შემწვარი ქათამი ალუბლის სოუსით კახა კუხიანიძისგან
ავტორი: „თბილისელები“ 12:00 04.06, 2022 წელი
საყვარელი კერძის რეცეპტს კახა კუხიანიძე ,,თბილისელებს" უზიარებს 👇
როცა მარტო ცხოვრობ, გიწევს საჭმლის მომზადება და ხანდახან ისეთი გემრიელი გამომდის, მეშინია, თითები არ ჩავიკვნიტო (იცინის). მიმაჩნია, რომ სამზარეულო ის ადგილია, სადაც ადამიანმა საკუთარ თავს ექსპერიმენტების, სხვადასხვა პროდუქტისა და გემოების შეხამება-შეზავების საშუალება უნდა მისცე. თან, გურმანი ვარ და სანამ კერძს დავაგემოვნებ, სუნითაც კარგად ვგრძნობ, როგორია. თან, ჩემს ოჯახშიც ყველა კარგად ამზადებს და ეტყობა, ეს ყველაფერი გენეტიკურადაც დამყვა. ჭამა კი მიყვარს, მაგრამ არც ვარჯიში მეზარება და ამიტომ წონის პრობლემაც არ მაწუხებს. ჟურნალ „თბილისელების“ მკითხევლს ვასწავლი ქათმის მომზადებას ალუბლის სოუსით, რომელიც უკიდეგანოდ გემრიელია, უცხოა და თან, ვიზუალურად და სურნელით ძალიან მიმზიდველი.
საჭირო ინგრედიენტები:
🔸 1 ქათამი, 1 ცალი ცხარე მწვანე წიწაკა
🔸 3 კბილი ნიორი
🔸 1 კონა ქინძი
🔸 1 ჩაის კოვზი სახამებელი
🔸 ნახევარი კილოგრამი კურკაგამოცლილი ალუბალი
🔸 1 სუფრის კოვზი ზეითუნის ზეთი
🔸 მარილი – გემოვნებით.
მომზადების წესი 👩🍳
ალუბალი ჩაყარეთ ქვაბში, დაასხით ძალიან ცოტა წყალი და წამოადუღეთ. შემდეგ, ბლენდერით ათქვიფეთ, ჩააბრუნეთ ქვაბში, შეურიეთ ცოტა ცივ წყალში გახსნილი სახამებელი, მარილი და ნელი მორევით წამოადუღეთ. სოუსს დაუმატეთ დანაყილი ნიორი, დაჭრილი ქინძი, წიწაკა და შეაგრილეთ. ქათამს წაუსვით ზეთი, მოაყარეთ მარილი და შეწვით ღუმელში ან ტაფაზე. შებრაწული ქათამი, სუფრაზე ალუბლის საწებელთან ერთად მიიტანეთ.
სიახლეები ამავე კატეგორიიდან