ქათამი თეთრი ლობიოს სოუსით შორენა იმნაძისგან
ავტორი: „თბილისელები“ 12:00 28.08
იმის გამო, რომ ჩემი პროფესიიდან გამომდინარე ძალიან დაკავებული ვარ, ხშირად არ მიწევს სამზარეულოში ტრიალი. თუმცა, როცა დრო მაქვს, გემრიელ და არომატულ სადილებსა და დესერტებს ვამზადებ. ძალიან მიყვარს ქართული სამზარეულო და ვფიქრობ, მას ვერცერთი ქვეყნის სამზარეულო ვერ შეედრება. გურმანი ვარ, თუმცა საკუთარ წონას მკაცრად ვაკონტროლებ და ვცდილობ, ფორმაში ვიყო. ვიცავ სწორი კვების რეჟიმს. ასევე, ვცდილობ, გვიან არ ვჭამო და ბევრს დავდივარ ფეხით. მინდა, შემოგთავაზოთ, ქათმის მომზადების რეცეპტი თეთრი ლობიოს სოუსით, რომელიც გარდა იმისა რომ განსხვავებული და სასწაულად გემრიელი კერძია, იმავდროულად, ადვილად მოსამზადებელი და დიეტურია.
საჭირო ინგრედიენტები:
🔸 800 გრამი ქათმის ფილე
🔸 300 გრამი თეთრი ლობიოს კონსერვი
🔸 4 კბილი ნიორი
🔸 1 კონა ოხრახუში
🔸 1 სადილის კოვზი ვაშლის ძმარი
🔸 1 სადილის კოვზი ზეითუნის ზეთი
🔸 მარილი და წიწაკა – გემოვნებით.
მომზადების წესი 👩🍳
ლობიო გადაწურეთ და აზილეთ ისე, რომ პიურე მიიღოთ. დაუმატეთ წვრილად დაკეპილი წიწაკა, ოხრახუში, ძმარი, ზეთი, დანაყილი ნიორი და მარილი. ქათმის ფილეს წაუსვით ზეთში არეული მარილი და ღუმელში შეწვით, შემდეგ კი თხელ ნაჭრებად დაჭერით. ლობიო ამოიღეთ თეფშზე, ზემოდან დააწყვეთ ქათმის ნაჭრები და სუფრაზე ისე გაიტანეთ.
სიახლეები ამავე კატეგორიიდან
