თევზი მდოგვის და თაფლის სოუსით მარკუს მეტრეველისგან
ავტორი: „თბილისელები“ 12:00 22.09, 2022 წელი
მარკუს მეტრეველი საყვარელი კერძის რეცეპტს ,,თბილისელებს" უზიარებს 👇
ჭამა ჩემთვის ერთ-ერთი ყველაზე სასიამოვნო რიტუალია, რომელიც მაძლევს ენერგიას, კარგ განწყობასა და სიჯანსაღეს. თავად სალათების მომზადება გამომდის კარგად. ჯანსაღი კვება აუცილებელია, რომ ორგანიზმი კარგად გემსახუროს. მით უმეტეს, როდესაც ადამიანს წლები ემატება. მიყვარს ქართული კერძები, შემდეგ – იაპონურ-ჩინური სამზარეულო, ანუ აზიური და რასაკვირველია, ბერძნული, ეგეოსის ზღვის უგემრიელესი თევზეულობა. ახლა კი, შემოგთავაზებთ, მოხარშული თევზის რეცეპტს თაფლითა და მდოგვით, რომელიც ჯანსაღი საკვებია და უგემრიელესიც.
საჭირო ინგრედიენტები:
🔸 4 ნაჭერი თევზის ფილე
🔸 ნახევარი დაჭრილი ლიმონი
🔸 1 კონა ოხრახუში
🔸 1 სადილის კოვზი შავი პილპილის მარცვლები
🔸 4 ცალი დაჭრილი პრასი
🔸 2 დაჭრილი სტაფილო
🔸 1 სუფრის კოვზი მდოგვი
🔸 3 სადილის კოვზი თაფლი
🔸 3 სადილის კოვზი თეთრი ღვინის ძმარი
🔸 100 მილილიტრი ზეითუნის ზეთი
🔸 ნახევარი ლიმონის წვენი
🔸 მარილი და პილპილი – გემოვნებით.
მომზადების წესი 👩🍳
თაფლი, მდოგვი, ძმარი და ცოტა მარილი მოათავსეთ თასში. შეურიეთ ზეითუნის ზეთი და ლიმონის წვენი. შეაზავეთ პილპილით. ტაფაზე დაალაგეთ ლიმონის ნაჭრები, ოხრახუში, შავი პილპილის მარცვლები და ცოტა მარილი. დაასხით წყალი და აადუღეთ. შეამცირეთ ტემპერატურა და ფრთხილად ჩააწყვეთ მასში ფილეები. ადუღეთ დაბალ ტემპერატურაზე თევზის მოხარშვამდე – დაახლოებით, 10 წუთი. ქვაბში გააცხელეთ წყალი, დაუმატეთ დაჭრილი სტაფილო, მარილი და პილპილი. ადუღეთ 2–3 წუთით. დაუმატეთ პრასი და კიდევ რამდენიმე წუთით ადუღეთ, ბოსტნეულის დარბილებამდე. შემდეგ, გადაწურეთ. თევზი ფრთხილად ამოიღეთ თეფშზე, ბოსტნეული ფრთხილად შემოულაგეთ გარშემო და მოასხით თაფლისა და მდოგვის სოუსი.
გემრიელად მიირთვით!
სიახლეები ამავე კატეგორიიდან