ქამა სოკო ლიმონის წვენითა და წიწაკა ჩილით მარიკა თხელიძისგან
ავტორი: „თბილისელები“ 12:00 01.04, 2021 წელი
რეცეპტი მარიკა თხელიძისგან 👇
მიყვარს მსუბუქი სალათების მომზადება ჯანსაღი და ცოცხალი პროდუქტებით. უპირატესობას, სწორედ, ასეთ ბოსტნეულს ვანიჭებ. ასეთ სალათებს თავადაც გემრიელად მივირთმევ. ადრე, არასოდეს მიცდია ხორცეულის მომზადება, თუმცა, ახლა, რაც გავთხოვდი და ვიცი, რომ ჩემს მეუღლეს ხორცეულისგან მომზადებული საჭმელები უყვარს, ვცადე და გამომივიდა, თანაც, საკმაოდ გემრიელი. ზოგადად, ვცდილობ, სწორი კვების რეჟიმი დავიცვა და ფიზიკურად აქტიური ვიყო. მტანჯველი დიეტები არ მჭირდება, რადგან გენეტიკურად თხელი აღნაგობა მაქვს. ახალ კი, გასწავლით სოკოს მარტივად მოსამზადებელ რეცეპტს.
საჭირო ინგრედიენტები: 400 გრამი ქამა სოკო, 2 კბილი ნიორი, 30 მილილიტრი ზეითუნის ზეთი, 2 სუფრის კოვზი ლიმონის წვენი, 1 ცალი წიწაკა ჩილი, 1 კონა ოხრახუში, მარილი – გემოვნებით.
მომზადების წესი: სოკო დაჭერით და მოასხით ლიმონის წვენი. ნიორი და წიწაკა ჩილი წვრილად დაკეპეთ. ტაფაზე გააცხელეთ ზეთი, დაამატეთ ჩილისა და ნივრის ნახევარი. დაახლოებით, 20 წამში კი დაამატეთ სოკო, მოაყარეთ მარილი და იშუშოს 10 წუთის განმავლობაში, პერიოდულად კი ურიეთ. ბოლოს, 1-2 წუთით ადრე, ჩაამატეთ დარჩენილი ნივრისა და წიწაკის ნაზავი. ცეცხლის გამორთვის შემდეგ, მოაყარეთ წვრილად დაჭრილი ოხრახუში და ამოურიეთ.
სიახლეები ამავე კატეგორიიდან