ექიმის რჩევები
ავტორი: „თბილისელები“ 16:00
კითხვა: რამ შეიძლება გამოიწვიოს უცაბედი ყელის გამოშრობა და ხველების ატეხვა, შემდეგ კი სუნთქვის მსუბუქი გაძნელება?
პასუხი: ეს სიმპტომები ყველაზე ხშირად ხორხის სპაზმს (ლარინგოსპაზმს) ან მწვავე ალერგიულ რეაქციას ახასიათებს. ძირითადი მიზეზები შეიძლება, იყოს ალერგენთან კონტაქტი (მტვერი, მკვეთრი სუნი ან საკვები); ან რეფლუქსი – კუჭის წვენის ამოტყორცნა ყელში, რაც მყისიერ გაღიზიანებას და ხველას იწვევს; მშრალი ჰაერი ან გაუწყლოება, რაც ლორწოვანს მგრძნობიარეს ხდის; ან ნერვული ფონი – ძლიერი სტრესის დროს ყელის კუნთების სპაზმი. თუ სუნთქვის გაძნელება პროგრესირებს, აუცილებელია სასწრაფო დახმარება, რადგან ეს შესაძლოა, იყოს ანაფილაქსიის ან ასთმური შეტევის დასაწყისი.
კითხვა: ძალიან მაწუხებს მხრის ტკივილი, გადავიღე რენტგენი და აღმომაჩნდა ძვლოვანი წანაზარდი – ოსტეოფიტი. რომელ სპეციალისტს ან მკურნალობის რა ფორმას მივმართო?
პასუხი: როდესაც ტკივილის მართვა ანთების საწინააღმდეგო და ტკივილგამაყუჩებელი პრეპარაეტბით არ ხერხდება და მოძრაობა იზღუდება, მიმართავენ ქირურგიულ მეთოდს. მდგომარეობის ობიექტურად შესაფასებლად და მკურნალობის ტაქტიკის განსაზღვრისთვის ორთოპედ-ტრავმატოლოგს მიმართეთ.
კითხვა: პლაგიოცეფალიასთან დაკავშირებით მაქვს კითხვა: მაქვს თავის ქალის დეფორმაცია, მასთან ერთად სახისაც, როგორ არის შესაძლებელი მკურნალობა? (ასაკი – 18 წლის).
პასუხი: ზრდასრულ ასაკში პლაგიოცეფალიის პრობლემის გადაჭრის ერთადერთი მეთოდი არის ქირურგიული ჩარევა, მაგრამ ოპერაცია იმდენად დამღლელია, ამასთან, დიდია შესაძლო გართულებების რისკიც, რომ ქირურგები ამგვარ ჩარევას, ჩვეულებრივ, არ მიმართავენ.
სიახლეები ამავე კატეგორიიდან
