განაცხადის („ალ ჯაზირას“ ჟურნალისტთან საუბრისას) აი, ეს ნაწილი: „მათ (ანუ დასავლელებმაო) მიაფურთხეს ყველა იმ პრინციპს, რომლებსაც საერთაშორისო ასპარეზზე ნერგავდნენ, როდესაც დაიწყეს როგორც რუსეთის ცენტრალური ბანკის, ასევე ჩვენი კერძო კომპანიების აქტივების მიტაცება. ეს უბრალოდ ქურდობაა. მათ უარი თქვეს ყველა იმ წესზე, რომლებსაც საერთაშორისო ცხოვრებაში 70 წელზე მეტი ნერგავდნენ. ეს წესები მათ უბრალოდ გადახაზეს და დაუბრუნდნენ ბანდიტურ, ველურ კაპიტალიზმს „ოქროს ციებ-ცხელების“ დროინდელს.“

ანუ ნომერ პირველი რუსი დიპლომატი მიანიშნებს, რომ მიფურთხება და სხვისი კუთვნილის მიტაცება ველიკორუსული ექსკლუზივი ჰგონია. ამასობაში კი გაირკვა, რომ კატების საერთაშორისო ასოციაციიდან 6 რუსული კატა გაურიცხავთ: ისინი გამოფენებში ვეღარ მიიღებენ მონაწილეობას. ჰოდა, აი, ამ ყველაფრიდან გამომდინარე, მიჩნდება არც თუ სასიამოვნო ეჭვი, დასავლეთმაც პოლიტთამაშის რუსული წესებით ხომ არ წამოიწყო თამაში?! არც თუ სასიამოვნო, ვინაიდან ერთნაირმა წესებმა ერთმანეთის მიმსგავსება იცის...