სოკო კარტოფილით, მჟავე კიტრითა და ბულგარული წიწაკით სალომე გოგიაშვილისგან
ავტორი: „თბილისელები“ 12:00 18.02, 2021 წელი
შესაძლოა, ვინც არ მიცნობს არ იცის, რომ კერძებს საკმაოდ კარგად ვამზადებ და გემრიელიც გამომდის. ვცდილობ, მზადების პროცესში მთელი ჩემი ენერგია და დადებითი განწყობა ჩავდო და ეს ნამდვილად იგრძნობა კერძისა თუ ტკბილეულის დაგემოვნებისას. სხვათა შორის, ოჯახის წევრებსა და მეგობრებს, ძალიან მოსწონთ ჩემი ნახელავი. თავადაც გურმანი ვარ და ვცდილობ, სხვადასხვა ინტერპრეტაციითა და პროდუქტების გემოების შეხამებით შევქმნა ესა თუ ის კულინარიული შედევრი. ჟურნალ „თბილისელების“ მკითხველს კი გავუზიარებ სოკოს ორიგინალურად მომზადების რეცეპტს, რომელიც სამარხვო კერძია და მსუბუქად დასანაყრებელი.
საჭირო ინგრედიენტები: 1 კილოგრამი ქამა სოკო, 1 კილოგრამი კარტოფილი, 3 ცალი წითელი ბულგარული წიწაკა, 1 თავი ხახვი, 1 კონა ქინძი, 1 კონა კამა, 2 ცალი მჟავე კიტრი, მარილი და წიწაკა – გემოვნებით, ზეთი.
მომზადების წესი: დაჭერით კარტოფილი გრძლად და ცხიმში შეწვით.
წვრილად დაჭერით სოკო, ბულგარული წიწაკა, ხახვი, მჟავე კიტრი და მწვანილი.
ჯერ სოკო მოშუშეთ ტაფაზე, შემდეგ ეტაპობრივად ბულგარული წიწაკა და ხახვიც დაუმატეთ. ბოლოს მოაყარეთ მწვანილი, წიწაკა, მარილი და ამოურიეთ.
კარტოფილი გადაიტანეთ თეფშზე და შუაში მოათავსეთ მოშუშული ბოსტნეული, ზემოდან კი დაჭრილი მჟავე კიტრი მოაყარეთ. უმჯობესია, ეს კერძი მომზადდეს კეცზე, თუმცა ტაფაზეც გემრიელი გამოდის.
სიახლეები ამავე კატეგორიიდან
