მარწყვის სამკურნალო თვისებები

მოგაწვდით მარწყვის ძირითად სამკურნალო თვისებებს:

* ანტიოქსიდანტური მოქმედება – მარწყვი მდიდარია ანტიოქსიდანტებით, როგორიცაა: C ვიტამინი, ანტოციანინები, ელაგის მჟავა. ეს ნივთიერებები ებრძვიან თავისუფალ რადიკალებს და ამცირებენ სიბერის პროცესს, აძლიერებენ იმუნიტეტს და ხელს უწყობენ კანის ჯანმრთელობას;

* გულის ჯანმრთელობა – მარწყვი ამცირებს „ცუდ“ ქოლესტერინს და აძლიერებს სისხლძარღვების კედლებს. ასევე, ხელს უწყობს არტერიული წნევის ნორმალიზებას და ამცირებს გულის დაავადებების რისკს;

* შაქრის რეგულაცია – მიუხედავად იმისა, რომ მარწყვი ტკბილია, მას დაბალი გლიკემიური ინდექსი აქვს და შეიძლება, სასარგებლო იყოს დიაბეტის მქონე პირებისთვისაც. ის ხელს უწყობს სისხლში შაქრის სტაბილურობას;

* ანთების საწინააღმდეგო თვისებები – მარწყვში შემავალი ფენოლური ნაერთები ამცირებს ორგანიზმში ანთებით პროცესებს, რაც განსაკუთრებით სასარგებლოა ართრიტისა და ქრონიკული დაავადებების დროს;

* საჭმლის მომნელებელი სისტემის გაუმჯობესება – მდიდარია ბოჭკოებით, რაც აუმჯობესებს კუჭ-ნაწლავის მოქმედებას. ხელს უშლის ყაბზობას და წმენდს ნაწლავებს;

* კანისა და თმის სიჯანსაღე – მარწყვში არსებული C ვიტამინი კოლაგენის სინთეზს აძლიერებს, რაც აუცილებელია კანის ელასტიკურობისთვის. ასევე, ხელს უწყობს თმის ზრდას და განახლებას;

* შარდმდენი და დეტოქსიკაციის თვისებები – მარწყვს ორგანიზმიდან გამოაქვს ტოქსინები და ჭარბი სითხე. სასარგებლოა თირკმლებისა და ღვიძლის ფუნქციის გაძლიერებისთვის.

რჩევები გამოყენებისთვის: მიირთვით ახალი, მწიფე მარწყვი დღის პირველ ნახევარში. მოერიდეთ ზედმეტის ჭამას, განსაკუთრებით ისინი, ვისაც აქვს კუჭის ან ალერგიული პრობლემები.

ხალხურ მედიცინაში მარწყვის ფოთლებიც გამოიყენება – განსაკუთრებით ჩაის სახით შარდმდენად ან მონელების გასაუმჯობესებლად. ის ხელს უწყობს ორგანიზმის გაწმენდას, ამშვიდებს და აძლიერებს იმუნიტეტს.

გთავაზობთ რამდენიმე რეცეპტს:

მარწყვის ფოთლების ჩაი

* 1 ჩაის კოვზი გამხმარი მარწყვის ფოთოლი, 1 ჩაის ჭიქა (200 მილილიტრი) ადუღებული წყალი.

მომზადება: ჩაყარეთ ფოთლები ჭიქაში ან ჩაიდანში, დაასხით ადუღებული წყალი, დააფარეთ თავსახური და დატოვეთ 10-15 წუთით. გადაწურეთ და მიირთვით თბილი. ის ავლენს შარდმდენ, ანთების საწინააღმდეგო და მსუბუქ დამამშვიდებელ მოქმედებას.

მარწყვის ფოთლებისა და პიტნის ჩაი

1 ჩაის კოვზი მარწყვის ფოთოლი, 1 ჩაის კოვზი პიტნა, 200 მილილიტრი წყალი.

მომზადება: ჩაამატეთ ორივე მცენარე ადუღებულ წყალში, დააყენეთ 10 წუთით, გადაწურეთ და სურვილისამებრ დაამატეთ თაფლი. ამშვიდებს ნერვულ სისტემას, აუმჯობესებს ძილსა და კუჭის მოქმედებას.

დეტოქს ჩაი მარწყვის ფოთლებითა და იასამნით

1 ჩაის კოვზი მარწყვის ფოთოლი, რამდენიმე იასამნის ყვავილი, 200 მილილიტრი წყალი.

მომზადება: დააყენეთ ორივე მცენარე 10-15 წუთით ადუღებულ წყალში, გადაწურეთ და მიირთვით. აძლიერებს დეტოქსიკაციას, ამცირებს შეშუპებას და აუმჯობესებს თირკმლების ფუნქციას.

გახსოვდეთ, ჩაი არ არის რეკომენდებული მარწყვის მიმართ ალერგიის მქონეთათვის. ორსულებმა და მეძუძურებმა გამოყენებამდე უმჯობესია გაიარონ ექიმთან კონსულტაცია.