რა მიანიშნებს ბავშვის ორგანიზმში ჭიების არსებობაზე

საჭმლის მომნელებელი სისტემის პრობლემები:

* მუცლის ტკივილი: ხშირად აღინიშნება მუცლის შებერილობა, სპაზმური ტკივილები, განსაკუთრებით ჭამის შემდეგ ან ღამით. ტკივილის ლოკალიზაცია შეიძლება, იყოს ჭიპის არეში;

* გულისრევა და ღებინება: ზოგიერთ შემთხვევაში ბავშვს შეიძლება, ჰქონდეს გულისრევის შეგრძნება და იშვიათად – ღებინება;

* დიარეა ან ყაბზობა: ჭიებმა შეიძლება, გამოიწვიოს როგორც ფაღარათი (დიარეა), ასევე, შეკრულობა (ყაბზობა), რაც დამოკიდებულია ჭიის ტიპზე და ორგანიზმის ინდივიდუალურ რეაქციაზე;

* მადის ცვლილებები: ბავშვს შეიძლება მოემატოს ან დაუქვეითდეს მადა. ზოგიერთ შემთხვევაში აღინიშნება ტკბილეულის მიმართ გაძლიერებული ლტოლვა;

* წონის კლება: მიუხედავად ნორმალური ან მომატებული მადისა, ბავშვმა შესაძლოა, დაიწყოს წონაში კლება, რადგან ჭიები ორგანიზმიდან საკვებ ნივთიერებებს ითვისებენ;

* ანალური ქავილი: ეს არის ერთ-ერთი ყველაზე დამახასიათებელი ნიშანი, განსაკუთრებით ღამით.

ზოგადი სიმპტომები:

* დაღლილობა და სისუსტე: ბავშვი ხდება მოთენთილი, ენერგიის ნაკლებობით, გაღიზიანებული;

* ძილის დარღვევა: ანალური ქავილის გამო ბავშვს უჭირს დაძინება, ხშირად ეღვიძება ღამით;

* გაღიზიანებადობა და ცუდი ხასიათი: ბავშვი ხდება უფრო ჭირვეული, ადვილად ღიზიანდება;

* კანის პრობლემები: ზოგიერთ შემთხვევაში შეიძლება, გამოვლინდეს კანის გამონაყარი, ალერგიული რეაქციები, კანის სიმშრალე;

* ანემია: რკინადეფიციტური ანემია ხშირი თანმხლები პრობლემაა, რადგან ჭიები ხელს უშლიან ორგანიზმში რკინის ათვისებას. ეს გამოიხატება სიფერმკრთალით, სისუსტით, თავბრუსხვევით;

* კბილების კრაჭუნი ძილის დროს (ბრუქსიზმი): მიუხედავად იმისა, რომ ეს ნიშანი ყოველთვის არ მიუთითებს ჭიებზე, ხშირად ასოცირდება მათთან;

* ლიმფური კვანძების გადიდება: იშვიათად, მაგრამ ზოგიერთი ტიპის ჭიამ შეიძლება, გამოიწვიოს ლიმფური კვანძების გადიდება.