შემწვარი ქათამი პიტნისა და პომიდვრის ცხარე სოუსში ნანუკა გულუასგან
ავტორი: „თბილისელები“ 12:00 26.04, 2022 წელი
ნანუკა გულუა საყვარელი კერძის რეცეპტს ,,თბილისელებს" უზიარებს
მე სამზარეულოს ახლო მეგობარი ვარ. მეგრული ხელი მაქვს. ყველანაირ საჭმელს – ღომი, ელარჯი, გებჟალია, კუპატი, კუჭმაჭი, შემწვარ-მოხარშულები – ყველაფერს გადასარევად ვამზადებ. მეგობრები მეუბნებიან, მწარე, ცხარე და ძალიან გემრიელ საჭმელებს აკეთებო. კულინარიაში მიყვარს ექსპერიმენტებიც. მეგრელებს ისე გვაქვს პირის გემო მოწყობილი, რომ სიცხარეს ვერ ვგრძნობთ. თუმცა, როცა კერძებს სტუმრებისთვის ვამზადებ, ამას ყოველთვის ვითვალისწინებ, ამიტომ ჩემი კერძები ცხარე არ არის, მაგრამ მაინც იკბინება (იცინის). ერთადერთი, ცომთან ურთიერთობა არ გამომდის, სხვა დანარჩენი – კი, ბატონო. თუმცა, მაინც ვცდილობ. საზღვარგარეთ რომ მივდივარ, გამხდარი და მშიერი ჩამოვდივარ, რადგან არ მომწონს უცხო გემო. მიყვარს მხოლოდ ქართული კერძები. „თბილისელების“ მკითხველს კი შევთავაზებ შემწვარი ქათმის რეცეპტს ცხარე პომიდვრის სიუსში.
საჭირო ინგრედიენტები:
🔸 1 ქათამი, 500 გრამი მწიფე პომიდორი
🔸 2 თავი ხახვი, 2 კბილი ნიორი, 1 ცალი ცხარე წიწაკა
🔸 თითო კონა კამა, ქინძი, რეჰანი და პიტნა
🔸 მარილი – გემოვნებით, კარაქი.
მომზადების წესი 👩🍳
ქათამი დაჭერით, მოაყარეთ მარილი და ღუმელში შებრაწეთ. პომიდორს დაასხით ცხელი წყალი, გააცალეთ კანი და ბლენდერში დააქუცმაცეთ. ხახვი წვრილად დაჭერით და კარაქში მოშუშეთ. დაუმატეთ პომიდორი, მარილი, ქვაბს თავსახური დააფარეთ და დაბალ ცეცხლზე შუშეთ. ამ სოუსში ჩააწყვეთ შემწვარი ქათამი და წამოადუღეთ, მოაყარეთ დაჭრილი მწვანილი, ხელით დაქუცმაცებული პიტნის ფოთლები, დანაყილი ნიორი, დაჭრილი წიწაკა, ისევ წამოადუღეთ და 2-3 წუთში მზადაა.
სიახლეები ამავე კატეგორიიდან
