ცხარე წვნიანი ხორცით
ავტორი: „თბილისელები“ 12:00 27.07, 2021 წელი
„თბილისელები“ ცხარე წვნიანი კერძის რეცეპტს გიზიარებთ:
საჭირო ინგრედიენტები:
🔸 400 გრამი ხორცის ფარში
🔸 150 გრამი ბრინჯი
🔸 ნახევარი თავი ხახვი
🔸 1 კვერცხი
🔸 1 სადილის კოვზი ტომატ-პასტა
🔸 1 ჩაის კოვზი მარილი, ზეთი
წვნიანი:
🔸 1 ხახვი
🔸 1 ბულგარული წიწაკა
🔸 1 ცალი სტაფილო
🔸 100 გრამი ნიახურის ძირი
🔸 1,5 ლიტრი კუბიკის ბულიონი
🔸 200 გრამი პომიდორი თავისივე წვენში
🔸 ცოტა ცხარე წიწაკა, ზეთი
🔸 400 გრამი კარტოფილი
🔸 კამა, ქინძი, მარილი
მომზადების წესი:
ფარშში ჩაუმატეთ გარეცხილი ბრინჯი, წვრილად დაჭრილი ხახვი, კვერცხი, ტომატ-პასტა და მარილი. აურიეთ ძალიან კარგად. ამ ფარშისგან გააკეთეთ გუფთები, სასურველია მომცრო ზომის. ტაფაზე გააცხელეთ ერთი სადილის კოვზი ზეთი. ძლიერ ცეცხლზე შეწვით გუფთები. გადმოალაგეთ თეფშზე.
წვრილად დაჭერით ხახვი, ბულგარული წიწაკა კი – ჩხირებად. სტაფილო ჯერ შუაში გაჭერით, შემდეგ დაჭერით ძალიან თხელ ფირფიტებად. ნიახურის ძირები კი – რგოლებად. სუპისთვის მოამზადეთ პომიდორი საკუთარ წვენში, პომიდორს კანი გადაცლილი უნდა ჰქონდეს.
ქვაბში გააცხელეთ ერთი სადილის კოვზი ზეთი. მოშუშეთ ხახვი და ბულგარული წიწაკა. დაუმატეთ პომიდორი წვენით და აურიეთ კარგად. დაასხით ბულიონი. აადუღეთ. ჩაუმატეთ სტაფილო, ნიახურის ძირები, ცხარე წიწაკა, მარილი. ჩაყარეთ გუფთები და ხარშეთ, დაახლოებით, 12 წუთი. ჩაუმატეთ კუბიკებად დაჭრილი კარტოფილი. კიდევ 20 წუთი ხარშეთ. სულ ბოლოს მოაყარეთ დაჭრილი კამა და ქინძი.
გემრიელად მიირთვით!
სიახლეები ამავე კატეგორიიდან