საგანგაშო სიგნალები გულმკერდის არეში

ბავშვთა კარდიოლოგის გამოკვლევას აუცილებლად საჭიროებენ 0-16 წლამდე ასაკის ბავშვები, რადგან დაავადება შესაძლოა, უსიმპტომოდ მიმდინარეობდეს ან ისეთი სიმპტომებით, რომელიც მშობელმა ვერ შეამჩნიოს, მომავალში კი გულ-სისხლძარღვთა სისტემის შეუქცევადი ცვლილებები გამოიწვიოს.

სიმპტომები სხვადასხვა ასაკის ბავშვებში განსხვავებულია.

საგანგაშო სიმპტომები მეძუძურ ახალშობილებში:

კვებასთან დაკავშირებული პრობლემები: კვების დროს ადვილად დაღლა, სუსტი წოვა, ქოშინი, ოფლიანობა, ცხვირ-ტუჩის სილურჯე;

კანისა და ლორწოვანის სილურჯე ან სიფერმკრთალე;

წონაში ნელი მატება;

ხშირი და უმიზეზო ტირილი, ამასთან ტირილის დროს ბავშვის გაფერმკრთალება ან გალურჯება.

საგანგაშო სიმპტომები სკოლამდელ და სკოლის ასაკის ბავშვებში:

სწრაფი დაღლა ფიზიკური დატვირთვისას;

თავბრუ და სისუსტე;

გულისწასვლა ან გულისწასვლის წინა მდგომარეობა;

გულმკერდის არეში ტკივილი და უსიამოვნო შეგრძნება (ჩხვლეტითი ტკივილი, გულის ფრიალი, გულისცემის უეცარი აჩქარება ან შენელება).

როდის მივმართოთ ბავშვთა კარდიოლოგს?

თუ პედიატრს აქვს ეჭვი გულის პათოლოგიის არსებობაზე;

გამოსარიცხია გულის თანდაყოლილი მანკი და გულის რიტმის დარღვევები;

თუ ოჯახის წევრებს აქვთ გულის პათოლოგიები;

თუ მშობლების აქვს მავნე ჩვევები;

ორსულობის პერიოდში გადატანილი ინფექციების ან სხვა მდგომარეობების დროს, რაც ამძიმებდა ორსულის მდგომარეობას.

თუ თქვენ ამჩნევთ, რომ ბავშვი:

ხშირად უხალისოდაა;

ადვილად იღლება;

ნაკლებად მოძრაობს;

უფერულია;

ცხვირ-ტუჩის არე მოლურჯო ფერის აქვს;

გაძლიერებული აქვს გულისცემა –

აუცილებლად მიმართეთ ბავშვთა კარდიოლოგს.