ფორთოხლისა და მანდარინის ჩიზქეიქი სალომე ბაკურაძისგან
ავტორი: „თბილისელები“ 12:00 30.12, 2021 წელი
საკმაოდ კარგი ხელი მაქვს და გემრიელი კერძებიც გამომდის. ზოგადად, თუ რამე მოვინდომე, აუცილებლად გამომივა. გურმანიც ვარ და მიყვარს გემრიელი საკვები. ეს ადრე წონაზე მეტყობოდა კიდეც, თუმცა, ბოლო წლებია, საკუთარი თავისთვის მოვიცალე, ვვარჯიშობ, მასაჟებს ვიკეთებ, სწორად ვიკვებები და საკმაოდ თვალშისაცემად დავიკელი. საახალწლო საზეიმო დღეებში „თბილისელების“ ერთგულ მკითხველს შევთავაზებ ამ სეზონის ყველასთვის საყვარელი ციტრუსის ჩიზქეიქს, რომელიც საკმაოდ მარტივად მზადდება.
საჭირო ინგრედიენტები:
🔸 120 გრამი შავი შოკოლადი
🔸 120 გრამი კარაქი
🔸 300 გრამი შაქარი
🔸 4 კვერცხი
🔸 100 გრამი ხორბლის ფქვილი
🔸 1 ჩაის კოვზი გამაფხვიერებელი
🔸 2 სუფრის კოვზი კაკაო
🔸 700 გრამი ხაჭო
🔸 1 ტოტი როზმარინი
🔸 2 ცალი ფორთოხალი, 7 ცალი მანდარინი
🔸 დარიჩინის 1 ჩხირი, ზეთი.
მომზადების წესი 👩🍳
გაადნეთ შავი შოკოლადი მიკროტალღურ ღუმელში ან წყლის აბაზანაზე. ათქვიფეთ რბილი კარაქი 100 გრამ შაქართან ერთად, დაამატეთ ერთი კვერცხი, ისე, რომ თქვეფა არ შეწყვიტოთ. შეურიეთ ხორბლის ფქვილი, კაკაო და გამაფხვიერებელი. კარგად აურიეთ. დაამატეთ გამდნარი, გაცივებული შოკოლადი და აურიეთ. მრგვალ საცხობ ფორმაში მოათავსეთ პერგამენტის ქაღალდი, წაუსვით ზეთი. მოათავსეთ მომზადებული შოკოლადის ცომი და გადაანაწილეთ. მიქსერით ათქვიფეთ ხაჭო, 3 კვერცხი, 100 გრამი შაქარი, დაამატეთ ერთი ფორთოხლის ცედრა და აურიეთ. ხაჭოს ფენა დაასხით შოკოლადს. აცხვეთ 160 გრადუსზე, დაახლოებით 1 საათით. ზემოდან უნდა იყოს ოდნავ შეწითლებული. დატოვეთ, რომ ღუმელშივე გაგრილდეს. გაცივებული ჩიზქეიქი მოათავსეთ მაცივარში 2 საათის განმავლობაში.
მანდარინი კარგად გაასუფთავეთ. ცალკე მოხარშეთ სიროფი – ამისათვის დაგჭირდებათ: 100 მილილიტრი წყალი, ნახევარი ჭიქა ფორთოხლის წვენი, 3 მანდარინის ქერქი, როზმარინის ტოტი, დარიჩინის ჯოხი და 100 გრამი შაქარი. მოხარშეთ სიროფი 5-8 წუთის განმავლობაში. შემდეგ, გაწურეთ, მოალაგეთ ჩიზქეიქს მანდარინის ნაჭრები და დაასხით სიროფი. დააფარეთ თავსახური და გააჩერეთ მანამ, სანამ მთლიანად არ გაცივდება.
სიახლეები ამავე კატეგორიიდან