დავამარცხოთ კისრის ტკივილი

კისრის ტკივილი და დაჭიმულობა ამ საუკუნის მნიშვნელოვანი პრობლემა გახდა, რაც დიდწილად ტექნოლოგიების განვითარებითაა გამოწვეული.

ამის მიზეზი შეიძლება იყოს, როგორც ოსტეოართროზი, ისე კისრის ან ზურგის დაზიანება. ხშირ შემთხვევაში კისრის კუნთების დაჭიმულობა სტრესსაც ახასიათებს.

ამ პრობლემის მოსაგვარებლად აუცილებელია როგორც ცხოვრების წესის მოწესრიგება, ისე სამუშაო გარემოში განტვირთვა. თუ თქვენ სისტემატურად შეასრულებთ მარტივ ვარჯიშებს, კისრის კუნთები გაგიძლიერდებათ, რაც თავიდან აგარიდებთ დაძაბულობასა და დაჭიმულობას.

სამსახურში, სადაც დიდი ხნით გიწევთ ჯდომა, სწორი პოზიცია უნდა აირჩიოთ – თქვენი მუხლები უნდა იყოს თეძოებზე ოდნავ ქვემოთ. ზურგი კი ვერტიკალურ მდგომარეობაში უნდა შეინარჩუნოთ და ხელები მაგიდაზე გეწყოთ.

იმ შემთხვევაში, თუ დიდი დროის განმავლობაში გიწევთ მობილური ტექნოლოგიის გამოყენება, უნდა გაითვალისწინოთ შემდეგი რჩევები:

• ტელეფონი გეჭიროთ თვალის სიმაღლეზე;

• ნუ დაიჭერთ მობილურს მხარსა და ყურს შორის;

• საათში ერთხელ დაისვენეთ სმარტფონისგან.

შესვენებისას გააკეთეთ კისრის ვარჯიშები შემდეგნაირად:

• გადაატრიალეთ მხრები წინ და უკან;

• ნელა გადაწიეთ თავი მხრის მიმართულებით, ორივე მხარეს;

• თავი შეამოაბრუნეთ ჯერ ერთ მხარეს, შემდეგ – მეორე მხარეს.

ეს მარტივი გაწელვები ტონუსში ამყოფებს კისრის კუნთებს.

მასაჟი ჩოგბურთის ბურთის დახმარებით – აიღეთ ჩოგბურთის ბურთი და კეფის სხვადასხვა მიმართულებით დამასაჟება დაიწყეთ. თუ გამკვრივებას იგრძნობთ, ბურთს ამ ადგილას უფრო ძლიერად დააწექით და 20-30 წამის განმავლობაში გაიჩერეთ, შემდეგ კი მასაჟი კვლავ ჩვეულებრივად გააგრძელეთ. ჩოგბურთის ბურთი კისრის მობილობის აღდგენასა და დაძაბული კუნთების მოდუნებაში დაგეხმარებათ.

კისრის გაჭიმვები - კისრის წინა კუნთების გაჭიმვების შესასრულებლად თავი უკან გადასწიეთ და ასეთ პოზაში 15 წამით დარჩით. შემდეგ თავი საწყის პოზიციაში დააბრუნეთ. ამის შემდეგ ნიკაპი მკერდს მიაბჯინეთ და 15 წამით ასეთ მდგომარეობაში გაჩერდით. პროცედურა 10-ჯერ გაიმეორეთ. კისრის უკანა კუნთები რომ გაჭიმოთ, თავი მარჯვნივ მიაბრუნეთ, ეცადეთ, ყური მარჯვენა მხარს მიაბჯინოთ. ასეთ მდგომარეობაში 30 წამით გაჩერდით, შემდეგ საწყის მდგომარეობას დაუბრუნდით და მეორე მხარეს გააკეთეთ. პროცედურა 10-ჯერ გაიმეორეთ. კისრის კუნთების გაჭიმვები სწორი პოზის დაბრუნებაში დაგეხმარებათ და კუნთების დაძაბულობასაც მოგიხსნით.

ნიკაპის მოძრაობა – სწორად დაჯექით და თითები ნიკაპზე დაიდეთ. საკუთარ თავს უყურეთ და ნიკაპი ფრთხილად წაიღეთ ყელისკენ, სანამ თავის დაჭიმულობას არ იგრძნობთ. ასეთ პოზიციაში 5 წამით გაჩერდით, შემდეგ ნიკაპი კვლავ უკან გასწიეთ. გაიმეორეთ ათჯერ. მსგავსი მოძრაობა თავის მდგომარეობის გასწორებაში, ხერხემლის დაჭიმულობის შემცირებასა და კისრის კუნთების მოდუნებაში დაგეხმარებათ.

გაითვალისწინეთ: არ არის სასურველი მუცელზე ძილი. სჯობს, ზურგზე ან გვერდით პოზიციაში იძინოთ.

კისრის ანთებისგან რომ გათავისუფლდეთ, წაისვით ყინული 20 წუთის განმავლობაში, დღეში რამდენჯერმე. ასევე, სასარგებლოა თბილი კომპრესების გამოყენება. მიზნის მიღწევაში მარილიანი, თბილი აბაზანებიც დაგეხმარებათ.

სითბო მოადუნებს კუნთებს, მარილს კი ანთების საწინააღმდეგო ეფექტი ექნება და გააუმჯობესებს სისხლის მიმოქცევას.

გარდა ამისა, შეგიძლიათ, კისერზე ნაზად შეიზილოთ პიტნის, ლავანდისა და ქოქოსის ეთერზეთის ნარევი და თან, დაიმასაჟოთ.

კისრის ტკივილის საწინააღმდეგოდ ძალიან სასარგებლოა ვაშლის ძმარი. მასში შემავალ ანტიოქსიდანტებს ანთების საწინააღმდეგო ეფექტი აქვთ, ხსნის სტრესსა და კუნთების დაჭიმულობას.

დაასველეთ ხელსახოცი ან ქსოვილი ვაშლის ძმარში და დაიფინეთ კისერზე, დაიტოვეთ ერთი საათის განმავლობაში, გაიმეორეთ დღეში ორჯერ.