სამეფო დესერტი – შოკოლადი ნაღებით
ავტორი: „თბილისელები“ 12:00 14.03, 2021 წელი
გემრიელი დესერტის რეცეპტი ,,თბილისელებისგან" 👇
საჭირო ინგრედიენტები: ცომი – 150 გრამი მუქი ფერის შაქარი, 150 გრამი კარაქი, 2 ჭიქა ფქვილი, 2 სადილის კოვზი კაკაო, 1 ჩაის კოვზი სოდა, ლიმონის წვენი სოდაზე დასასხმელად, მარილი.
შიგთავსი: 1 ჭიქა მუქი ფერის შაქარი, 70 გრამი შავი მოცხარის პიურე, 500 გრამი ხაჭო, 250 გრამი მასკარპონე, 2 სადილის კოვზი სიმინდის სახამებელი, 2 კვერცხი, ცოტა მარილი, 200 მილილიტრი 33-პროცენტიანი ნაღები.
მომზადების წესი: გაადნეთ კარაქი. შეურიეთ შაქარი და ათქვიფეთ. ნელ-ნელა შეურიეთ ფქვილი, კაკაო, მწიკვი მარილი, სოდაზე დასხმული ლიმონი. აურიეთ ძალიან კარგად. შემდეგ ამ მასისგან ხელში ასრესვით გააკეთეთ შოკოლადის ფხვნილი. მოათავსეთ მაცივარში და კარგად გააცივეთ.
სანამ ცომი ცივდება, მოამზადეთ შიგთავსი. კვერცხის გული და ცილა გააცალკევეთ. შაქარი და კვერცხის ცილა ძალიან კარგად ათქვიფეთ. ნელ-ნელა შეურიეთ სახამებელი. აურიეთ ძალიან კარგად. ცალკე ათქვიფეთ კვერცხის გული და შეურიეთ დანარჩენ მასას. ხაჭო ცოტა ხანი დუშლაგზე მოათავსეთ, რათა დაიწუროს. ათქვიფეთ მასკარპონე და გასრისეთ კვერცხის გულთან ერთად. დაუმატეთ ხაჭო და ნაღები, შემდეგ კი შეურიეთ კვერცხის ცილიან მასას და კარგად აურიეთ. ჰაეროვანი მასა უნდა იყოს. გაყავით ეს მასა ორ ნაწილად. ერთ ნაწილს შეურიეთ მოცხარის პიურე. ფორმას წაუსვით ცხიმი. მოათავსეთ ფხვიერი „ცომის“ ორი მესამედი. ხელით კარგად ჩატკეპნეთ. წაუსვით მოცხარიანი მასა, შემდეგ მეორე მასის ნახევარი. ზემოდან მოაყარეთ დარჩენილი ფხვიერი „ცომის“ ნახევარი, ისე, რომ სულ დაიფაროთ. დაასხით დარჩენილი შიგთავსი და დაფარეთ დარჩენილი „ცომით“. გამოაცხვეთ 180 გრადუსზე 50 წუთის განმავლობაში. გამოიღეთ, გააგრილეთ და შემდეგ კარგად გააცივეთ მაცივარში. მორთეთ მოცხარით.
სიახლეები ამავე კატეგორიიდან
