თევზი პიკანტურ სოუსში გია სურამელაშვილისგან
ავტორი: „თბილისელები“ 12:00 25.08, 2022 წელი
გია სურამელაშვილი საყვარელი კერძის რეცეპტს თბილისელებს უზიარებს 👇
საოცარი გურმანი ვარ, მიყვარს პიკანტური გემოები და იმავდროულად, ტრადიციული გემრიელი ქართული კერძები. თავადაც გადასარევი ხელი მაქვს, არ მეზარება და პირიქით, მიყვარს იმ კერძების მომზადება, რაც იმწუთას მომინდება. ჩემს მაცივარში ყოველთვის არის პროდუქტების დიდი ასორტიმენტი, რადგან კაცმა არ იცის, რა დროს რა საჭმელი მომინდება (იცინის). ალბათ, ბევრს ვერ წარმოუდგენია, მაგრამ არაჩვეულებრივ ხარჩოს, სალათებს, ხორცის კერძებს, აჯაფსანდალს, დაბრაწულ თევზს და ქათამს ვამზადებ სხვადასხვა სოუსებში. ჟურნალ „თბილისელების“ მკითხველებს კი შევთავაზებ თევზის მომზადებას, რომელიც თითქოს ტრადიციულია, მაგრამ ბევრი ასე არ ამზადებს, არადა უგემრიელესი გამოდის.
საჭირო ინგრედიენტები:
🔸 1 კილოგრამი თევზი
🔸 500 გრამი მაიონეზი
🔸 100 მილილიტრი ზეთი
🔸 200 გრამი მჭადის ფქვილი
🔸 5-6 კბილი ნიორი
🔸 მარილი
🔸 ხმელი ქინძი
🔸 წითელი პილპილი და ყვითელი ყვავილი კი – გემოვნების მიხედვით.
მომზადების წესი 👩🍳
თევზი გარეცხეთ, დაჭერით საშუალო ზომის ნაჭრებად, ამოავლეთ მარილიან სიმინდის ფქვილში, შეწვით ზეთში ორივე მხრიდან, გადმოიღეთ ღრმა ჭურჭელში თავის ცხიმიანად და მოასხით მომზადებული მაიონეზის სოუსი, რომელიც ასე უნდა მოამზადოთ – მაიონეზს დაამატეთ პილპილი, ხმელი ქინძი, ყვითელი ყვავილი, დანაყილი ნიორი, მარილი, დაასხით 1 ჭიქა გადადუღებული და გაცივებული წყალი და კარგად აურიეთ, ერთგვაროვანი მასის მიღებამდე.
გემრიელად მიირთვით!
სიახლეები ამავე კატეგორიიდან