ყურძნის გასაოცარი თვისებები

ყურძნის ძირითადი სამკურნალო თვისებები:

* გულ-სისხლძარღვთა სისტემა: ყურძენი შეიცავს ძლიერ ანტიოქსიდანტებს, განსაკუთრებით რესვერატროლსა და პროანტოციანიდინებს (OPC), რომლებიც ხელს უწყობენ სისხლძარღვების კედლების გამაგრებას და აუმჯობესებენ სისხლის მიმოქცევას. ამ ნივთიერებებს შეუძლიათ, შეამცირონ, ეგრეთ წოდებული, „ცუდი“ ქოლესტერინის დონე და თავიდან აგაცილონ თრომბის წარმოქმნა. ეს ყველაფერი კი გულის დაავადებების რისკს ამცირებს;

* საჭმლის მომნელებელი სისტემა: ბოჭკოს მაღალი შემცველობის წყალობით, ყურძენი აუმჯობესებს ნაწლავების მუშაობას და ხელს უშლის შეკრულობას. გარდა ამისა, ყურძნის ორგანული მჟავები აძლიერებს კუჭქვეშა ჯირკვლის მოქმედებას;

* იმუნური სისტემა და ანთება: ყურძენში შემავალი ანტიოქსიდანტები იცავენ ორგანიზმის უჯრედებს თავისუფალი რადიკალების მიერ გამოწვეული დაზიანებისგან, რაც ორგანიზმში ანთებით პროცესებს ამცირებს და იმუნიტეტს აძლიერებს;

* ნერვული სისტემა: ყურძენი მდიდარია ადვილად ათვისებადი შაქრით, გლუკოზით, რომელიც ნერვული უჯრედების კვების ძირითადი წყაროა. ყურძნის წვენის ყოველდღიური მიღება კი ხელს უწყობს სტრესისა და დეპრესიის დაძლევას;

* სისხლნაკლებობა: ყურძენი სასარგებლოა სისხლნაკლებობის დროს, რადგან შეიცავს ვიტამინებს (ფოლიუმის მჟავა, K და P ვიტამინები), რომლებიც ხელს უწყობენ სისხლის წარმოქმნას, სისხლის შედედებას და სისხლძარღვების კედლების გამაგრებას;

მნიშვნელოვანია, იცოდეთ: მიუხედავად იმისა, რომ ყურძენს უამრავი სარგებელი აქვს, არსებობს გარკვეული უკუჩვენებები. შაქრის მაღალი შემცველობის გამო დიაბეტით დაავადებულებმა ის სიფრთხილითა და შეზღუდული რაოდენობით უნდა მიიღონ. ასევე, სიფრთხილეა საჭირო კუჭ-ნაწლავის დაავადებების, მაგალითად, გასტრიტის ან წყლულის გამწვავების დროს.

ყურძნის ჯიშებს შორის სასარგებლო თვისებებით განსაკუთრებით გამოირჩევა შავი ყურძენი, რადგან ის უფრო მეტ ანტიოქსიდანტს შეიცავს. ხალხური მედიცინა საუკუნეების განმავლობაში იყენებდა ყურძენს სხვადასხვა დაავადების სამკურნალოდ.

გთავაზობთ რამდენიმე მარტივ და ეფექტურ რეცეპტს.

ყურძნის წვენის გამოყენება სხვადასხვა დაავადების დროს:

1. ამოსახველებელი საშუალება ბრონქიტის დროს:

* ერთი ჭიქა ყურძნის წვენი გაათბეთ ოთახის ტემპერატურაზე. დაამატეთ მას 1 ჩაის კოვზი თაფლი.

* მიღების წესი: დალიეთ ეს ნარევი დღეში 3-ჯერ. ის ხელს უწყობს ნახველის გათხელებას და ორგანიზმიდან გამოდევნას, ამშვიდებს ყელის ტკივილს და ამცირებს ხველას.

2. ნერვული სისტემის დასამშვიდებლად და უძილობის დროს:

* ძილის წინ დალიეთ ნახევარი ჭიქა ახალგამოწურული ყურძნის წვენი.

* მიღების წესი: რეგულარული გამოყენების შემთხვევაში, ის დაგეხმარებათ სტრესის შემცირებაში, ნერვული დაძაბულობის მოხსნაში და ღრმა, მშვიდი ძილის უზრუნველყოფაში.