ტაფაზე გამომცხვარი პიცა ათ წუთში თათა გიორგობიანისგან
ავტორი: „თბილისელები“ 12:00 05.07, 2022 წელი
თათა გიორგობიანი საყვარელი კერძის რეცეპტს ,,თბილისელებს" უზიარებს 👇
სამზარეულოში ტრიალი მიყვარს. გენეტიკურად გამომყვა „გემრიელი ხელი“ და ყველაფერი კარგი გამომდის. ექსპერიმენტებსაც მივმართავ ხოლმე და ახალ-ახალ გემოებს ერთმანეთს ვუთავსებ. მიყვარს პიცის ცხობა სხვადასხვა ინგრედიენტით და ყველას ძალიან მოსწონს. მე, ძირითადად, სალათების მოყვარული ვარ. რაც შეეხება ფორმის შენარჩუნებას, არასდროს არ ვყოფილვარ დიეტაზე, უბრალოდ, თუ ერთი დღე ჭამა ზედმეტი მომივა, მომდევნო დღეებში თავისით მიქვეითდება მადა და იმ ზედმეტ წონას ავტომატურად ვიკლებ. ბევრ ენერგიას ვხარჯავ და ასევე, ძალიან მიყვარს ფეხით სიარული, რაც წონის შენარჩუნებისთვის ძალიან მეხმარება. ახლა კი გასწავლით ტაფაზე მოსამზადებელი პიცის მარტივ რეცეპტს, რომელიც ათ წუთში მზადდება.
საჭირო ინგრედიენტები:
ცომისთვის – 2 კვერცხი, 4 სადილის კოვზი არაჟანი, 4 სადილის კოვზი მაიონეზი, 9 სადილის კოვზი ფქვილი. ზემოდან მოსაყრელად – 4 ნაჭერი ძეხვი, 2 ნაჭერი ბეკონი, 8 ცალი ქამა სოკო, 1 ცალი პომიდორი, 1 ცალი წითელი ბულგარული, 50 გრამი გახეხილი ყველი.
მომზადების წესი 👩🍳
კვერცხი, არაჟანი, მაიონეზი და ფქვილი კარგად გადაურიეთ. ცომი არაჟანივით თხელი უნდა იყოს. დაასხით ცხიმწასმულ ტაფაზე და ზემოდან დაალაგეთ დაჭრილი პომიდორი, ძეხვი, ბეკონი, სოკო, ბულგარული და მოაყარეთ გახეხილი ყველი. ტაფას თავზე დაახურეთ და აცხვეთ საშუალო ცეცხლზე.
გემრიელად მიირთვით!
სიახლეები ამავე კატეგორიიდან