ცაცხვის გასაოცარი თვისებები

ცაცხვისაგან იღებენ კუპრს, რომლითაც მკურნალობენ ეგზემას. მას კანის დაზიანებულ უბნებზე უსვამენ. ხველის დროს პაციენტს ზურგზე აფენენ კუპრით გაჟღენთილ ნაჭერს.

ცაცხვის ყვავილს სხვაგვარად „ცაცხვის ფერსაც“ უწოდებენ. ხალხური მედიცინა ფართოდ იყენებს როგორც მისგან დამზადებულ ნაყენებს, ასევე ნახარშებს.

ცაცხვის ყვავილები შეიცავს გლიკოზიდ ტალიცინს, C და სხვა ვიტამინებს, ფლავონოიდებს, კაროტინს, ეთერზეთებს, სათრიმლავ ნივთიერებებს, კუმარინს, საპონინებს, ცვილს, გლუკოზას და სხვა შაქრებს, მაკრო და მიკროელემენტებს.

პრეპარატები, რომელთაც ცაცხვის ყვავილისგან ამზადებენ, გამოირჩევა შარდმდენი და ოფლმდენი (გლიკოზიდ ტილიაცინის ეფექტი) მოქმედებით, კუჭის წვენის გამოყოფის გაძლიერებით, ასტიმულირებს საჭმლის მომნელებელი ჯირკვლების სეკრეციას, აადვილებს ნაღვლის გამოყოფას. აღნიშნულ პრეპარატებს, აგრეთვე, აქვთ ანთების საწინააღმდეგო და დამაწყნარებელი მოქმედება. მათ წარმატებით იყენებენ როგორც სიცხის დამწევ და ბაქტერიოციდულ საშუალებებს სხვადასხვა ანთებითი დაავადების დროს. რეკომენდებულია გასტრიტის (კუჭის ლორწოვანი გარსის ანთების), გრიპის, ცხელებით მიმდინარე დაავადებების დროს, პირისა და ყელის გამოსავლებად გინგივიტის, ლარინგიტის, სტომატიტის დროს.

ცაცხვის ყვავილი სხვა მცენარეებთან კომბინაციაში გამოიყენება სამკურნალო ნაყენების დასამზადებლად. აღნიშნული ნაყენები რეკომენდებულია რევმატული და პოდაგრული გენეზის სახსრების ტკივილის გასაყუჩებლად, ჰემოროიდული კვანძების ანთების ჩასაცხრობად, ჭრილობების მოსაშუშებლად. ცაცხვის ყვავილების (როგორც ცალკე, ასევე, სხვა მცენარეებთან კომპლექსში) ნაყენი, ეგრეთ წოდებული, ცაცხვის ჩაი, სასიამოვნო არომატით, ოქროს ფერითა და სამკურნალო თვისებებით გამორჩეული სასმელია. ეს ჩაი ცხელი სახით უნდა მიირთვათ ძილის წინ გაციების, ხველის, თავის ტკივილის დროს.

ცაცხვის ყვავილის ნახარში ასტიმულირებს კუჭის წვენის გამოყოფას, ხსნის სპაზმებს, გამოიყენება როგორც მეტეორიზმის, ისე დიარეის დროს:

4 სადილის კოვზ ცაცხვის ყვავილს დაასხით 1 ლიტრი წყალი, წამოადუღეთ, შეაგრილეთ, გაწურეთ. სვით ნახევარი ჩაის ჭიქა თბილი ნახარში 2-3-ჯერ დღეში.

ჰომეოპათები ცაცხვის ყვავილის ნახარშს უნიშნავენ ცენტრალური ნერვული სისტემისა და შაკიკის დროს, როგორც დამამშვიდებელ საშუალებას:

1 სადილის კოვზ ყვავილს დაასხით 1 ჩაის ჭიქა მდუღარე წყალი, გააჩერეთ 40 წუთი, გაწურეთ და სვით 100-150 მილილიტრი თბილი ნაყენი 3-4-ჯერ დღეში.